នាយករដ្ឋមន្ត្រីថៃ បញ្ចប់ដំណើរទស្សនកិច្ចពីរថ្ងៃនៅកម្ពុជា ជាមួយនឹងលទ្ធផលតិចតួច
នាយករដ្ឋមន្ត្រីថៃ លោកប្រាយុទ្ធ ចាន់អូចា រួមទាំងគណៈប្រតិភូថៃ នឹងចាកចេញពីប្រទេសកម្ពុជា នៅរសៀលម៉ោង២និង៤០នាទីថ្ងៃទី៣១តុលានេះ បន្ទាប់ពីលោកបានបញ្ចប់ដំណើរទស្សនកិច្ចរយៈពេលពីរថ្ងៃនៅកម្ពុជា។ ក្នុងអំឡុងពេលបំពេញទស្សនកិច្ចនៅកម្ពុជា នាយករដ្ឋមន្ត្រីថៃ បានជួបជាមួយនាយករដ្ឋមន្ត្រីកម្ពុជា លោក ហ៊ុន សែន និងបានចូលក្រាបបង្គំគាល់ព្រះមហាក្សត្រ និងអញ្ជើញទៅបំពាក់កំរងផ្កា និងគោរពព្រះបរមរូប ព្រះបរមរតនកោដ្ឋផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
នៅថ្ងៃចុងក្រោយនៃដំណើរទស្សនកិច្ចរយៈពេល២ថ្ងៃនៅកម្ពុជា លោកប្រាយុទ្ធ ចាន់អូចា បានចំណាយពេល១០នាទី ដើម្បីអញ្ជើញទៅគោរពវិញ្ញាណក្ខ័ន្ធ និងដាក់កំរងផ្កានៅឯវិមានឯករាជ្យ នៅប្រមាណជាម៉ោង៩ និង៣០នាទីព្រឹកថ្ងៃទី៣១តុលា ហើយនៅប្រមាណជាម៉ោង៩និង៤០នាទី នាយករដ្ឋមន្ត្រីថៃរូបនេះ ក៏បានបន្តដំណើរទៅគោរពព្រះវិញ្ញាណក្ខ័ន្ធ និងព្រះបរមរូប ព្រះបរមរតនកោដ្ឋ ដែលស្ថិតនៅប៉ែកខាងកើតនៃវិមានឯករាជ្យថែមទៀត។ មិនតែប៉ុណ្ណោះ ប្រមុខរដ្ឋាភិបាលថៃ ដែលជាអតីតមេយោធាថៃរូបនេះ ក៍បានអញ្ជើញទៅទស្សនាសារមន្ទីរជាតិ ដែលស្ថិតនៅប៉ែកខាងជើងនៃព្រះបរមរាជវាំង មុនពេលលោកបានធ្វើដំណើរទៅជួបជុំជាមួយមន្ត្រីស្ថានទូតថៃប្រចាំនៅកម្ពុជា។
លោកប្រាយុទ្ធ ចាន់អូចា បានបញ្ចប់ដំណើរទស្សនកិច្ចរយៈពេល២ថ្ងៃនៅកម្ពុជា នៅរសៀលថ្ងៃទី៣១តុលានេះ បន្ទាប់ពីលោកបានដាក់ជើងជាន់លើដីកម្ពុជា ជាលើកដំបូង កាលពីរសៀលថ្ងៃព្រហស្បតិ៍ ទី៣០តុលា។ លោកប្រាយុទ្ធ ចាន់អូចា បានចាត់ទុកថា នេះគឺជាដំណើរទស្សនកិច្ច ប្រវត្តិសាស្ត្រមួយរបស់លោក នៅកម្ពុជា និងបានជួបជាមួយលោកនាយករដ្ឋមន្ត្រី ហ៊ុន សែន ដែលលោកបានចាត់ទុកថា ជាអ្នកនយោបាយជើងចាស់។ ប៉ុន្តែសំរាប់អ្នកតាមដានព្រឹត្តិការណ៍នយោបាយនៅកម្ពុជា គេបានមើលឃើញថា ដំណើរទស្សនកិច្ចនេះ ហាក់ទទួលបានផលតិចតួចប៉ុណ្ណោះ។
លោក ឡៅ ម៉ុងហៃ អ្នកវិភាគព្រឹត្តិការណ៍នយោបាយកម្ពុជា បានថ្លែងថា ដំណើរទស្សនកិច្ចរបស់អតីតមេដឹកនាំយោធាថៃរូបនេះ បានផ្តោតជាសំខាន់តែទៅលើបញ្ហាសេដ្ឋកិច្ច និងកិច្ចសហប្រតិបត្តិការ នៅតាមព្រំដែនប៉ុណ្ណោះ ក៍ប៉ុន្តែការអនុវត្តសាលដីការរបស់តុលាការយុត្តិធម៌អន្តរជាតិ ស្តីពីប្រាសាទព្រះវិហារ និងការបែងចែក តំបន់ត្រួតស៊ីគ្នា នៅព្រំដែនសមុទ្រ ដែលជាបញ្ហាសំខាន់នោះ មិនត្រូវបានលើកឡើងនោះទេ។
សូមបញ្ជាក់ថា នៅក្នុងដំណើរទស្សនកិច្ចរយៈពេល២ថ្ងៃនៅកម្ពុជា លោក ប្រាយុទ្ធ ចាន់អូចា ក៏បានចូលក្រាបបង្គំគាល់ព្រះករុណា ព្រះបាទសម្តេចព្រះបរមនាថ នរោត្តម សីហមុនី និងបានជួបពិភាក្សាជាមួយលោកនាយករដ្ឋមន្ត្រី ហ៊ុន សែន នៅឯវិមានសន្តិភាព និងបានធ្វើជាអធិបតីក្នុងពិធីចុះហត្ថលេខាលើកិច្ចព្រមព្រៀងចំនួនបី ស្តីពី កិច្ចសហប្រតិបត្តិការលើវិស័យទេសចរណ៍, កិច្ចសហប្រតិបត្តិការទ្វេភាគី លើការលុបបំបាត់ការជួញដូរមនុស្ស និងការពារជនរងគ្រោះពីការជួញដូរ និងកិច្ចព្រមព្រៀងស្តីពី ការតភ្ជាប់ផ្លូវដែកដែលតភ្ជាប់ពីខេត្តអារញ្ញប្រាថេតប្រទេសថៃ មកកាន់ក្រុងប៉ោយប៉ែត និងឆ្ពោះមករាជធានីភ្នំពេញ។ ក្រៅពីនោះ ភាគីទាំងពីរក៏បានលើកឡើងផងដែរ ពីបញ្ហាពលករខ្មែរខុសច្បាប់ បញ្ហាពលរដ្ឋខ្មែរឆ្លងដែនទៅកាប់ឈើនៅក្នុងប្រទេសថៃ និងការបើកច្រកព្រំដែនថ្មីចំនួន៤ នៅខេត្តព្រះវិហារ ពោធិ៍សាត់ បាត់ដំបង និងខេត្តឧត្តរមានជ័យជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ