ក្រសួងអំពាវនាវឲ្យពលរដ្ឋផ្អាកចុះលេងទឹកនិងទទួលទានគ្រឿងសមុទ្រនៅតំបន់ប្រែពណ៌ក្នុងខេត្តកែប
ស្ថានភាពទឹកសមុទ្រក្នុងខេត្តកែបដែលបានប្រែពណ៌ខុសប្រក្រតី កាលពីប៉ុន្មានថ្ងៃមុន នៅមិនទាន់វិលទៅរកសភាពធម្មតាវិញទេ គិតត្រឹមព្រឹកថ្ងៃសៅរ៍នេះ។ ប៉ុន្តែសំណាកកករទឹកសមុទ្រដែលប្រែពណ៌និងសត្វសមុទ្រដែលងាប់នោះ ភាគីពាក់ព័ន្ធបានយកមកពិសោធន៍នៅក្រសួងបរិស្ថានហើយកាលពីយប់ថ្ងៃ ទី០១មេសា។ ដំណោះស្រាយចំពោះមុខក្រសួងបានអំពាវនាវឲ្យពលរដ្ឋផ្អាកចុះលេងទឹក និងទទួលទានគ្រឿងសមុទ្រ នៅតំបន់ទឹកប្រែពណ៌នេះមួយរយៈសិន។
ចុះផ្សាយនៅថ្ងៃ៖
ស្តាប់ - ០១:៣១
តាមការសន្និដ្ឋានជំហានដំបូងរបស់ក្រសួងបរិស្ថានទាក់ទងករណីទឹកប្រែពណ៌ក្នុងខេត្តកែបគឺអាចបណ្ដាលមកពីការកើនឡើងនូវកម្រិតជាតិស្លែសមុទ្រខុសប្រក្រតី។ ហើយស្ថានភាពនេះអាចបណ្ដាលឲ្យប៉ះពាល់ដល់សុខភាពមនុស្សនិងសត្វ។
ថ្លែងប្រាប់វិទ្យបារាំង លោក សៅ សុភាព អ្នកនាំពាក្យក្រសួងបរិស្ថាន ឲ្យដឹងថា នេះជាករណីទីមួយមិនធ្លាប់មានចំពោះស្ថានភាពទឹកសមុទ្រនៅកម្ពុជា ហើយនៅក្នុងថ្ងៃនេះក្រសួងកំពុងធ្វើការត្រួតពិនិត្យនិងរកមូលឲ្យហេតុឲ្យបានពិតប្រាកដ។ លោកសៅ សុភាព នៅមិនទាន់ហ៊ានវាយតម្លៃថា នេះករណីដែលបង្កឡើងដោយទង្វើរបស់មនុស្សនៅឡើយទេពោលគឺរងចាំលទ្ធផលផ្លូវការបង្ហាញជាសាធារណៈ។
ដោយឡែកតាមរយៈសេចក្ដីជូនដំណឹងពីមន្ទីរបរិស្ថានខេត្តកែបចុះថ្ងៃទី១មេសា ពិនិត្យឃើញថា ខ្សែទឹកនិងទិសខ្យល់មកពីទិសខាងកើតឈៀងខាងត្បូងបាននាំមកនូវកំណកកករពណ៌ក្រហមនិងបៃតង។ ក្រោយហេតុការណ៍នេះកើតឡើងមន្ទីរបរិស្ថានខេត្ត ខណ្ឌរដ្ឋបាលជលផលកែប បានចុះពិនិត្យនិងតាមដានស្ថានភាពប្រែប្រួលនៃការវិវឌ្ឍន៍គុណភាពទឹកនិងស្វែងរកប្រភពមូលហេតុ។
សូមបញ្ជាក់ថា ការប្រែពណ៌ទឹកសមុទ្របានបណ្ដាលឲ្យសត្វសមុទ្រងាប់ជាច្រើននិងនាំមកនូវក្លិនស្អុយ ឆ្អាប។ តែយ៉ាងណាក៏ដោយគិតត្រឹមថ្ងៃសៅរ៍នេះ ក្លិនស្អុយ និងឆ្អាបបានបាត់ ទៅវិញ ប្រមាណ៧០ភាគរយហើយ។
លោក សំ ពិសិទ្ឋ អភិបាលរងខេត្តកែប ឲ្យដឹងថា ស្ថានភាពទឹកសមុទ្រ មកទល់និងម៉ោង ០៦ព្រឹក ថ្ងៃទី០២ មេសា នេះមានលក្ខណៈ ល្អជាងពីម្សិលមិញ ហើយទឹកពណ៌បៃតង បានបាត់ទៅវិញស្ទើរ ទាំងស្រុង ដោយនៅ សេសសល់តិចតួច ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ