សហជីពការងាររៀបចំពិធីឧទ្ទិសកុសល និងប្រមូលបច្ច័យជួយកម្មករក្នុងបុព្វហេតុទាមទារប្រាក់ឈ្នួល
ដកថយពីការធ្វើបាតុកម្មទាមទារប្រាក់ឈ្នួល នៅថ្ងៃទី១២មករានេះ សហភាពការងារកម្ពុជា ដែលមានចំណុះសហជីព និងសមាគមចំនួន ៧ បានរៀបចំពិធីបង្សុកូលមួយ ដើម្បីឧទ្ទិសកុសលដល់កម្មករដែលបានស្លាប់ និងដើម្បីប្រមូលបច្ច័យជួយគ្រួសារកម្មករ និងកម្មកររងរបួសក្នុងបុព្វហេតុទាមទារប្រាក់ឈ្នួល។ នៅថ្ងៃតែមួយ សហជីពក៏បានប្រកាសជាចំហទាមទារអោយរាជរដ្ឋាភិបាល និងក្រុមហ៊ុន រៀបចំអោយមានការចរចាដំឡើងប្រាក់ឈ្នួលគោល និងអំពាវនាវអោយមានការដោះលែងកម្មករ និងសកម្មជនទាំង២៣នាក់ជាបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
មិនគ្រាន់តែជាពិធីបង្សុកូលដើម្បីឧទ្ទិសកុសលដល់អ្នកស្លាប់ក្នុងការប៉ះទង្គិចរវាងកម្មករ ជាមួយនឹងសមត្ថកិច្ច កាលពីដើមខែមករា ពិធីបែបសាសនាដែលរៀបចំឡើងនៅល្ងាចនេះ ក៏ជា ឱកាសសម្តែងការដឹងគុណដល់ វីរកម្មករដែលបានបាត់បង់ជីវិតក្នុងបុព្វហេតុទាមទារប្រាក់ឈ្នួលសមរម្យ និងប្រមូលបច្ច័យដើម្បីជួយសម្រួលជនជាប់ឃុំ ជនរងរបួស និងបន្តយុទ្ធនាការទាមទារប្រាក់ឈ្នួលសមរម្យផងដែរ។ នេះបើតាម លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានប្រាប់វិទ្យុបារាំងអន្តរជាតិ នៅថ្ងៃទី១២ មករានេះ។
ប្រធានសម្ព័ន្ធសហជីពរូបនេះ បានអោយដឹងថា ពិធីបុណ្យបង្សុកូល ដែលបានរៀបចំឡើងនៅការិយាល័យសហភាពការងារកម្ពុជា ស្ថិតក្នុងសង្កាត់បឹងទំពុន រាជធានីភ្នំពេញ មានការនិមន្តព្រះសង្ឃ និងអ្នកចូលរួមប្រមាណ ២០០នាក់ ដើម្បីឧទ្ទិសកុសលជូនវីរកម្មករដែលបានស្លាប់បាត់បង់ជីវិត កាលពីថ្ងៃទី០៣ មករា ២០១៤ នៅសួនឧស្សាហកម្មកាណាឌីយ៉ា ផ្លូវវេងស្រេង។ ក៏មានដែរ ការបង្ហាញពិពណ៌រូបថតជនរងគ្រោះ ដោយការប៉ះទង្គិចរវាងបាតុករ និងសមត្ថកិច្ច កាលពីថ្ងៃទី២ និងទី៣ មករា កន្លងទៅ នៅតំបន់សេដ្ឋកិច្ចពិសេសភ្នំពេញ ម្តុំរោងចក្រ យ៉ាកជីន នៅស្រុកកំបូល និង សួនឧស្សាហកម្មកាណាឌីយ៉ា។
បើតាមលោក អាត់ ធន់ ក្នុងថ្ងៃនេះ សហភាពការងារកម្ពុជា ក៏បានបង្កើត មូលនិធិសហភាពការងារកម្ពុជា ដើម្បីយុទ្ធនាការប្រាក់ឈ្នួលសមរម្យ ក្នុងគោលបំណង ដើម្បីជួយដល់ក្រុមគ្រួសារវីរកម្មករដែលបានស្លាប់ កម្មករដែលជាប់ពន្ធនាគារនៅកំពង់ចាម កម្មករកំពុងសម្រាកព្យាបាលរបួសនៅមន្ទីរពេទ្យ និងមួយចំណែកទៀត ដើម្បីប្រើប្រាស់ក្នុងយុទ្ធនាការទាមទារប្រាក់ឈ្នួលបន្ត។
ក្នុងថ្ងៃទី១២ មករា នេះដែរ មេដឹកនាំ តំណាងសហជីព និងសម្ព័ន្ធសហជីព ផ្នែកកាត់ដេរ និងដេរស្បែកជើងចំនួន ៨ បានចេញលិខិតចំហមួយ អំពាវនាវដល់ រាជរដ្ឋាភិបាល និងក្រុមហ៊ុន រៀបចំអោយមានការចរចាដោយស្មោះត្រង់ជាបន្ត និងយ៉ាងលឿនបំផុតតាមដែលអាចធ្វើទៅបាន ដើម្បីដំឡើងប្រាក់ឈ្នួល និងអត្ថប្រយោជន៍ផ្សេងៗ ជូនកម្មករនិយោជិត បង្កើតគណៈកម្មាធិការឯករាជ្យ ស៊ើបអង្កេតករណីបាញ់សម្លាប់កម្មករ ដោះលែងកម្មករ និងសកម្មជនសិទ្ធិមនុស្សទាំង២៣នាក់ ដោយគ្មានលក្ខខណ្ឌ ផ្តល់សំណងជម្ងឺចិត្តដល់អ្នកស្លាប់ និងរបួស បញ្ចប់បណ្ដឹង និងទទួលយកថ្នាក់ដឹកនាំសហជីព និងកម្មករអោយចូលធ្វើការងារឡើងវិញ។
លោក អាត់ ធន់ ក៏បានបញ្ជាក់ជាចុងក្រោយថា ការបន្តធ្វើបាតុកម្មទ្រង់ទ្រាយធំសាជាថ្មី គឺជាជម្រើសចុងក្រោយ ប្រសិនបើសេចក្តីពុំមានដំណោះស្រាយអោយមានសមរម្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ