ខ្មែរបដិសេធព័ត៌មានថាមានទាហានថៃចូលមកតំបន់ប្រាសាទតាក្របី
ខណៈដែលមានពលករខ្មែរ២នាក់ ត្រូវទាហានថៃបាញ់សម្លាប់ក្នុងព្រៃ កាលពីថ្ងៃពុធ ពេលកំពុងឆ្លងព្រំដែនទៅកាប់ឈើខុសច្បាប់ក្នុងទឹកដីថៃនោះ នៅថ្ងៃនេះ ទាហានកម្ពុជាក៏បានចេញមកបញ្ចប់ពាក្យចចាមអារ៉ាម ដែលលេចឮថាមានក្រុមទាហានថៃជាច្រើននាក់បានចូលមកប្រាសាទតាក្របី ក្នុងដែនអធិបតេយ្យរបស់កម្ពុជា ដើម្បីត្រួតពិនិត្យរួមគ្នាលើប្រាសាទបុរាណមួយនេះ។
ចុះផ្សាយនៅថ្ងៃ៖
ស្តាប់ - ០២:០៩
មិនមានក្រុមទាហានថៃមកកាន់កាប់តំបន់ប្រាសាទតាក្របី ដែលគ្រប់គ្រងដោយកម្ពុជា ដូចពាក្យចចាមអារ៉ាមទេ នៅព្រឹកមិញនេះ។ កងទ័ពកម្ពុជានៅតែរក្សាស្វ័យការពារទឹកដីរបស់ខ្លួន និងចង់បានសន្តិភាពរវាងកម្ពុជា-ថៃដដែល តាមគោលការណ៍របស់រដ្ឋាភិបាល។ នេះបើតាមការឲ្យដឹងពីលោក ជា តារា អគ្គមេបញ្ជារងកងយោធពលខេមរភូមិន្ទ។
តាមលោក ជា តារា កម្ពុជាចង់ឲ្យប្រទេសទាំង២ ដែលធ្លាប់មានជម្លោះព្រំដែន បញ្ចប់ការឈ្លានពាន ដើម្បីឈានទៅរកសន្តិភាព និងភាពរីកចម្រើនទាំងសងខាង។ ការបដិសេធរបស់ទាហានខ្មែរ ធ្វើឡើងបន្ទាប់ពីមានពាក្យចចាមអារ៉ាមថា ទាហានថៃជាច្រើននាក់បានសុំចូលតំបន់ប្រាសាទតាក្របី ដើម្បីអាចត្រួតពិនិត្យតំបន់នោះរួមគ្នា ជាមួយទាហានខ្មែរ។តែបំណងរបស់ទាហានថៃត្រូវបានភាគីកម្ពុជាបដិសេធ។
ការលេចឮនេះ គឺមួយថ្ងៃបន្ទាប់ពីមានព័ត៌មានថា ពលករខ្មែរ២នាក់ ត្រូវបានទាហានឈុតខ្មៅថៃបាញ់សម្លាប់ក្នុងព្រៃ និងម្នាក់ទៀតរងរបួសមួយគ្រាប់ត្រង់ភ្លៅ កាលពីថ្ងៃពុធ ពេលដែលពួកគេនិងបក្សពួក៥នាក់ផ្សេងទៀត លួចឆ្លងដែនខុសច្បាប់ចូលទៅកាប់ឈើប្រណីតក្នុងដីថៃ ។
ប្រភពពីទាហានភូមិភាគ៤ប្រចាំខេត្តឧត្តរមានជ័យ បានឲ្យដឹងថាទាហានសឹករងស្រុកត្រពាំងប្រាសាទជាច្រើននាក់ បានប្រយុទ្ធគ្នាប្រមាណ១៥នាទី នៅចំណុចលេខ២៣៩៨ ក្នុងស្រុកឃុនហាង ខេត្តស៊ីសាកេត ដែលឈមនឹងស្រុកត្រពាំងប្រាសាទ។ ទាហានខ្មែរបាញ់កាំភ្លើងអាកាអស់ ៤០០គ្រាប់ និងកំាភ្លើង M16 ចំនួន១១គ្រាប់ ទៅលើទាហានឈុតខ្មៅថៃ ដើម្បីរំដោះពលករខ្មែរដែលនៅរស់ឲ្យត្រឡប់មកកម្ពុជាវិញ។ មិនមានព័ត៌មានថា ទាហានខ្មែរនិងថៃមានរងរបួសឬស្លាប់ ក្នុងការប្រយុទ្ធគ្នាមួយប្រ៉ាវនោះទេ។
រដ្ឋាភិបាលកម្ពុជាធ្លាប់បានផ្ញើកំណត់ទូតជាច្រើន សុំឲ្យថៃបញ្ឈប់ការបាញ់បោះសេរីលើជនស៊ីវិលខ្មែរតទៀត ដោយត្រូវអនុវត្តច្បាប់ ពេលដែលពលរដ្ឋខ្មែរប្រព្រឹត្តបទល្មើសក្នុងទឹកដីថៃ។ ភាគីថៃមិនបានឆ្លើយតបតាមកំណត់ទូតកម្ពុជានោះឡើយ ថ្វីបើកិច្ចសហប្រតិបត្តិការផ្នែកការទូតរវាងប្រទេសទាំង២ មានលក្ខណៈល្អប្រសើរ ក្រោយពីអ្នកស្រី យីងឡាក់ ជាប់ឆ្នោតជានាយករដ្ឋមន្រ្តីថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ