ក្រុមការងាររួមកម្ពុជា-ថៃព្រមព្រៀងឲ្យមានការពិភាក្សាដោះមីននៅតំបន់ព្រំដែនតែគ្មានកំណត់ថ្ងៃដកទ័ព
ក្រុមការងាររួមកម្ពុជា-ថៃដែលដឹកនាំដោយនាយឧត្តមសេនីយ៍ប្រទេសទាំងពីរ បានបិទបញ្ចប់កិច្ចប្រជុំនារសៀលថ្ងៃព្រហស្បតិ៍ទី២៨មិថុនានៅទីក្រុងភ្នំពេញ។ ជាលទ្ធផលនៃកិច្ចប្រជុំ ឧត្តមសេនីយ៍ទាំងពីរ បានត្រឹមតែប្តេជ្ញារក្សាការស្ងប់ស្ងាត់នៅតំបន់ព្រំដែននិងរៀបចំឲ្យអ្នកជំនាញដោះមីនកម្ពុជានិងថៃ ជួបប្រជុំគ្នានៅសប្តាហ៍ទី៣ក្នុងខែកក្កដាដើម្បីពិភាក្សាពីការដោះមីន នៅតំបន់ព្រំដែនប្រាសាទព្រះវិហារ។ ចំណែកការដកកងទ័ពចេញពីតំបន់ព្រំដែន ដែលតុលាការឡាអេ កំណត់ជាតំបន់គ្មានកងទ័ពបណ្តោះអាសន្នគឺត្រូវអនុវត្តនៅរយៈពេល ៣០ ថ្ងៃក្រោយការដោះមីន។ តែមិនមានការកំណត់ថ្ងៃខែជាក់លាក់នៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ឧត្តមសេនីយ៍កម្ពុជា និងថៃ បានដឹកនាំក្រុមការងាររួម ជួបប្រជុំគ្នាជាលើកទី២ ចាប់តាំងពីព្រឹកថ្ងៃទី២៧មិថុនាម្សិលមិញ។ កិច្ចប្រជុំនៅវិមានសន្តិភាពក្នុងទីក្រុងភ្នំពេញ បានអូសបន្លាយ រហូតដល់យប់កណ្តាលអធ្រាត្រ ឈានចូលថ្ងៃទី២៨មិថុនា។ នៅព្រឹកមិញ ក្រុមការងាររួមកម្ពុជា-ថៃ បានបន្តកិច្ចប្រជុំ រហូតដល់ម៉ោងជាង ២ រសៀល ទើបបញ្ចប់។
លទ្ធផលនៃកិច្ចប្រជុំ ត្រូវបានលោកនាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ តំណាងឲ្យភាគីកម្ពុជា បានលើកឡើងថា ភាគីទាំងពីរ បានប្តេជ្ញាចិត្តថែរក្សានិងជំរុញសន្តិសហវិជ្ជមានយូរអង្វែងរវាងប្រជាជននៃប្រទេសទាំងពីរ និងទប់ស្កាត់សកម្មភាពអវិជ្ជមាន ដែលអាចប៉ះពាល់ដល់តំបន់គ្មានកងទ័ពបណ្តោះអាសន្ន។
លោកនាយឧត្តមសេនីយ៍ បានបន្ថែមថា ភាគីទាំងពីរ ក៏បានព្រមព្រៀងឲ្យមជ្ឈមណ្ឌលកម្ចាត់មីនកម្ពុជានិងមជ្ឈមណ្ឌលកម្ចាត់មីនថៃ ដើម្បីពិភាក្សាគ្នានៅសប្តាហ៍ទី៣ ខែកក្កដានៅទីក្រុងបាងកក អំពីវិធានការ និងផែនការដោះមីនរួមដើម្បីផ្តល់សុវត្ថិភាពដល់ក្រុមសង្កេតការណ៍រួម និងសម្រួលដល់កម្មវិធីកែសម្រួលកងទ័ព នាពេលខាងមុខ។
ពាក់ព័ន្ធនឹងការកែសម្រួលកងទ័ព លោកនាយឧត្តមសេនីយ៍ នាង ផាត បានបញ្ជាក់ផងដែរថា ការកែសម្រួលកងទ័ពនឹងត្រូវអនុវត្តក្នុងអំឡុងពេល៣០ថ្ងៃក្រោយពេលដែលការឯកភាពរបស់ក្រុមជំនាញដោះមីនកម្ពុជានិងថៃបានដោះមីន នៅក្នុងតំបន់ ដែលមានអំណោយផលសម្រាប់ការកែសម្រួលកងទ័ពបណ្តោះអាសន្ន តាមការសម្រេចរបស់តុលាការឡាអេ កាលពីថ្ងៃ១៨កក្កដា ឆ្នាំ២០១១។ ការកែសម្រួលកងទ័ព ក៏ត្រូវត្រួតពិនិត្យដោយអ្នកសង្កេតការណ៍រួម កម្ពុជាថៃ និងឥណ្ឌូនេស៊ី។
យ៉ាងណាក៏ដោយ ទាំងនាយឧត្តមសេនីយ៍កម្ពុជា និងទាំងលោកនាយឧត្តមសេនីយ៍ភាគីថៃ ក្នុងសន្និសីទកាសែត សុទ្ធតែបានអះអាងថា កិច្ចប្រជុំដែលអូសបន្លាយពេលលើសពីការគ្រោងទុកនាពេលនេះ ធ្វើឡើងដោយលក្ខណៈមិត្តភាពនិងស្និទ្ធស្នាល។ ភាគីទាំងពីរ ក៏ពេញចិត្តនឹងលទ្ធផលនៃកិច្ចប្រជុំលើកនេះផងដែរ។ កិច្ចប្រជុំក្រុមការងាររួមកម្ពុជា-ថៃ លើកទី៣ នឹងធ្វើនៅប្រទេសថៃ។
អំពីបញ្ហាកងទ័ពថៃ រាយបន្លាលួសនៅមុខប្រាសាទព្រះវិហារកាលពីថ្ងៃទី២៣មិថុនា គឺនៅប៉ុន្មានថ្ងៃមុនកិច្ចប្រជុំក្រុមការងាររួមកម្ពុជានិងថៃនៅភ្នំពេញពេលនេះ មិនត្រូវបានលោកនាយឧត្តមសេនីយ៍ តំណាងភាគីកម្ពុជា និងភាគីថៃ ឆ្លើយតបនឹងសំណួររបស់អ្នកកាសែតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ