ជីវិតលោក កឹម សុខា រងកម្មដោយសារការគម្រាមកំហែង ចោទប្រកាន់ និងចាប់ដាក់គុក
លោក កឹម សុខា ទើបត្រូវបានចាប់ខ្លួនកាលពីយប់មិញ នៅគេហដ្ឋានរបស់លោក ក្នុងខណ្ឌទួលគោក រាជធានីភ្នំពេញ ក្រោមបទចោទ អំពើក្បត់ជាតិ ដែលមានចែងក្នុងក្រមព្រហ្មទណ្ឌរបស់កម្ពុជា។ ជាការកត់សម្គាល់នេះមិនមែនជាលើកទីមួយទេ លោក ប្រធានគណបក្សប្រឆាំងរូបនេះត្រូវបានចោទប្រកាន់ និងចាប់ខ្លួនពីសំណាក់រដ្ឋាភិបាលកម្ពុជា។ បន្ដទៅនេះ យ៉ា រសាត់ សូមសង្ខេបប្រវត្តិនៃការចាប់ខ្លួនរបស់លោក កឹម សុខា។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងដំណើរជីវិតនយោបាយ លោក កឹម សុខា បានជួបតែភាពរងកម្មតាមរយៈការគំរាមកំហែង ការចោទប្រកាន់ និងការចាប់វាយខ្នោះបញ្ចូលគុក ពីសំណាក់អាជ្ញាធរកម្ពុជា ទាក់ទងនឹងបទចោទផ្សេងៗគ្នា។
ឆ្នាំមុន លោក កឹម សុខា ត្រូវបង្ខំចិត្តបង្ខាំងខ្លួនឯងនៅទីស្នាក់ការគណបក្សសង្គ្រោះជាតិ អស់ជាច្រើនខែ ដោយសារតែសំណុំរឿងស្នេហាលួចលាក់ជាមួយកញ្ញា ខុម ចាន់តារាទី ហៅស្រីមុំ។ រឿងរ៉ាវនេះបានបែកធ្លាយតាមរយៈហ្វែសប៊ុគកាលពីដើមឆ្នាំ២០១៦។ ប៉ុន្ដែរឿងនេះ មិនមែនធ្ងន់ធ្ងរនោះឡើយ។
រឿងដែលធ្ងន់ធ្ងរនោះ គឺរឿងដែលលោក កឹម សុខា បដិសេធ មិនព្រមចូលបំភ្លឺតាមការកោះហៅរបស់តុលាការក្រុងភ្នំពេញចំនួនពីរលើកក្នុងនាមជាសាក្សី ទាក់ទងនឹងសំណុំរឿងស្នេហានោះ។ អយ្យការអមសាលាដំបូងរាជធានីភ្នំពេញ បានចោទថា ការប្រព្រឹត្តរបស់លោក កឹម សុខា ដែលមិនបានចូលខ្លួនមកឆ្លើយបំភ្លឺទាំងពីរលើកនេះគឺជាបទល្មើសតាមមាត្រា ៥៣៨នៃក្រមព្រហ្មទណ្ឌ ព្រះរាជាណាចក្រកម្ពុជា។
នៅទីបំផុតតុលាការបានសម្រេចដាក់ពន្ធនាគារចំនួន ៥ ខែ និងពិន័យជាប្រាក់ចំនួន ៨ សែនរៀល ពីបទបដិសេធក្នុងការចូលខ្លួន ប៉ុន្ដលោក កឹម សុខា មិនបានអនុវត្តទោសនោះឡើយ ដោយលោកសំងំលាក់ខ្លួននៅក្នុងស្នាក់ការគណបក្សសង្គ្រោះជាតិអស់ជាច្រើនខែ។ លោក កឹម សុខា ត្រូវបានប៉ូលិសប៉ុនប៉ងចាប់ខ្លួននៅស្នាក់ការគណបក្សសង្គ្រោះជាតិ ប៉ុន្ដែសកម្មភាពនេះត្រូវបានបញ្ឈប់ ដោយសារសកម្មជនគណបក្សប្រឆាំងរាប់រយនាក់នាំគ្នាទៅដេកយាមនៅក្នុងស្នាក់ការនោះ ទាំងថ្ងៃទាំងយប់។
នៅទីបំផុត កាលពីដើមខែ ធ្នូ ឆ្នាំ ២០១៦ លោក កឹម សុខា ត្រូវបានព្រះមហាក្សត្រព្រះរាជទានលើកលែងទោស។
រឿងមួយផ្សេងទៀត កាលពីអំឡុងឆ្នាំ ២០១៣ ក្នុងខ្សែអាត់សម្លេងមួយដែលគេចោទថា ជាសម្លេងរបស់លោក កឹម សុខា បាននិយាយថា “ទួលស្លែង ជាគុកសប្បនិម្មិត”។ ភ្លាមៗទាំងជនរងគ្រោះរួចផុតជីវិតពីគុកទួលស្លែង និងពលរដ្ឋកម្ពុជាដែលរងគ្រោះក្នុងរបបខ្មែរក្រហម ជាច្រើន បានទាមទាឲ្យលោក កឹម សុខា សុំទោសជនរងគ្រោះ ក្នុងរបបខ្មែរក្រហម។ ប៉ុន្ដែលោក កឹម សុខា មិនបានសុំទោសឡើយ ដោយលោក ថា លោកមិនបាននិយាយដូចការចោទនោះទេ។
នៅទីបំផុត មហាបាតុកម្មត្រូវបានធ្វើឡើងទាំងនៅក្នុងក្រុងភ្នំពេញ និងនៅតាមបណ្ដាខេត្តនានា។ ដោយសារតែសម្លេងលោក កឹម សុខា ទាក់ទងនឹងការមិនទទួលស្គាល់ គុកទួលស្លែង នោះ នៅក្នុងឆ្នាំ២០១៣ ដដែល រដ្ឋសភា បានអនុម័តច្បាប់ប្រឆាំងនឹងអ្នកមិនទទួលស្គាល់របបខ្មែរក្រហម។
ច្បាប់នោះមានឈ្មោះថា ការប្រឆាំងការមិនទទួលស្គាល់ឧក្រិដ្ឋកម្ម ដែលប្រព្រឹត្តឡើង ក្នុងរយៈកាលនៃកម្ពុជាប្រជាធិបតេយ្យ។ បើតាមច្បាប់នេះ អ្នកដែលមិនទទួលស្គាល់របបខ្មែរក្រហម ដែលមានការសម្លាប់មនុស្សពី ៦ ខែ ដល់ ២ ឆ្នាំ និងពិន័យជាប្រាក់ ពី១ លានរៀល ដល់ ៤ លានរៀល។
កាលពីចុងឆ្នាំ ២០០៥ វិញ កាលនោះលោក កឹម សុខា ក្នុងនាមជាប្រធានមជ្ឈមណ្ឌលសិទ្ធិមនុស្សកម្ពុជា បានជាប់ពន្ធនាគារ បន្ទាប់ពីលោក នាយករដ្ឋមន្ដ្រី ហ៊ុន សែន ចោទប្រកាន់លោក ពីបទបរិហារកេរ្ដិ៍ ។ ការចោទប្រកាន់របស់លោកនាយករដ្ឋមន្ដ្រី គឺទាក់ទិននឹងបដាមួយលើកនៅពីក្រោយលោក កឹម សុខា ក្នុងពិធីជួបប្រជុំរបស់មជ្ឈមណ្ឌលសិទ្ធិមនុស្សកម្ពុជា ដែលបដានោះបានចោទប្រកាន់ថា លោក ហ៊ុន សែន បានលក់ទឹកដីឲ្យវៀតណាម។
កាលថ្ងៃទី៣១ ខែធ្នូ ឆ្នាំ២០០៥ វេលាម៉ោង១៣ និង៣០នាទី លោក កឹម សុខា ត្រូវបានអាជ្ញាធរចាប់យកទៅឃុំខ្លួននៅពន្ធនាគារព្រៃស ដោយចោទពីបទបរិហារកេរ្ដិ៍ និងជេរប្រមាថប្រមុខរាជរដ្ឋាភិបាល។ លោក កឹម សុខា ត្រូវបានដោះលែងពីពន្ធនាគារព្រៃស នៅថ្ងៃទី១៧ ខែមករា ឆ្នាំ២០០៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ