គណបក្សជាប់ឆ្នោតទាំង២កំណត់ចូលតុចរចាជាថ្មីនៅថ្ងៃទី១៨កុម្ភៈ
ទីបំផុតទៅគណបក្សប្រជាជនកម្ពុជានិងគណបក្សសង្គ្រោះជាតិបានព្រមព្រៀងគ្នាចូលតុចរចាជាថ្មីម្តងទៀតហើយ។ ការជួបគ្នាជាថ្មីនេះនឹងធ្វើឡើងនៅថ្ងៃចន្ទទី១៨កុម្ភៈដើមសប្តាហ៍ក្រោយនេះនៅឯមន្ទីរព្រឹទ្ធសភា។ ថ្វីដ្បិតតែគណបក្សទាំងពីរនៅមានរបៀបវារៈខុសគ្នាខ្លះក៏ដោយ ក៏ប្រធានបទដែលសំខាន់ត្រូវជជែកគ្នានៅពេលនេះគឺកំណែទម្រង់ការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
បន្ទាប់ពីឆ្លើយឆ្លងគ្នាតាមរយៈ សារព័ត៌មាននិងតាមរយៈសេចក្តីថ្លែងការណ៍ជាច្រើនលើកមក គណបក្សប្រជាជនកម្ពុជាបានសម្រេចនៅថ្ងៃសៅរ៍ទី១៥កុម្ភៈនេះដោយកំណត់យកថ្ងៃចន្ទទី១៨កុម្ភៈធ្វើជាថ្ងៃណាត់ជួបគ្នាជាមួយគណបក្សសង្គ្រោះជាតិ។ ជំនួបនេះនឹងធ្វើឡើងនៅឯមន្ទីរព្រឹទ្ធសភា។
ក្រោយពីសេចក្តីជូនដំណឹងនេះភ្លាមគណបក្សសង្គ្រោះជាតិក៏បានប្រកាសស្វាគមន៍ជំនួបនេះដែរ។ លោក សុន ឆ័យ មន្ត្រីជាន់ខ្ពស់គណបក្សសង្គ្រោះជាតិនិងជាប្រធានដឹកនាំក្រុមចរចាបានប្រាប់វិទ្យុបារាំងអន្តរជាតិថា គណបក្សសង្គ្រោះជាតិមិនជំទាស់នឹងកាលបរិច្ឆេទនិងទីតាំងជំនួបនេះទេ។
គួរកត់សម្គាល់ថាជំនួបចរចាជាថ្មីនេះបានកើតឡើងបន្ទាប់ពីគណបក្សប្រជាជនកម្ពុជាបានបង្កើតគណៈកម្មការកែទម្រង់បោះឆ្នោតតែម្នាក់ឯងដោយគ្មានសមាសភាពផ្សេងចូលរួម។ គណបក្សសង្គ្រោះជាតិបានសម្តែងការសោកស្តាយចំពោះបញ្ហានេះ។ ក្រោយមកគណបក្សប្រជាជនកម្ពុជាបានប្រកាសស្វាគមន៍គណបក្សប្រឆាំងនិងស្នើឲ្យគណបក្សនេះចាត់តំណាងមកចូលរួម។
ឆ្លើយតបនឹងសំណើនេះ គណបក្សសង្គ្រោះជាតិក៏បានចាត់តំណាង៣រូបដើម្បីត្រៀមជួបចរចាជាមួយដៃគូ។ សមាសភាពទាំងបីនោះមានលោក សុន ឆ័យ លោក កួយ ប៊ុនរឿន និងលោក យ៉ែម ប៉ុញ្ញាឫទ្ធិ។ ក្រោយពីកំណត់សមាសភាពរួចហើយគណបក្សសង្គ្រោះជាតិរង់ចាំការកំណត់ពេលវេលាពីគណបក្សប្រជាជនកម្ពុជា។ នៅថ្ងៃសៅរ៍នេះ គណបក្សកាន់អំណាចក៏បានសម្រេចយកថ្ងៃទី ១៨ កុម្ភៈជាថ្ងៃជួបចរចា។ គណបក្សនេះ ក៏មានសមាសភាពបីនាក់ដែរគឺ លោក ព្រំ សុខា លោក សក់ សេដ្ឋា និង លោក កើត រិទ្ធ។
ទាក់ទងនឹងរបៀបវារៈនៃកិច្ចពិភាក្សាលើកនេះគណបក្សទាំងពីរហាក់នៅមិនទាន់បញ្ជាក់ពីការឯកភាពគ្នាឲ្យបានច្បាស់លាស់នៅឡើយទេ។ តាមរយៈសេចក្តីប្រកាសព័ត៌មានចុងក្រោយ កាលពីថ្ងៃទី ១៤កុម្ភៈ គណបក្សសង្គ្រោះជាតិអះអាងថា នឹងជជែកអំពីការផ្លាស់ប្តូរសមាសភាព គ.ជ.ប និងការបោះឆ្នោតឡើងវិញមុនអាណត្តិជាដើម។
ប៉ុន្តែ គណបក្សប្រជាជនកម្ពុជាអះអាងថា ចាំដល់ពេលអង្គុយទល់មុខគ្នាសិនទើបជជែកគ្នាអំពីរបៀបវារៈ។ យ៉ាងណាក៏ដោយ គណបក្សទាំងពីរហាក់ដូចជាបន្ទន់ឥរិយាបថដាក់គ្នាបន្តិចរយៈពេលចុងក្រោយនេះដោយមិនបង្ហាញជំហរដាច់ណាត់ទាក់ទងនឹងរបៀបវារៈដែលត្រូវជជែកគ្នាដូចកាលពីមុនទៀតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ