អាជ្ញាធរមិនអនុញ្ញាតអោយបញ្ចាំងភាពយន្តរឿង "អ្នកណាសម្លាប់លោក ជា វិជ្ជា?"
មន្ត្រីសាលារាជធានីភ្នំពេញ និងតំណាងសហភាពសហជីពកម្ពុជារបស់លោក រ៉ុង ឈុន បាន ជួបពិភាក្សាគ្នាហើយនៅព្រឹកថ្ងៃព្រហស្បតិ៍នេះ ហើយបានសម្រេចអនុញ្ញាតអោយក្រុមសហភាពសហជីពកម្ពុជារៀបចំដង្ហែក្បួន នៅថ្ងៃទី១ឧសភា ដើម្បីប្រារព្ធទិវាពលកម្ម អន្តរជាតិលើកទី១២៤។ ប៉ុន្តែអាជ្ញាធររាជធានីមិនបានអនុញ្ញាតអោយមានការបញ្ចាំងភាពយន្តឯកសាររឿង "តើអ្នកណាសម្លាប់លោក ជា វិជ្ជា” តាមការស្នើសុំនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
ថ្នាក់ដឹកនាំសមាគមគ្រូបង្រៀនកម្ពុជាឯករាជ្យ និងសហជីពសេរីកម្មករនៃព្រះរាជាណាចក្រកម្ពុជាមិនអាចបញ្ចាំងភាពយន្តឯកសាររឿង "តើអ្នកណាសម្លាប់លោក ជា វិជ្ជា" នៅទីសាធារណៈ នៅក្នុងថ្ងៃទី១ឧសភា ទិវាពលកម្មអន្តរជាតិលើកទី១២៤បានឡើយ។ ប៉ុន្តែពួកគេអាចដង្ហែក្បួនបាននៅថ្ងៃនោះ ដូចតាមការស្នើសុំ។ នេះជាសេចក្តីសម្រេចរបស់សាលារាជធានីភ្នំពេញនៅព្រឹកថ្ងៃព្រហស្បតិ៍នេះ ក្នុងពេលដែលមានការជួបប្រជុំរវាងមន្ត្រីសាលារាជធានី និងលោក រ៉ុង ឈុន ប្រធានសហភាពសហជីពកម្ពុជា។ សហភាពសហជីពកម្ពុជាជាស្ថានប័នដែលចងក្រងដោយសមាគមគ្រូបង្រៀនកម្ពុជាឯករាជ្យ និងសហជីពសេរីកម្មករកម្ពុជា។
យោងតាមកំណត់ហេតុនៃកិច្ចប្រជុំ សាលារាជធានីបានផ្តល់មូលហេតុដែលខ្លួនមិនអនុញ្ញាតអោយមានការបញ្ចាំងភាពយន្តឯកសាររឿង "តើអ្នកណាសម្លាប់លោក ជា វិជ្ជា" នោះថា ដោយសារតែខ្សែវីដេអូនេះមិនទាន់ទទួលបានទិដ្ឋាការអនុញ្ញាតត្រឹមត្រូវពីក្រសួងពាក់ព័ន្ធ។ ដោយឡែក បើយោងតាមកំណត់ហេតុដដែល សាលារាជធានីភ្នំពេញបានអនុញ្ញាតដូចតាមការស្នើសុំ អោយសហភាពសហជីពកម្ពុជារបស់លោក រ៉ុង ឈុន និងលោក ជា មុន្នីដង្ហែរក្បួនដែលមានមនុស្សចូលរួមយ៉ាងតិច២០០នាក់ ដើម្បីដាក់ញ្ញត្តិនៅរដ្ឋសភា និងដាក់កម្រងផ្កានៅទីកន្លែងដែលលោកជា វិជ្ជាត្រូវជនមិនស្គាល់មុខបាញ់ប្រហារកាលពីឆ្នាំ២០០៤។
សេចក្តីសម្រេចរបស់សាលារាជធានីភ្នំពេញយ៉ាងនេះ នឹងត្រូវដាក់ទៅក្រសួងមហាផ្ទៃពិនិត្យបន្តទៀត។
បើតាមការអះអាងរបស់លោកឧត្តមសេនីយឯក ខៀវ សុភ័គ អ្នកនាំពាក្យក្រសួងមហាផ្ទៃ ក្រសួងមហាផ្ទៃនឹងអនុញ្ញាតអោយមានការដង្ហែក្បួនដូចរៀងរាល់ឆ្នាំ។ ប៉ុន្តែ ដូចការពន្យល់របស់សាលារាជធានីដែរ ចំពោះការស្នើសុំបញ្ចាំងភាពយន្តឯកសារ ស្តីពីឃាតកម្មលើលោក ជា វិជ្ជានោះ លោក ខៀវ សុភ័គ បានថ្លែងថា ភាពយន្តឯកសារនេះមិនមានការអនុញ្ញាតនាំចូលនោះឡើយ។
ភាពយន្តឯកសារស្តីពីឃាតកម្មលើលោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជាត្រូវបានចងក្រងដោយក្រុមផលិតករបរទេសដែលធ្លាប់រស់នៅកម្ពុជា។ ឯកសារនេះចងក្រងព្រឹត្តិការណ៍ ស្តីពីជីវិតលោក ជា វិជ្ជា រវាងពីឆ្នាំ២០០៣ដល់ឆ្នាំ២០០៨។ ហើយភាពយន្តនេះត្រូវបានបញ្ចេញកាលពីដើមឆ្នាំ២០១០នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ