ក្រុមសហជីពផ្តើមបោះពុម្ពខិតប័ណ្ណអំពាវនាវឲ្យកម្មករធ្វើមហាកូដកម្ម
ដើម្បីឈានទៅរៀបចំមហាកូដកម្មនៅពាក់កណ្តាលខែមីនា សហព័ន្ធសហជីព៨និងសមាគមជាច្រើនទៀតបានផ្តើមបោះពុម្ពខិតប័ណ្ណអំពាវនាវឲ្យកម្មកររោងចក្រកាត់ដេរត្រៀមចូលរួមកូដកម្ម។ ខិតប័ណ្ណទាំងនោះនឹងត្រូវចែកផ្សាយចាប់ពីដើមសប្តាហ៍ក្រោយតទៅ។ មុននឹងឈានដល់មហាកូដកម្ម ក្រុមសហជីពទាំងនោះនឹងអំពាវនាវឲ្យកម្មករពហិការមិនធ្វើការបន្ថែមម៉ោង និងចូលរួមវេទិកាសាធារណៈនៅទីលានប្រជាធិបតេយ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ដូចការគ្រោងទុក ក្រុមសហព័ន្ធសហជីពចំនួន៨និងសមាគមមួយចំនួនទៀតកំពុងផ្តើមសកម្មភាពរបស់ខ្លួនឆ្ពោះទៅមហាកូដកម្មកម្មករទូទាំងប្រទេសនៅពាក់កណ្តាលខែមីនាខាងមុខ។ លោក អាត់ ធន់ ប្រធានសហភាពការងារកម្ពុជាបានប្រាប់វិទ្យុបារាំងអន្តរជាតិនៅថ្ងៃសៅរ៍នេះថា ខិតប័ណ្ណដើម្បីផ្សព្វផ្សាយព័ត៌មានបានចូលដល់រោងពុម្ពហើយ។ ខិតប័ណ្ណទាំងនោះនឹងត្រូវចែកផ្សាយដល់កម្មករនៅដើមសប្តាហ៍ក្រោយ។
កាលពីថ្ងៃទី១២កុម្ភៈ សហជីពនិងសមាគមទាំងនោះបានសម្រេចថា នឹងប្រកាសឲ្យកម្មករធ្វើកូដកម្មចាប់ពីថ្ងៃទី ១២ ដល់ថ្ងៃទី ១៩ មិនា ខាងមុខ។ កូដកម្មនេះមានគោលដៅទាមទារឲ្យដោះលែងសកម្មជនសហជីពនិងកម្មករ ២៣ នាក់ដែលអាជ្ញាធរចាប់ខ្លួន កាលពីដើមខែមករាក្នុងបាតុកម្មទាមទារដំឡើងប្រាក់ខែ ១៦០ ដុល្លារ។ អ្នកទាំងនោះត្រូវបានតុលាការសម្រេចឃុំខ្លួននៅពន្ធនាគារត្រពាំងផ្លុងក្នុងខេត្តកំពង់ចាម។ ពីរនាក់ក្នុងចំណោមនោះត្រូវបានដោះលែងឲ្យនៅក្រៅឃុំបណ្តោះអាសន្នរួចហើយ។
ដើម្បីចៀសវាងការបង្ក្រាប កម្មករដែលមានបំណងចូលរួមក្នុងកូដកម្មនេះ គ្រាន់តែផ្អាកមិនទៅធ្វើការ ហើយសំរាកនៅផ្ទះរៀងៗខ្លួនតែប៉ុណ្ណោះ។ ប៉ុន្តែមុនឈានដល់កូដកម្មនេះ សហជីពទាំងនោះនឹងអំពាវនាវឲ្យកម្មករធ្វើពិការមិនធ្វើការបន្ថែមម៉ោងចាប់ពីថ្ងៃ ថ្ងៃទី ២៤ដល់ថ្ងៃទី ២៨ កុម្ភៈ។ បន្ទាប់មកវេទិការសាធារណៈមួយគ្រោងនឹងបើកធ្វើនៅទីលានប្រជាធិបតេយ្យនៅថ្ងៃទី៨មីនា។ ការទាមទារដំឡើងប្រាក់ខែ ១៦០ ដុល្លារក៏នៅតែជាប្រធានបទសំខាន់មួយដដែល។
ប៉ុន្តែ គំរោងធ្វើកូដកម្មនេះត្រូវបានក្រុមសហព័ន្ធសហជីពដែលគាំទ្រនយោបាយរដ្ឋាភិបាលបដិសេធមិនចូលរួម។ លោកជួន មុំថុល មេដឹកនាំសហជីពម្នាក់ក្នុងចំណោមនោះធ្លាប់បានប្រាប់វិទ្យុបារាំងអន្តរជាតិថា កូដកម្មនេះធ្វើឲ្យអ្នកវិនិយោគទុនព្រួយបារម្ភ និងធ្វើឲ្យប៉ះពាល់ដល់ប្រាក់ចំណូលរបស់កម្មករ។ លោកអះអាងថាកម្មករនឹងមិនចូលរួមកូដកម្មនេះទេ។ យ៉ាងណាក៏ដោយ ក្រុមសហជីពដ៏មានឥទ្ធិពលទាំង៨អះអាងថាគំរោងកូដកម្មទ្រង់ទ្រាយធំរបស់ខ្លួននឹងមានកម្មករចូលរួមយ៉ាងច្រើនដើម្បីដាក់សម្ពាធទៅលើរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ