សាលាក្រុង៖ ពលរដ្ឋខ្មែរប្តូរឥរិយាបថប្រើសេវាឡានក្រុង
ក្រោយការដាក់ឱ្យដំណើរការសេវាឡានក្រុងជាសាធារណៈ កាលពីថ្ងៃទី៥ កុម្ភៈ សាលារាជធានីភ្នំពេញ បានអះអាងថា សេវារថយន្តសាធារណៈឡានក្រុង បានទទួលការស្វាគមន៍ពីពលរដ្ឋ។ ជាអំណាងដោយលើកយកកំណើននៃពលរដ្ឋធ្វើដំណើរតាមរយៈរថយន្តក្រុង ដែលកើនឡើង ជារៀងរាល់ថ្ងៃ។ សាលារាជធានីភ្នំពេញបានសង្កត់ធ្ងន់ថា ពលរដ្ឋកម្ពុជាកំពុងផ្លាស់ប្តូរឥរិយាបថនៃការធ្វើដំណើររបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ក្នុងរយៈពេល៤ថ្ងៃនៃការសាកល្បងដំណើរការរថយន្តក្រុង អ្នកធ្វើដំណើរមានចំនួនកើនឡើង។ សាលារាជធានីភ្នំពេញ នៅថ្ងៃអាទិត្យនេះ បានបង្ហាញពីតួលេខនៃអ្នកធ្វើដំណើរថា បានកើនឡើងពី១០២៩នាក់ ទៅដល់១៩៦៥នាក់។
ថ្លែងប្រាប់វិទ្យុបារាំងអន្តរជាតិ RFIនៅល្ងាចថ្ងៃអាទិត្យនេះ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានលំអិតថា ក្នុងថ្ងៃទី៥កុម្ភៈ ដែលជាថ្ងៃសម្ពោធនៃដំណើរការដំបូងនោះ គឺមានពលរដ្ឋចំនួន ១០២៩នាក់ ចំណែកឯថ្ងៃបន្តបន្ទាប់រហូតដល់ថ្ងៃទី៨ កុម្ភៈ គឺមាន១៦៧៦នាក់ ១៧៣៦នាក់ និង ១៩៦៥នាក់។
ជាមួយទិន្នន័យបូកសរុបរយៈពេល៤ថ្ងៃដំបូងនេះ សាលាក្រុងតាមរយៈលោក ឡុង ឌីម៉ង់ បានសន្និដ្ឋានថា ពលរដ្ឋខ្មែរនៅទីក្រុងភ្នំពេញបានផ្លាស់ប្តូរឥរិយាបថដែលនិយមប្រើប្រាស់រថយន្តឯកជនផ្ទាល់ខ្លួន ងាកមកររកការប្រើប្រាស់សេវាសាធារណៈវិញ។ រថយន្តសារធារណៈដែលសាលាក្រុងភ្នំពេញ សហការជាមួយអង្គការJICAរបស់ជប៉ុននោះ គឺជាការសាកល្បងលើកទី២ហើយ បន្ទាប់ពីបរាជ័យក្នុងការសាកល្បងកាលពីកាលពីឆ្នាំ ២០០១។
ក្នុងដំណើរបណ្តាក់ជារង្វង់ ចាប់ពីម៉ោង ៥និង៣០នាទីព្រឹក រហូតដល់ ម៉ោង ៨និង៣០នាទីយប់ រថយន្តក្រុងទាំង១០គ្រឿង ត្រូវឈប់ទទួលអ្នកដំណើរនៅតាមចំណតទាំង៣៦ ចាប់ពីចំណុចរង្វង់មូលស្តាតចាស់ រហូតដល់ស្ពានច្បារអំពៅ ដែលមានរយៈចំងាយប្រហែល ៧គីឡូម៉ែត្រ។
ដើម្បីឱ្យសេវារថយន្តក្រុងសាធារណៈនេះបានជោគជ័យ អ្នកនាំពាក្យសាលារាជធានីភ្នំពេញលោកឡុង ឌីម៉ង់ បានអំពាវនាវឱ្យពលរដ្ឋទាំងអស់បន្តការគាំទ្រធ្វើដំណើរតាមរយៈរថយន្ត ក្រុងនេះជាបន្តទៀត។
សូមរំលឹកថា អភិបាលរាជធានីភ្នំពេញលោកប៉ា សុជាតិវង្ស ធ្លាប់បានបញ្ជាក់ថា ការដាក់ឱ្យដំណើរការរថយន្តក្រុងនេះ គឺដើម្បីសំរួលការកកស្ទះចរាចរណ៍ និងដើម្បីកាត់បន្ថយការចំណាយរបស់ប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ