កម្ពុជាទទួចអោយតុលាការក្រុងឡាអេបកស្រាយសាលក្រមឆ្នាំ១៩៦២
នៅថ្ងៃទី១៨មេសាម្សិលមិញ រដ្ឋមន្ត្រីការបរទេសកម្ពុជា លោកហោ ណាំហុងបានធ្វើសេចក្តីសន្និដ្ឋាននៅចំពោះមុខក្រុមប្រឹក្សាចៅក្រមនៃតុលាការយុត្តិធម៌អន្តរជាតិ ដោយទទួលអោយតុលាការមួយនេះព្រមបកស្រាយសាលក្រមឆ្នាំ១៩៦២ស្តីពីប្រាសាទព្រះវិហារ។ សម្រាប់លោកប្រមុខការទូតកម្ពុជា ការបកស្រាយច្បាស់លាស់មួយលើសាលក្រមឆ្នាំ១៩៦២នោះ នឹងអនុញ្ញាតអោយប្រទេសជិតខាងទាំងពីរអាចផ្តើមរស់នៅជាមួយគ្នាក្នុងបរិយាកាសជាមិត្តភាព សន្តិភាព និងសហប្រតិបត្តិការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
មានមូលហេតុចាំបាច់ មួយចំនួនដែលលោកឧបនាយករដ្ឋមន្ត្រីហោ ណាំហុងបានលើកឡើងនៅក្នុងសេចក្តីសន្និដ្ឋានរបស់លោក ដើម្បីទាញចំណាប់អារម្មណ៍ចៅក្រមនៃតុលាការឡាអេអោយទទួលយល់ព្រមបកស្រាយសាលក្រមឆ្នាំ១៩៦២ ដែលកម្ពុជាបានស្នើនោះ។
ក្នុងចំណោមមូលហេតុទាំងនោះ កម្ពុជាបានផ្តល់សារៈសំខាន់ទៅលើសន្តិភាព និងសន្តិសុខនៅក្នុងតំបន់។ ក្នុងនាមកម្ពុជា លោកប្រមុខការទូតកម្ពុជាបានគូសបញ្ជាក់ប្រាប់តុលាការនៃអង្គការសហប្រជាជាតិថា ប្រសិនបើគ្មានការបកស្រាយជាស្ថាពរនៃសាលក្រមឆ្នាំ១៩៦២ទេនោះ ស្ថានភាពដូចសព្វថ្ងៃនេះនឹងបង្កអោយមានភាពក្តៅក្រហាយ ហើយនឹងរារាំងមិនអោយប្រជាជាតិទាំងពីរអាចរស់នៅជាមួយគ្នាក្នុងបរិយាកាសមិត្តភាព សន្តិភាព និងសហប្រតិបត្តិការឡើយ។
នៅក្នុងសេចក្តីសន្និដ្ឋាននោះដដែល ក្នុងន័យទទូចអោយតុលាការអន្តរជាតិមួយត្រូវតែបកស្រាយសាលក្រមឆ្នាំ១៩៦២ លោកហោ ណាំហុងក៏បានរម្លឹកឡើងវិញនូវព្រឹត្តិការណ៍ផ្ទុះអាវុធក្នុងពេលកន្លងមក ដែលបានធ្វើអោយមនុស្សស្លាប់និងរបួស និងការជម្លៀសប្រជាជនទៀតផង។ ការផ្ទុះអាវុធដែលកើតចេញពីដើមចមនៃការទាមទារកាន់កាប់ដឹកដីជុំវិញប្រាសាទព្រះវិហារ ហើយថាហេតុដូចនេះហើយបានជាកម្ពុជាត្រូវស្នើអោយតុលាការយុត្តិធម៌អន្តរជាតិបកស្រាយសេចក្តីសម្រេចរបស់ខ្លួនឡើងវិញនោះ។
គួរបញ្ជាក់ផងដែរថាលោកហោ ណាំហុងមិនបានភ្លេចរម្លឹកសេចក្តីសម្រេចរបស់តុលាការឡាអេក្នុងឆ្នាំ១៩៦២ដែលប្រកាសថា ប្រសាទព្រះវិហារស្ថិតនៅលើដែនដីក្រោមអធិបតេយ្យភាពរបស់កម្ពុជា ដែលតាមផ្លូវច្បាប់គឺមានន័យថា ប្រាសាទព្រះវិហារស្ថិតនៅលើទឹកដីកម្ពុជាពីបន្ទាត់ព្រំដែនដែលកំណត់ដោយផែនទីឧបសម្ព័ន្ធ១ ដែលតុលាការអន្តរជាតិនេះបានយកមកធ្វើជាមូលដ្ឋាននោះ។
នីតិវិធីចុងក្រោយនៃការធ្វើអំណះអំណាងរវាងភាគីកម្ពុជា និងថៃបានមកដល់ថ្ងៃបញ្ចប់ហើយ។ កម្ពុជានៅសង្ឃឹមថា តុលាការនឹងបកស្រាយសាលក្រមឆ្នាំ១៩៦២ដូចការស្នើសុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ