ថៃហាមឃាត់រថយន្តខ្មែរមិនឲ្យចូលទឹកដីខ្លួនខណៈច្រករបៀងនានានៅបន្តបិទនៅឡើយ
គិតមកដល់ថ្ងៃអាទិត្យទី២៥ ឧសភា នេះ អាជ្ញាធរថៃនៅតែបន្តបិទច្រករបៀងនានានៅតាមបណ្តោយព្រំដែនជាមួយកម្ពុជានៅឡើយ។ ការបិទច្រករបៀងដោយឯកតោភាគីរបស់ថៃនេះបានធ្វើឡើងក្រោយពេលដែលកងទ័ពថៃប្រកាសធ្វើរដ្ឋប្រហារគ្រប់គ្រងអំណាចកាលពីថ្ងៃព្រហស្បតិ៍។ យ៉ាងណាក៏ដោយ ច្រកទ្វារអន្តរជាតិធំៗរវាងកម្ពុជា និង ថៃនៅបើកដំណើរជាធម្មតា ប៉ុន្តែអាជ្ញាធរថៃបានហាមមិនឲ្យរថយន្តខ្មែរ ជាពិសេសរថយន្តឯកជនចូលក្នុងទឹកដីខ្លួនដូចពេលមុននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
បួនថ្ងៃមកហើយគិតមកដល់ថ្ងៃអាទិត្យនេះដែលភាគីថៃនៅតែបន្តបិទច្រករបៀងនានានៅតាមបណ្តោយព្រំដែនជាមួយកម្ពុជា។បើទោះបីមានការបិទច្រករបៀងក៏ដោយ ប៉ុន្តែច្រកអន្តរជាតិសំខាន់នៅតែបន្តបើកដំណើរការជាធម្មតា ហើយទំនាក់ទំនងតាមច្រកទ្វារនោះទៀតសោតក៏នៅតែមានភាពល្អដដែល។ក៏ប៉ុន្តែអាជ្ញាធរថៃបានរឹតបន្តឹងលើរថយន្តខ្មែរដែលធ្លាប់តែចេញចូលនៅក្នុងប្រទេសថៃនាពេលកន្លងមក។
លោក គោស៊ុំ សារឿត អភិបាលខេត្តបន្ទាយមានជ័យបានប្រាប់វិទ្យុបារាំងអន្តរជាតិRFIនៅព្រឹកថ្ងៃអាទិត្យនេះថា អាជ្ញាធរថៃបានហាមឃាត់មិនឲ្យរថយន្តឯកជនខ្មែរឆ្លងចូលក្នុងទឹកថៃដូចមុននោះទេ បើទោះបីច្រកទ្វារអន្តរជាតិសំខាន់ៗបានបន្តដំណើរការជាធម្មតាដ៏ដោយ។
លោក គោស៊ុំ សារឿតបានបញ្ជាក់ថា បើទោះបីកងទាហានថៃគ្រប់គ្រងប្រទេសនិងកំពុងគ្រប់គ្រងតាមច្រកព្រំដែននានាក៏ដោយ ក៏ប៉ុន្តែមន្ត្រីព្រំដែនកម្ពុជា និង ថៃនៅតែជួបប្រជុំពិភាក្សាគ្នាលើបញ្ហាមួយចំនួនដដែល។
ដោយឡែកចំពោះ ស្ថានភាពយោធារវាងកម្ពុជា និងថៃនៅតាមបណ្តោយព្រំដែនក៏នៅតែមានភាពស្ងប់ស្ងាត់ ទំនាក់ទំនងល្អនិង គ្មានបញ្ហាអ្វីនឹងគ្នានោះឡើយ។នេះបើតាមលោកឧត្តមសេនីយ៍ឯកស្រី ឌឹក មេបញ្ជាការកងពលធំលេខ៣ប្រចាំតំបន់ប្រាសាទព្រះវិហារដែលបានបញ្ជាក់ប្រាប់វិទ្យុបារាំងអន្តរជាតិតាមខ្សែទូរស័ព្ទនៅព្រឹកថ្ងៃអាទិត្យនេះ។
សូមបញ្ជាក់ថា ភ្លាមៗក្រោយពីកងទ័ពថៃបានប្រកាសធ្វើរដ្ឋប្រហារដណ្តើមអំណាចគ្រប់គ្រងប្រទេសនោះ រដ្ឋាភិបាលកម្ពុជា បានចេញបទបញ្ជាទៅកាន់មេបញ្ជាការកងទ័ព មេប៉ូលិស និងអាជ្ញាធរជាប់ព្រំដែនកម្ពុជា-ថៃទាំងអស់ ត្រូវណែនាំដល់កងកម្លាំងកម្ពុជា ដែលឈរជើងតាមព្រំដែនជាមួយថៃ ត្រូវបន្តបង្កើនទំនាក់ទំនងល្អ និងមិនត្រូវធ្វើការចល័តកម្លាំងតាមព្រំដែនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ