សាលាក្រុងបដិសេធមិនឲ្យមនុស្សពីរក្រុមដង្ហែញត្តិទៅកាន់ ACU ទេនៅថ្ងៃស្អែក
សាលារាជធានីភ្នំពេញ កាលពីម្សិលមិញបានបដិសេធមិនអនុញ្ញាតឲ្យសហគមន៍ដីធ្លីចំនួន១០ក្រុមដង្ហែញត្តិទៅកាន់អង្គភាពប្រឆាំងអំពើពុករលួយទេនៅថ្ងៃស្អែកនេះ។ ហើយនៅថ្ងៃនេះសាលារាជធានីក៏បានបដិសេធនិងក្រុមមួយទៀត ដែលជាក្រុមគាំទ្រសកម្មភាពការងាររបស់ ACUដឹកនាំដោយ លោក ប៉ាន់ខែម ប៊ុនថន នាយកប្រតិបត្តិសម័្ពន្ធយុវជនស្រឡាញ់សន្តិភាព មិនឲ្យដង្ហែញត្តិដូចគ្នានេះដែរ។
ចុះផ្សាយនៅថ្ងៃ៖
ស្តាប់ - ០២:០៣
ទោះជាមិនទទួលបានភ្លើងខៀវពីសាលារាជធានីភ្នំពេញនៅក្នុងការដង្ហែញត្តិទៅដាក់នៅអង្គភាពប្រឆាំងអំពើពុករលួយACUនៅថ្ងៃស្អែក តែជំហររបស់សហគមន៍ដីធ្លីចំនួន១០ក្រុមដែលអះអាងថា មានគ្នីគ្នាចំនួន២០០០នាក់នៅរក្សាជំហរដដែលគឺពួកគេនៅតែដង្ហែញត្តិទៅកាន់អង្គភាពប្រឆាំងអំពើពុករលួយ។
អ្នកស្រី ស ស៊ន តំណាងឲ្យពលរដ្ឋសហគមន៍បឹងកកឲ្យដឹងថា ការរក្សាជំហររបស់ពួកគាត់ក្នុងការយកញត្តិទៅដាក់នៅACUគឺដើម្បីឲ្យស្ថាប័នជាតិមួយនេះ បញ្ឈប់ការគំរាមកំហែងធ្វើទុក្ខបុកម្នេញមកលើសកម្មជនសិទ្ធិមនុស្សនិងមន្រ្តីអង្គការសង្គមស៊ីវិល តាមរយៈការចោទប្រកាន់ផ្សេងៗ។ អ្នកស្រី ស ស៊ន បន្ថែមថា អង្គការក្រៅរដ្ឋាភិបាលជួយសង្គមបានច្រើនតាមរយៈការផ្ដល់ប្រឹក្សាផ្នែកច្បាប់ឬជំនួយមនុស្សធម៌ផ្សេងទៀតដល់ពលរដ្ឋរងគ្រោះដោយសារដីធ្លី។ អ្នកស្រីក៏បានស្នើសុំបន្ថែមទៀតឲ្យACUបញ្ឈប់ការអនុវត្តច្បាប់ស្តង់ដារពីរ។
ទន្ទឹមគ្នានេះសាលារាជធានីភ្នំពេញក៏បានបដិសេធនូវគម្រោងហែញត្តិគាំទ្រសកម្មភាពការងាររបស់ACUពីសំណាក់យុវជនមួយក្រុមទៀតដែលអះអាងថា មានប្រជាពលរដ្ឋចូលរួម៥០០០នាក់ចូលរួម ដឹកនាំដោយលោក ប៉ាន់ ខែមប៊ុនថន នាយកប្រតិបត្តិសម័្ពន្ធយុវជនស្រឡាញ់សន្តិភាព។
លោក មាន ចាន់យ៉ាដា នាយករដ្ឋបាលសាលារាជធានីភ្នំពេញបានគូសបញ្ជាក់ថា ការបដិសេធរបស់សាលារាជធានីភ្នំពេញដោយសារថា នៅថ្ងៃទី០៧ឧសភាគឺចំថ្ងៃ សហភាពអឺរ៉ុបមានគម្រោងជិះកង់ដែលមានអ្នកចូលរួមប្រមាណ៤០០០នាក់។ ដែលនាំឲ្យក្បួនមានការប៉ះគ្នាបង្កទៅជាការកកស្ទះចរាចរណ៍។ និងម្យ៉ាងទៀតកាលពីថ្ងៃទី៥ឧសភា លោក ឱម យ៉ិនទៀង ប្រធានអង្គភាពប្រឆាំងអំពើពុករលួយក៏បានចូលខ្លួនមកបកស្រាយរួចហើយនៅសាលារាជធានីភ្នំពេញជុំវិញកង្វល់នានារបស់សហគមន៍ដែលមានទំនាស់ដីធ្លី។
សូមបញ្ជាក់ថា បុគ្គលិកអង្គការអាដហុកចំនួនបួនរូបរួមនិងមន្ត្រីអគ្គលេខាធិការរងមួយរូបត្រូវបានតុលាការក្រុងភ្នំពេញចោទប្រកាន់ពីបទសូកប៉ាន សាក្សី ពាក់សំណុំរឿងរបស់កញ្ញា ខុម ចាន់ដារ៉ាទី ហៅស្រីមុំដែលត្រូវបានគេចោទប្រកាន់ថា ជានារីកំណាន់របស់លោក កឹម សុខា ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ