និយោជិកទទួលបានប្រាក់ឈ្នួលអប្បរមា១៤០ដុល្លារតែសហជីពនៅមិនអស់ចិត្ត
នៅទីបំផុតទៅប្រាក់ឈ្នួលអប្បរមារបស់និយោជិកក្នុងវិស័យកាត់ដេរសំលៀកបំពាក់និងដេរស្បែកជើងសម្រាប់ឆ្នាំ២០១៦ទទួលបាន១៣៥ដុល្លារ ហើយលោកនាយករដ្ឋមន្ត្រី ហ៊ុន សែន បានតម្រូវឲ្យនិយោជកផ្ដល់៥ដុល្លារបន្ថែម។ សរុបទទួលបាន១៤០ដុល្លារក្នុងមួយខែ។ ការឯកភាពលើប្រាក់ឈ្នួល១៤០ដុល្លារនេះធ្វើឡើងបន្ទាប់ពីគណៈកម្មការប្រឹក្សាការងារបោះឆ្នោតជាសម្ងាត់លើតួលេខចំនួនបីនៅថ្ងៃទី០៨ខែតុលានេះ។ សហជីពតំណាងឲ្យកម្មករនៅតែមិនពេញចិត្តនិងប្រកាន់ជំហរទាមទារ១៦០ដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ចាប់ពីខែមករាឆ្នាំ២០១៦និយោជិកនឹងទទួលបានប្រាក់ឈ្នួលអប្បរមា១៤០ដុល្លារចំពោះប្រាក់ឈ្នួលថ្មី។ លោក អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈឲ្យដឹងថា ប្រាក់ឈ្នួលអប្បរមា១៤០ដុល្លារនេះមិនប៉ះពាល់ដល់ការវិនិយោគនៅកម្ពុជានោះទេ។តែផ្ទុយទៅវិញវាអាចជាការលើកទឹកចិត្តនិងទាក់ទាញអ្នកវិនិយោគមកកម្ពុជាបន្ថែមទៀតព្រោះថាកម្ពុជានៅតែមានចំណុខ្លាំង។
លោករដ្ឋមន្ត្រីបន្ថែមថា ប្រាក់ឈ្នួល១៤០ដុល្លារបើប្រៀបធៀបជាមួយប្រទេសជិតខាងមួយ ចំនួនគឺកម្ពុជាអាចនាំមុខគេក្នុងការផ្ដល់ប្រាក់ឈ្នួលដល់កម្មករ។ លោកថា ប្រាក់ឈ្នួល១៤០ដុល្លារនឹងធ្វើឲ្យជីវភាពរស់របស់កម្មករប្រសើរជាងមុន។ ប្រសើរជាងមុនដោយតែប្រាក់ឈ្នួល១៤០ដុល្លារបូករួមនិងប្រាក់អត្ថប្រយោជន៍មានស្រាប់ដូចជា៖ប្រាក់រង្វាន់ធ្វើការទៀងទាត់១០ដុល្លារ ប្រាក់ធ្វើដំណើរ៧ដុល្លារនិងប្រាក់អតីតភាព២ដុល្លារ។
ដូច្នេះក្នុងមួយខែកម្មករទទួលបានប្រាក់ឈ្នួលអប្បរមាចន្លោះ១៥៧ទៅ១៦៨ដុល្លារ។
លោក ណាង សុធី អនុប្រធានគណៈកម្មការប្រឹក្សាការងារភាគីតំណាងនិយោជកលើកឡើងថា តួលេខ១៣៥ដុល្លារនេះគឺជាចំនួនមួយដែលថៅកែរោងចក្រទទួលយកបានដោយសារសំណើរបស់និយោជកស្នើ១៣៣.៤៨ឡើង៤ភាគរយបើប្រៀបធៀបជាមួយនិងសំណើររបស់រដ្ឋាភិបាល១៣៥ដុល្លារដែលចំនួននេះមានការកើនឡើងតែមួយដុល្លារប៉ុណ្ណោះ។ ម្យ៉ាងទៀតក៏ដោយសារតែមានការសិក្សាដោយលក្ខខណ្ឌបច្ចេកទេសច្បាស់លាស់របស់រដ្ឋាភិបាលដែលមានការគាំទ្រពីអង្គការពលកម្មអន្តរជាតិILO។
ទោះបីរដ្ឋាភិបាលនិងនិយោជកមានការឯកភាពយ៉ាងក៏ដោយតែជំហររបស់សហជីពដែលតំណាងឲ្យកម្មករនៅតែចង់បានប្រាក់ឈ្នួលអប្បរមា១៦០ដុល្លារ។ លោក អាត់ ធន់ ដែលបានចូលរួមបោះឆ្នោតជាសម្ងាត់ឲ្យដឹងថា ក្រុមសហជីពនឹងជួបប្រជុំគ្នាក្រោយពិធីបុណ្យភ្ជុំបិណ្ឌថានឹងធ្វើអ្វីបន្តទៀត។ តាមការប៉ាន់ស្មានលោកថា មានកម្មករយ៉ាងតិចក៏៦០ភាគរយមិនពេញចិត្តចំពោះប្រាក់ឈ្នួលអប្បរមា១៤០ដុល្លារនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ