ខួប១ឆ្នាំមរណភាពរបស់បណ្ឌិត កែម ឡី ពិធីបុណ្យបែបសាសនាស្ងប់ស្ងាត់នៅភ្នំពេញ តែពិធីសាសនាធំដុំនៅស្រុកកំណើត!
នៅថ្ងៃទី១០កក្កដានេះ គឺជាគម្រប់ខួបនៃឆ្នាំនៃឃាតកម្មបាញ់សម្លាប់អ្នកវិភាគនយោបាយនិងសង្គមបណ្ឌិត កែម ឡី នៅកណ្តាលក្រុងភ្នំពេញ។ នៅកន្លែងបាញ់សម្លាប់និងវត្តតម្កល់សព ការធ្វើពិធីបួងសួងរម្លឹកវិញ្ញាណក្ខន្ធ មានសភាពស្ងប់ស្ងាត់ តែមានការរៀបចំពិធីសាសនាធំដុំនៅស្រុកកំណើតរបស់លោក នៅឯខេត្តតាកែវ។
ចុះផ្សាយនៅថ្ងៃ៖
ស្តាប់ - ០៣:១៧
នៅខេត្តតាកែវ ក្នុងស្រុកត្រាំកក់ ជាស្រុកកំណើតរបស់បណ្ឌិត កែម ឡី មានការរៀបចំពិធីសាសនាសូត្រមន្តនមស្ការ និងពិធីបង្សុកូល រាប់បាតព្រះសង្ឃចំនួន៥១អង្គ ដែលស្មើនឹងអាយុរបស់លោក កែមឡី។ ពិធីនោះ មានការចូលរួមពីសំណាក់នៃអ្នកគោរពស្រឡាញ់បណ្ឌិត កែម ឡី ជាច្រើននាក់ ដែលចេញចូលប្រដាក់បន្តកន្ទុយគ្នា។
ចំណែកឯនៅភ្នំពេញ នៅវត្តចាស់ ទីដែលតម្កល់សពរបស់អ្នកវិភាគសង្គមនិងនយោបាយរូបនេះ គឺមានពិធីបុណ្យសាសនាបន្តិចបន្តួច ដោយមានព្រះសង្ឃបួនដប់អង្គ និងមនុស្សបួនដប់អ្នកចូលរួម។ អ្នកផ្តើមបុណ្យ ព្រះភិក្ខុ ប៊ុត ប៊ុនតិញ មានសង្ឃដីកាប្រាប់វិទ្យុបារាំងRFI ថា ការធ្វើពិធីតិចតួចដូច្នេះ គឺគ្រាន់ដើម្បីបង្គ្រប់កិច្ចតែប៉ុណ្ណោះ។ ដ្បិតថា វត្តចាស់នេះ គឺជាទីតម្កល់សពនិងជាកន្លែងធ្វើបុណ្យមួយរយថ្ងៃរបស់បណ្ឌិត កែម ឡី ផង។ តាមសង្ឃដីការបស់ព្រះភិក្ខុ ប៊ុត ប៊ុនតិញ គឺអ្នករៀបចំពិធីបុណ្យ ចង់គ្រាន់តែរម្លឹកវិញ្ញាណក្ខន្ធ របស់បណ្ឌិត កែម ឡី តែប៉ុណ្ណោះ មិនចង់ឲ្យមានការចម្រូងចម្រាស់ចលាចលអ្វីនោះឡើយ។
នៅភ្នំពេញដដែល តែនៅហាងស្ដារម៉ាត Star Mart នៃស្ថានីយប្រេងឥន្ធនៈកាល់តិច Caltex ក្បែរស្ដុបបូកគោ ជាទីកន្លែងឃាតករបាញ់សម្លាប់លោក កែម ឡី កាលពី១ឆ្នាំមុន គឺនៅតែមានក្រុមយុវជន មន្ត្រីសង្គមស៊ីវិល និងអ្នកអាណិតគោរពស្រឡាញ់រូបនោះ នៅតែបន្តទៅដាក់កម្រងផ្កា អុជធូបឧទ្ទិសបួងសួង។ ការដាក់កម្រងផ្កានេះ គឺស្ថិតក្រោមក្រសែភ្នែករបស់អាជ្ញាធរ និងកងកម្លាំងសន្តិសុខខណ្ឌចម្ការមន ប្រហែល៣០នាក់ ដែលបានត្រូវដាក់ពង្រាយ។
ចំពោះក្រុមអាជ្ញាធរ, តាំងពីថ្ងៃទី៩កក្កដាមក ការគោរពវិញ្ញាណក្ខន្ធដោយមានការដាក់កម្រងផ្កានិងរូបនេះ ជាសកម្មភាពខុសច្បាប់ ព្រោះគ្មានការអនុញ្ញាតពីសាលាក្រុងភ្នំពេញ។ តែប្រសិនបើសកម្មភាពនេះ មានការជូនដំណឹងមុនទៅសាលាក្រុង នោះអាជ្ញាធរនឹងជួយសម្របសម្រួល ឬការពារថែមទៀតផង។
គួរបញ្ជាក់ថា ក្រោមមរណភាពរបស់លោក កែម ឡី បានមួយឆ្នាំទៅហើយ មានមនុស្សតែម្នាក់គត់ដែលត្រូវបានកាត់ទោសឲ្យជាប់គុកអស់មួយជីវិត ខណៈដែលនៅមានការមន្ទិលសង្ស័យចំពោះដំណើរការស៊ើបអង្កេត។ ក្រុមគ្រួសារសព និងក្រុមអង្គការសង្គមស៊ីវិល ជាច្រើន នៅតែបន្តទទូចទាមទារឲ្យបើកការស៊ើបអង្កេតដោយឯករាជ្យ និងយុត្តិធម៌ ដើម្បីផ្តន្ទាទោសអ្នកពាក់ព័ន្ធផ្សេងទៀត។ បើតាមពួកគេទាំងនោះ ការស៊ើបអង្កេតឯករាជ្យជាថ្មី គឺត្រូវមានការចូលរួមពីអ្នកជំនាញអន្តរជាតិ។
ផ្ទុយពីនេះ អ្នកនាំពាក្យក្រសួងយុត្តិធម៌ បានប្រាប់កាសែតក្នុងស្រុកដែលស្និទ្ធនឹងបក្សកាន់អំណាច ដោយបញ្ជាក់ថា សំណុំរឿងឃាតកម្មនេះ កំពុងស្ថិតនៅក្នុងចំណាត់ការនិងនីតិវិធីរបស់តុលាការ។ ឃាតករ ត្រូវបានសាលាជម្រះផ្តន្ទាទោសរួចហើយ រីឯអ្នកពាក់ព័ន្ធដទៃទៀតតុលាការក៏កំពុងចំណាត់ការបន្ត។ តាមក្រសួងយុត្តិធម៌ខ្មែរ, ការស្វែងរកយុត្តិធម៌ ត្រូវតែធ្វើ និងអនុវត្តទៅតាមច្បាប់ ដោយមិនអាចធ្វើតាមចិត្តចង់នោះឡើយ។
យ៉ាងណាក៏ដោយចុះ សកម្មជនការពារសិទ្ធិមនុស្សដែលទើបត្រូវបានដោះលែងនាពេលថ្មីៗនេះ ក៏បានអំពាវនាវទៅសមត្ថកិច្ច ឲ្យពន្លឿនការស្រាវជ្រាវរកអ្នកពាក់ព័ន្ធនឹងករណីឃាតកម្មលើអ្នកវិភាគនយោបាយ បណ្ឌិត កែម ឡី យកទៅកាត់ទោសទៅតាមផ្លូវច្បាប់។ លោក យី សុខសាន្ត បានរៀបរាប់ថា មរណភាពរបស់បណ្ឌិត កែម ឡី គឺគួរឲ្យស្តាយណាស់ តែលោកបាត់បង់តែរូបកាយទេ ប៉ុន្តែកេរ្តិ៍ឈ្មោះរបស់លោក មិនសាបសូន្យនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ