សន្តិភាពបានកើតមានឡើងវិញហើយនៅតាមព្រំដែនកម្ពុជា-ថៃ
នៅក្នុងជំនួបរវាងរដ្ឋមន្ត្រីការបរទេសអាស៊ានជាមួយ អគ្គលេខាធិការ អង្គការសហប្រជាជាតិនៅទីក្រុងញូយ៉កសហរដ្ឋអាមេរិក លោក ហោ ណាំហុង រដ្ឋមន្ត្រីក្រសួងការបរទេសខ្មែរបានជម្រាបប្រាប់លោក បាន គីមូន ថា សន្តិភាពបានកើតមានឡើងវិញហើយនៅតាមព្រំដែនកម្ពុជា-ថៃ។ បញ្ហាដែលនៅសេសសល់នឹងត្រូវដោះស្រាយដោយសន្តិវិធីដើម្បីបម្រើផល ប្រយោជន៍នៃប្រជាជាតិទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នៅក្នុងសេចក្តីថ្លែងការណ៍មួយដែលត្រូវបានផ្សព្វផ្សាយកាលពីល្ងាចថ្ងៃសៅរ៍ម្សិលមិញ លោក ហោ ណាំហុង រដ្ឋមន្រ្តីក្រសួងការបរទេសខ្មែរបានជម្រាបប្រាប់លោកអគ្គលេខាធិការអង្គការសហប្រជាជាតិ បាន គីមួន ថា ក្រោយពីតុលាការយុត្តិធម៌អន្តរជាតិក្រុងឡាអេបានចេញដីកាកាលពីខែកក្កដាបង្គាប់អោយបង្កើតតំបន់គ្មានយោធាបណ្តោះអាសន្នមក សន្តិភាពបានកើតមានឡើងវិញហើយនៅតាមតំបន់ព្រំដែនកម្ពុជាថៃ។ នៅលើទីតាំងជាក់ស្តែង ពុំមានការបាញ់គ្នាទៀតទេ។
លោកប្រមុខការទូតនៃប្រទេសកម្ពុជាបានបន្តទៀតថា ដើម្បីអនុវត្តដីកាតុលាការយុត្តិធម៌អន្តរជាតិ កម្ពុជាបាននិងកំពុងត្រៀមខ្លួនជាស្រេចដើម្បីដកកងទ័ពរបស់ខ្លួនចេញពីតំបន់គ្មានយោធាបណ្តោះអាសន្ន។ ជាក់ស្តែង ក្នុងពេលរង់ចាំការដកទ័ពចេញពីតំបន់នេះ កម្ពុជាបានដកទ័ពរបស់ខ្លួនចេញពីទីតាំងដែលនៅជុំវិញតំបន់គ្មានយោធាបណ្តោះអាសន្ន។ កម្ពុជាធ្វើយ៉ាងនេះគឺសំដៅបង្កអោយមានបរិយាកាសអំណោយផលដើម្បីរកដំណោះដោយសន្តិវិធីចំពោះបញ្ហាព្រំដែនកម្ពុជាថៃ។
ចំពោះការដកទ័ពចេញពីតំបន់គ្មានយោធាបណ្តោះអាសន្ន លោកឧបនាយករដ្ឋមន្ត្រី ហោ ណាំហុង បានលើកឡើងថា ត្រូវតែមានវត្តមានរបស់អ្នកសង្កេតការណ៍ឥណ្ឌូនេស៊ីនៅទីនោះដើម្បីសង្កេតការណ៍និងផ្ទៀងផ្ទាត់។ ប្រការនេះមានសារៈសំខាន់ណាស់ ដោយហេតុថា ការដកទ័ពត្រូវធ្វើឡើងព្រមពេលគ្នាតែមួយប្រកបដោយតម្លាភាព។
លោកប្រមុខការទូត ហោ ណាំហុង បានគូសបញ្ជាក់ទៀតថា តាមរយៈរដ្ឋាភិបាលថ្មីរបស់ថៃ បញ្ហាប្រឈមទ្វេភាគី រួមទាំងបញ្ហាព្រំដែនរវាងប្រទេសទាំងពីរផងនោះនឹងត្រូវដោះស្រាយដោយសន្តិវិធីនិងមិត្តភាពដើម្បីបម្រើផលប្រយោជន៍នៃប្រជាជនទាំងពីរក្នុងស្មារតីជាអ្នកជិតខាងល្អ។
សេចក្តីថ្លែងការណ៍របស់កម្ពុជាបានបញ្ជាក់ទៀតថា បញ្ហាដែលនៅសេសសល់គឺការបកស្រាយសាលក្រមឆ្នាំ១៩៦២របស់តុលាការយុត្តិធម៌អន្តរជាតិទាក់ទងទៅនឹងផ្ទៃដីទំហំ៤,៦គីឡូម៉ែត្រក្រឡានៅជិតប្រាសាទព្រះវិហារដែលទាមទារដោយភាគីថៃ។ ក្នុងពេលនេះ តុលាការយុត្តិធម៌អន្តរជាតិកំពុងរង់ចាំមតិយោបល់ពីប្រទេសថៃ ចំពោះសំណើរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ