ស្ថានការណ៍វឹកវរនៅទីក្រុងបាងកក មិនបានប៉ះពាល់ដល់ប្រជាពលរដ្ឋកម្ពុជានោះទេ
ចាប់តាំងពីស្ថានទូតខ្មែរប្រចាំនៅទីក្រុងបាងកកប្រទេសថៃ ប្រកាសទទួលទូរសព្ទរបស់ប្រជាពលរដ្ឋខ្មែរដែលរស់នៅប្រទេសថៃ ចាប់ពីថ្ងៃទី២៦ឧសភាមក ស្ថានទូតខ្មែរ បានទទួលទូរសព្ទជាច្រើន ពីសំណាក់ប្រជាពលរដ្ឋខ្មែរដែលកំពុងរស់នៅប្រទេសថៃ ប៉ុន្តែជាទូរសព្ទដែលមិនជាប់ទាក់ទងទៅនឹងបម្រាមគោចរ និងបទបញ្ជានានាដែលដាក់ដោយយោធាថៃនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
អ្នកទូរសព្ទទៅកាន់ស្ថានទូតខ្មែរប្រចាំនៅទីក្រុងបាងកកប្រទេសថៃក្នុងមួយថ្ងៃៗ មិនបាននិយាយពីបញ្ហាដែលពួកគេបានជួបប្រទះ ឬគ្រោះអាសន្នបន្ទាន់ណាមួយ ដែលកើតចេញពីការដាក់បម្រាមគោចរ និងបទបញ្ជារបស់យោធាថៃ ចាប់តាំងពីថ្ងៃរដ្ឋប្រហារយោធានោះទេ។ អ្នកហៅទូរសព្ទចូលទាំងអស់ដែលជាពលរដ្ឋខ្មែររស់នៅនិងធ្វើការនៅប្រទេសថៃ គឺបានរៀបរាប់តែពីទុក្ខលំបាករបស់ពួកគេ ទាក់ទងទៅនឹងទីកន្លែងការងារ ឬការស្នាក់នៅរបស់ពលករខ្មែរនៅក្នុងប្រទេសថៃប៉ុណ្ណោះ។ នេះបើតាមការបញ្ជាក់ពីលោក កុយ គួង អ្នកនាំពាក្យក្រសួងការបរទេសកម្ពុជាដែលបានប្រាប់វិទ្យុបារាំងអន្តរជាតិនៅថ្ងៃសុក្រនេះ។
លោក កុយ គួង បានបញ្ជាក់ថា ចាប់ពីថ្ងៃទី២៦ឧសភា ជាថ្ងៃដែលស្ថានទូតខ្មែរប្រចាំនៅទីក្រុងបាងកក បានប្រកាសលេខទូរសព្ទ៣ខ្សែដើម្បីឲ្យប្រជាពលរដ្ឋខ្មែរ ទាក់ទងមកកាន់ស្ថានទូតខ្មែរជាបន្ទាន់ ប្រសិនបើពួកគេមានបញ្ហា ប៉ុន្តែ មិនមានប្រជាពលរដ្ឋខ្មែរណាមួយទទួលរងគ្រោះ រឺមានបញ្ហាទាក់ទងនឹងបំរាមគោចរ និងបទបញ្ជាផ្សេងៗរបស់យោធាថៃនោះទេ។
ស្ថានភាពនយោបាយនៅក្នុងទីក្រុងបាងកកប្រទេសថៃ ហាក់បានធូរស្រាលបន្តិចនៅថ្ងៃសុក្រនេះ ក្រោយពីរដ្ឋាភិបាលយោធារបស់លោក ប្រាយុទ្ធ ចាន់អូចា បានសម្រេចដោះលែងអ្នកនយោបាយសំខាន់ៗជាបន្តបន្ទាប់ ក្រោយពីពួកគេត្រូវបានឃាត់ខ្លួនក្នុងអំឡុងពេលនៃរដ្ឋប្រហារយោធាតាំងពីថ្ងៃទី២២ឧសភាមកនោះ។ ស្ថានភាពនេះ ក៏បានបង្កលក្ខណៈងាយស្រួលដល់ទំនាក់ទំនងរវាងប្រជាជននៃប្រទេសកម្ពុជា-ថៃផងដែរ។ នេះបើតាមការបញ្ជាក់ពីលោក គោ ស៊ុំសារឿត អភិបាលខេត្តបន្ទាយមានជ័យ។
ប៉ុន្តែយ៉ាងណាក៏ដោយ លោក គោ ស៊ុំសារឿត បានបញ្ជាក់ថា នៅច្រកទ្វារអន្តរជាតិប៉ោយប៉ែត ភាគីថៃមិនទាន់បន្ធូការរឹតបន្តឺងសន្តិសុខនៅឡើយទេ។ ប៉ុន្តែជាមួយគ្នានេះ ភាគីថៃបានសន្យាថា ចាប់ពីថ្ងៃចន្ទដើមសប្តាហ៍ក្រោយនេះទៅ ស្ថានភាពនៅតាមច្រកព្រំដែនអាចនឹងធូរស្រាលជាងនេះ។
បើតាមការបញ្ជាក់ពីលោកអភិបាលខេត្ត ការដោះដូរទំនិញនៅច្រកទ្វារអន្តរជាតិប៉ោយប៉ែតបានថយចុះ ហើយចំនួនអ្នកចូលទៅទិញឥវ៉ាន់នៅក្នុងផ្សាររោងគ្លឿប្រទេសថៃ ក៍បានថយចុះប្រមាណពី៧០ទៅ៨០ភាគរយផងដែរ ក្នុងរយៈពេលដែលភាគីថៃ កំពុងវឹកវរដោយសារតែរដ្ឋប្រហារយោធាថៃចាប់ពីថ្ងៃទី២២ឧសភាមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ