សម្តេចឳ«ព្រះបិតាជាតិ»ដែលកប់ជ្រៅទៅក្នុងអារម្មណ៍ប្រជាពលរដ្ឋខ្មែរ
ចុះផ្សាយនៅថ្ងៃ៖
ស្តាប់ - ០៥:០០
ព្រះរាជពិធីដង្ហែព្រះបរមអដ្ឋិសម្តេចឪ សម្តេចតា ព្រះបរមរតនកោដ្ឋដែលប្រព្រឹត្តទៅពីថ្ងៃទី១០ដល់១២ កក្កដានេះគឺជាពេលវេលាដែលបង្ហាញឲ្យឃើញជាថ្មីអំពីប្រជាប្រិយភាពគ្មានគូប្រៀបរបស់ព្រះអង្គនៅក្នុងអារម្មណ៍ប្រជារាស្ត្រខ្មែរ។ ក្តីរន្ធត់ក្រៀមក្រំរបស់ប្រជារាស្ត្រខ្មែរបានបង្ហាញច្បាស់រួចហើយពេលព្រះអង្គសោយទិវង្គតកាលពីថ្ងៃទី១៥តុលាឆ្នាំ ២០១២។ តើហេតុអ្វីបានជាសម្តេចឳ នរោត្តម សីហនុ ទទួលបានការគោរព ស្រឡាញ់យ៉ាងខ្លាំងពីសំណាក់ប្រជារាស្ត្រខ្មែររហូតដល់ចាត់ទុកព្រះអង្គជា«ព្រះបិតាជាតិ»?
ពាក្យថា«សម្តេចឳ»ដែលប្រជារាស្ត្រខ្មែរគ្រប់គ្នាបានប្រើសម្រាប់ហៅអង្គអតីតព្រះមហាក្សត្រ បានបង្ហាញរួចជាស្រេចអំពីការគោរពស្រឡាញ់យ៉ាងជ្រាលជ្រៅរបស់ពួកគេចំពោះព្រះអង្គ។ នៅក្នុងអារម្មណ៍របស់ប្រជាពលរដ្ឋខ្មែរជាទូទៅ ជាពិសេសមនុស្សវ័យចំណាស់ដែលធ្លាប់បានឆ្លងកាត់របបសង្គមរាស្ត្រនិយម ការគោរពស្រឡាញ់ចំពោះព្រះបរមរតនកោដ្ឋមានសភាពជ្រាលជ្រៅដែលពិបាកពិពណ៌នា។
ជាក់ស្តែង មានប្រជាពលរដ្ឋខ្មែរជាច្រើនបានចាត់ទុកថាខ្លួនមានសំណាងក្នុងជីវិតពេលបានចាប់ព្រះហស្តផ្ទាល់របស់ព្រះអង្គ។ ក្រៅពីនោះ មានពលរដ្ឋខ្មែរជាច្រើនទៀតបានចាត់ទុកព្រះឆាយាល័ក្ខណ៍របស់ព្រះសម្តេចឪប្រៀបដូចជាវត្ថុជាទី«សក្ការៈ»អ៊ីចឹង។ សម្រាប់ប្រជារាស្ត្រខ្មែរជាទូទៅ អង្គសម្តេចឳគឺជាអតីតក្សត្រ និងជាអតីតអ្នកនយោបាយដែលប្រកបដោយទេពកោសល្យគ្មានគូប្រៀប។
ជាការពិត អង្គសម្តេចឳមិនមែនគ្រាន់តែទទួលបានប្រជាប្រិយភាពខ្លាំងពិបាករកគូប្រៀបនៅក្នុងឆាកនយោបាយកម្ពុជាប៉ុណ្ណោះទេ តែព្រះអង្គក៏ធ្លាប់ជាអ្នកនយោបាយដ៏វ័យឆ្លាតខាងការទូតដែលគេទទួលស្គាល់នៅក្នុងឆាកអន្តរជាតិទៀតផង។ ចំណុចខ្លាំងរបស់ព្រះអង្គមានច្រើនណាស់ដែលគេពិបាករៀបរាប់ឲ្យអស់សេចក្តី។ ប៉ុន្តែ អ្វីដែលគួរកត់សម្គាល់នោះគឺ ភាពសាមញ្ញរាក់ទាក់បូកផ្សំជាមួយនឹងទេពកោសល្យនយោបាយដ៏ប៉ិនប្រសប់ដែលពិបាកនឹងមានអ្នកណាអាចធ្វើបាន។
ព្រះអង្គបានផ្សារភ្ជាប់ព្រះកាយទៅនឹងជីវភាពរបស់ប្រជារាស្ត្រ និងអាចសម្របខ្លួនជាមួយកសិករ កម្មករ ឬកម្លាំងប្រដាប់ តាមរយៈការចូលប្រឡូកក្នុងជីវិតជាក់ស្តែងជាមួយអ្នកទាំងនោះយ៉ាងពិត។ នេះជាអ្វីដែលអ្នកនយោបាយភាគច្រើនតែងមើលរំលងឬក៏ពិបាកនឹងធ្វើបាន។ ជាទូទៅ ក្នុងសង្គមខ្មែរ គេច្រើនសង្កេតឃើញមានអ្នកនយោបាយពីរប្រភេទគឺ ទី១ ជាអ្នកនយោបាយចេញពីត្រកូលខ្ពង់ខ្ពស់ដែលមិនសូវស្គាល់ការលំបាក។ ម្លោះហើយពួកគេមិនបានដឹងពីសុខទុក្ខរបស់ពលរដ្ឋសាមញ្ញថាយ៉ាងណានោះទេ។ ម្យ៉ាងទៀត អ្នកនយោបាយប្រភេទនេះច្រើនតែមិនសូវចេះសម្របខ្លួនទៅនឹងជីវភាពក្រលំបាករបស់ប្រជាពលរដ្ឋក្រីក្រនោះទេ។
ចំណែកអ្នកនយោបាយប្រភេទទី២វិញគឺ ជាអ្នកដែលចេញពីត្រកូលអ្នកក្រីក្រសោះ ប៉ុន្តែ នៅពេលបានឡើងធ្វើធំក៏ឈ្លក់វង្វេងនឹងបុណ្យស័ក្តិហើយក៏ភ្លេច«ជាតិកំណើត»របស់ខ្លួនក៏មាន។ ប៉ុន្តែ សម្រាប់អតីតព្រះមហាក្សត្រខ្មែរ សម្តេឪ នរោត្តម សីហនុ វិញ ព្រះអង្គបានចាត់ទុកការផ្សារភ្ជាប់ខ្លួនជាមួយប្រជាពលរដ្ឋគឺជាស្នូលនៃព្រះរាជកិច្ចរបស់ព្រះអង្គ។ ក្នុងន័យនេះ ព្រះអង្គបានចាប់យកការងារសង្គមកិច្ចធ្វើជាស្នូល។ នេះគឺជាទស្សនៈវិជ្ជាដ៏មានតម្លៃដែលសម្តេចឳបានបង្ហាញឲ្យឃើញនិងជាគំរូសម្រាប់អ្នកនយោបាយស្រករក្រោយរៀនសូត្រតាម។
ក្រៅពីនោះនៅមានចំណុចពិសេសៗជាច្រើនទៀតដែលអង្គសម្តេចឳបានបង្ហាញឲ្យឃើញក្រោមការដឹកនាំរបស់ព្រះអង្គ។ ជាក់ស្តែង ព្រះអង្គបានបំពេញព្រះរាជបូជនីយកិច្ចធំៗជាច្រើន ដើម្បីបុព្វហេតុជាតិនិងប្រជារាស្ត្រ ដូចជា ការទាមទារខេត្តមួយចំនួនពីប្រទេសថៃមកវិញ ការទាមទារឯករាជ្យភាពពីបារាំង និងការតតាំងជាមួយថៃរហូតឈ្នះក្ដីក្នុងសំណុំរឿងប្រាសាទព្រះវិហារនៅឯតុលាការអន្តរជាតិទីក្រុងឡាអេជាដើម។ ទាំងនេះសុទ្ធសឹងជាជោគជ័យដែលគេចាត់ទុកជាគុណសម្បត្តិធំធេងរបស់សម្តេចឳ។
ម្យ៉ាងទៀត ព្រឹត្តិការណ៍នយោបាយមួយចំនួនក្រោយពីរដ្ឋប្រហារ១៨មីនា ឆ្នាំ ១៩៧០ ដែលបានធ្វើឲ្យប្រទេសជាតិធ្លាក់ចុះជាបន្តបន្ទាប់ រហូតដល់ធ្លាក់ក្នុងវាលពិឃាតនៃរបបខ្មែរក្រហម ក៏បានធ្វើឲ្យប្រជាពលរដ្ឋខ្មែរនឹកភ្នកដល់របបសង្គមរាស្ត្រនិយមដ៏រុងរឿងក្រោមព្រះរាជកិច្ចដឹកនាំរបស់អង្គសម្តេចឳ។ សម្រាប់អ្នកដែលបានហែលឆ្លងភ្លើងសង្គ្រាមនិងមហាសោកនាដកម្មទាំងនោះ តួអង្គសម្តេចឳ គឺជាតំណាងឲ្យភាព«ភ្លឺស្វាង»របស់ប្រទេសកម្ពុជាដែលមិនអាចខ្វះបាន។ មរតកដ៏សំខាន់មួយទៀតរបស់ព្រះអង្គគឺ នយោបាយផ្សះផ្សារនិងបង្រួបបង្រួមជាតិ។ មរតកនេះមានតម្លៃខ្លាំងណាស់នៅក្នុងបរិបទនៃការបែកបាក់ជាតិដូចជាបច្ចុប្បន្ន។
សរុបមកវិញ គុណសម្បត្តិទាំងអស់នេះហើយដែលធ្វើឲ្យអតីតព្រះមហាក្សត្រ នរោត្តម សីហនុ ក្លាយជា«ព្រះបិតាជាតិ»របស់ប្រជាជាតិខ្មែរ។ ពិតណាស់ថា មានអ្នកប្រឆាំងជាមួយព្រះអង្គហើយក៏មានដែរអ្នករិះគន់ចំណុចអវិជ្ជមានមួយចំនួនរបស់សម្តេចឪ ក៏ប៉ុន្តែ សួរថា តើមានអ្នកនយោបាយខ្មែរណាអាចទាក់ទាញការគោរព ស្រឡាញ់យ៉ាងស្មោះស្ម័គ្រពីប្រជាជនគ្រប់មជ្ឈដ្ឋានដូចព្រះអង្គដែរឬទេ? បើទេ ព្រះអង្គពិតជាស័ក្តិសមនឹងទទួលព្រះកិត្តិនាមជា«ព្រះបិតាជាតិ»ដែលកប់ជ្រៅក្នុងអារម្មណ៍ពលរដ្ឋខ្មែរយ៉ាងពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ