ពលរដ្ឋខ្មែរអាមេរិក ស្នើសភាអាមេរិកដាក់ទណ្ឌកម្មសេដ្ឋកិច្ចលើរដ្ឋាភិបាលកម្ពុជា
នៅថ្ងៃទី១០ ខែមិថុនា ពលរដ្ឋខ្មែរអាមេរិកាំងបានធ្វើបាតុកម្មនៅទឹកដីសហរដ្ឋអាមេរិក ស្នើសុំឲ្យរដ្ឋសភាអាមេរិក ដាក់ទណ្ឌកម្មសេដ្ឋកិច្ចលើរដ្ឋាភិបាលលោក ហ៊ុន សែន បើមិនដោះលែងអ្នកទោសនយោបាយ និងអ្នកការពារសិទ្ធិមនុស្ស។ ការធ្វើបាតុកម្មនេះ បានធ្វើឡើងក្រោយពីស្ថានការណ៍នយោបាយកម្ពុជាត្រូវបានគេមើលឃើញថាស្ថិតក្នុងភាពអាក្រក់ ក្រោយពីមានការចាប់ខ្លួនអ្នកការពារសិទ្ធិមនុស្ស និងមន្ត្រីជាន់ខ្ពស់គណបក្សប្រឆាំង។
ចុះផ្សាយនៅថ្ងៃ៖
ស្តាប់ - ០២:៤៤
នៅថ្ងៃទី១០ ខែមិថុនា ពលរដ្ឋខ្មែរអាមេរិកាំងជាច្រើនរយអ្នកបានចូលរួមធ្វើបាតុកម្មនៅតាមរដ្ឋមួយចំនួនក្នុងទឹកដីសហរដ្ឋអាមេរិក ដូចជាសហគមន៍ខ្មែរនៅ រដ្ឋកាលីហ្វូនា រដ្ឋវ៉ាស៊ីងតុន រដ្ឋម៉ាស្សាជូសេត្ត និងនៅវ៉ាស៊ីងតុនឌីស៊ី។ ជាបាតុកម្ម ដែលរៀបចំដោយសម្ព័ន្ធមិត្តខ្មែរ-អាមេរិកាំងសហការជាមួយនឹងសហគមន៍ខ្មែរទូទាំងពិភពលោក ដែលមានដូចជាខ្មែរនៅប្រទេសអូស្ត្រាលី បារាំង និងប្រទេសកាណាដា។ នេះបើតាមលោក ទូច វិបុល ប្រធានអង្គការសម្ព័ន្ធមិត្តខ្មែរ-អាមេរិកាំង ដែលបានថ្លែងពីទឹកដីសហរដ្ឋអាមេរិកប្រាប់វិទ្យុបារាំងនៅព្រឹកថ្ងៃទី១១ ខែមិថុនា។
លោក ទូច វិបុល បានបញ្ជាក់ថា ការធ្វើបាតុកម្មនៅខាងមុខវិមានសភាអាមេរិកគឺមានពលរដ្ឋខ្មែរអាមេរិកកាំងពី២០០ទៅ៣០០នាក់ ក្នុងគោលបំណងដូចគ្នានឹងពលរដ្ឋខ្មែរ ដែលកំពុងធ្វើបាតុកម្មតាមរដ្ឋផ្សេងៗ គឺស្នើសុំសភាអាមេរិកបង្កើតច្បាប់មួយដាក់ទណ្ឌកម្មផ្នែកសេដ្ឋកិច្ច និងការទូតទៅលើរដ្ឋាភិបាលកម្ពុជា រហូតទាល់តែមានការដោះលែងសកម្មជននយោបាយ មន្ត្រីការពារសិទ្ធិមនុស្ស និងសកម្មជនបក្សប្រឆាំងដទៃទៀត។
ក្រៅពីការស្នើខាងលើនេះ ក្រុមបាតុករ ក៏ស្នើឲ្យរដ្ឋសភាអាមេរិក បង្កើតក្រុមទាក់ទងកម្ពុជា ដើម្បីធានាការបោះឆ្នោតដោយសេរី និងយុតិ្តធម៌ព្រមទាំងការផ្ទេរតំណែងដោយសន្តិវិធី។
លោក ទូច វិបុលបន្ថែមថា បាតុកម្មនេះនឹងបន្តធ្វើបើមានភាពចាំបាច់ ដើម្បីឲ្យសហគមន៍អន្តរជាតិបានដឹកពីការរំលោភសិទ្ធិមនុស្សនៅក្នុងប្រទេសកម្ពុជា។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានលើកឡើងថា សកម្មភាពទាំងនោះគឺជាសេរីភាពរបស់ពលរដ្ឋខ្មែរអាមេរិក ហើយប្រជាពលរដ្ឋទាំងនោះមិនមានសិទ្ធិសម្រេចវាសនាសម្រាប់កម្ពុជាទេ។ អ្នកនាំពាក្យរូបនេះបន្ថែមថា បាតុករដែលបានធ្វើ និងកំពុងធ្វើបាតុកម្មទាំងនោះ “ល្ងង់នឹងច្បាប់របស់ខ្មែរ” គាត់ចេះតែជេរ ចេះតែប្រឆាំង។
លោកផៃ ស៊ីផាន បានហៅសកម្មភាពរបស់ពលរដ្ឋខ្មែរអាមេរិកាំង ដែលសុំឲ្យអាមេរិកដាក់ទណ្ឌកម្មលើកម្ពុជានេះ គឺជារឿងគួរឲ្យអស់សំណើចព្រោះវាកើតឡើងច្រើនដងហើយ។ លោកបញ្ជាក់ថាផលប្រយោជន៍របស់សហរដ្ឋអាមេរិក មិនដូរនឹងបាតុករ ដែលកំពុងធ្វើបាតុកម្មនៅអាមេរិកនោះទេ។
ដោយឡែកសហព័ន្ធខ្មែរនៅអូស្ត្រាលី នៅថ្ងៃទី១១ ខែមិថុនា ក៏បានចូលរួមធ្វើបាតុកម្មផងដែរ ដោយសហព័ន្ធនេះបានបញ្ជាក់ពីគោលជំហររបស់ខ្លួន គាំទ្រចលនាថ្ងៃចន្ទពណ៌ខ្មៅ និងទាមទារឲ្យរដ្ឋាភិបាលកម្ពុជាបញ្ឈប់ការរំលោភសិទ្ធិមនុស្ស។ នៅលើទឹកដីកាណាដាកាលពីថ្ងៃទី១០ មិថុនា ពលរដ្ឋខ្មែរកាណាដា ក៏បានធ្វើបាតុកម្ម ដោយស្នើសុំសភាកាណាដាពិនិត្យលើករណីសិទ្ធិមនុស្សនៅកម្ពុជាផងដែរ។ នេះបើតាមលិខិតអំពាវនាវធ្វើបាតុកម្ម ដែលដាក់ផ្សាយលើគេហទំព័រហ្វេសប៊ុករបស់សម្ព័ន្ធមិត្តខ្មែរ-អាមេរិកាំង។
សូមបញ្ជាក់ថាការធ្វើបាតុកម្មរបស់ពលរដ្ឋខ្មែរនៅអាមេរិក កាណាដា បារាំង និងអូស្ត្រាលីពេលនេះ គឺធ្វើឡើងក្រោយពីតុលាការសម្រេចឃុំខ្លួនមន្ត្រីរបស់អង្គការការពារសិទ្ធិមនុស្សកាលពីដើមខែឧសភា និងការឃុំខ្លួនអ្នកតំណាងរាស្ត្រគណបក្សប្រឆាំង ហើយថ្មីៗនេះក៏មានការប៉ុនប៉ងចាប់ខ្លួនលោកកឹម សុខាប្រធានស្តីទីគណបក្សសង្គ្រោះជាតិផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ