ACUព្រមបើកការស៊ើបអង្កេតលើបណ្ដឹងរបស់ក្រុមយុវជនដែលប្ដឹងលោក កឹម សុខា
ដូចការគ្រោងទុក អង្គភាពប្រឆាំងអំពើពុករលួយ ACUនៅព្រឹកថ្ងៃព្រហស្បតិ៍នេះបាន បង្ហាញលទ្ធផលជាសាធារណៈនៃការធ្វើកោសល្យវិច្ច័យលើសំឡេងខ្សែអាត់របស់ លោក កឹម សុខា ។ លោកទេសរដ្ឋមន្ត្រី ឱម យ៉ិនទៀង ប្រធានACU ប្រកាសថា ការសាសងរវាងលោក កឹម សុខា និងស្រីមុំជាសំឡេងពិតប្រាកដ។ ហើយACUព្រមបើកការស៊ើបអង្កេតលើបណ្ដឹងរបស់យុវជនដែលប្ដឹងលោក កឹម សុខា ពាក់ព័ន្ធការប្រព្រឹត្តអំពើពុករលួយ។
ចុះផ្សាយនៅថ្ងៃ៖
ស្តាប់ - ០២:២១
ចំណាត់ការជាបន្តរបស់អង្គភាពប្រឆាំងអំពើពុករលួយចំពោះ លោក កឹម សុខា គឺបើកស្រោមសំបុត្រប្រកាសទ្រព្យសម្បត្តិរបស់លោក កឹម សុខា ដែលធ្លាប់មកប្រកាសទ្រព្យសម្បត្តិនៅACU បីលើករួចមកហើយ។ ACU ក៏បានតម្រូវឲ្យលោក កឹម សុខា មកប្រកាសទ្រព្យសម្បត្តិជាថ្មីម្ដងទៀត។
នីតិវិធីនៃការហែកស្រោមសំបុត្រនឹងធ្វើឡើងតាមរយៈគណៈកម្មាការមួយ របស់ACUដើម្បីចង់ដឹងពីប្រភពលុយរបស់លោក កឹម សុខា ដែលធ្លាប់ទិញឡាន ដី និង ផ្ទះជូនស្រីស្នេហ៍។ ហើយទាំងនេះក៏ជាចំណុចនៃការចង់ដឹងរបស់ ក្រុមយុវជនដឹកនាំដោយ លោក ស្រី ចំរើន ទាមទារឲ្យស្ថាប័នជាតិមួយនេះបើកការស៊ើបអង្កេត។
លោក ទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយអះអាងថា គ្មានអ្វីជាឧបសគ្គរារាំងដល់ដំណើការស៊ើបអង្កេតរបស់លោកនោះទេ។ ទោះបីជានៅពេលនេះACUកំពុងរងការរិះគន់ខ្លាំងពីអ្នកប្រើប្រាស់ហ្វេសប៊ុកក៏ដោយ។ លោក ឱម យ៉ិនទៀង បានថ្លែងការពារបណ្ដឹងរបស់យុវជនថា ធ្វើឡើងត្រឹមត្រូវតាមច្បាប់ ព្រោះសាច់រឿងលោក កឹម សុខា ពាក់ព័ន្ធសំណុំរឿងពុករលួយ ដែលស្ថិតនៅក្រោមសមត្ថកិច្ចដោះស្រាយ របស់ACU។
ហើយបើតាមគម្រោង នៅពេលACUប្រមូលភ័ស្តុតាងបានគ្រប់គ្រាន់ហើយស្ថាប័នជាតិមួយនេះ នឹងធ្វើសំណើទៅព្រះរាជអាជ្ញាដើម្បីធ្វើការចោទប្រកាន់ទៅលើ លោក កឹម សុខា។
ជាមួយគ្នានេះក្រុមអ្នកច្បាប់ ACU ក៏បានជំរុញនិងគាំទ្រនៅក្នុងដំណើការស៊ើបអង្កេតនេះដោយពួកគេយល់ថា ធ្វើឡើងស្របទៅតាមច្បាប់ដែលបានកំណត់។ នៅក្នុងដំណើការស៊ើបអង្កេតនេះលោកទេសរដ្ឋមន្ត្រី ឱម យ៉ិនទៀង អះអាងថា នឹងមិនប៉ះពាល់ដល់អភ័យឯកសិទ្ធិសភារបស់លោក កឹម សុខា ទេ។
ដោយឡែកនីតិវិធីត្រួតពិនិត្យខ្សែអាត់សំឡេងរបស់ លោក កឹម សុខា ត្រូវបានអ្នកជំនាញរបស់ ACU ធ្វើឡើងតាមរយៈ ការប្រមូលយកសំឡេងរបស់លោកកឹម សុខា នៅគ្រប់ទីកន្លែង និងសំឡេងរបស់កញ្ញាខុម ចាន់តារាទីហៅស្រីមុំដែលផ្តល់បទសម្ភាសន៍ដល់ប្រព័ន្ធផ្សព្វផ្សាយដើម្បីធ្វើការផ្ទៀងផ្ទាត់។ ហើយការផ្ទៀងផ្ទាត់នោះពិនិត្យឃើញថា ទាំងសំឡេងសន្ទនានិងសំឡេងផ្ដល់បទសំភាសន៍ជាមួយបណ្ដាសារព័ត៌មានគឺជាសំឡេងតែមួយ។
លោក អេង ឆៃអ៊ាង មន្ត្រីគណៈមជ្ឈឹមរបស់គណបក្សសង្គ្រោះជាតិ បានអះអាងថា គណបក្សមិនឆ្លើយឆ្លងអ្វីទាំងអស់ចំពោះសកម្មភាពទាំងនេះ ហើយគណបក្សទុកឱ្យមតិសាធារណៈជាអ្នកវិនិច្ឆ័យលើសកម្មភាពដែល ប្រើប្រាស់យន្តការសភា និងអង្គភាពប្រឆាំងអំពើពុករលួយមកលើគណបក្សសង្គ្រោះជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ