បន្ទាប់ពីផ្ទុះអាវុធថៃនិងកម្ពុជាសន្យាឈប់បាញ់គ្នាទៀតហើយ
បន្ទាប់ពីកិច្ចចរចាគ្នារយៈពេលជាង១ម៉ោងនៅព្រឹកថ្ងៃទី៥កុម្ភៈនេះ មេទ័ពខ្មែរនិងថៃបានសន្យាថាឈប់ឱ្យមានការផ្ទុះអាវុធទៀតហើយ និងត្រូវរក្សាកងកម្លាំងរបស់ខ្លួនឱ្យនៅដដែលដោយហាមមិនឱ្យចល័តចុះឡើងឡើយ។ កិច្ចចរចាដែលបានធ្វើឡើងនៅឯច្រកព្រំដែនជាំក្នុងស្រុកអន្លង់វែងលើទឹកដីកម្ពុជាបានសម្រេចលទ្ធផលជាវិជ្ជមាន ប៉ុន្តែមុនពេលកិច្ចចរចាចាប់ផ្តើមកងទ័ពខ្មែរនិងថៃបានបើកឆាកប្រយុទ្ធគ្នាមួយឈុតទៀត នៅព្រឹកព្រលឹមថ្ងៃទី៥កុម្ភៈនេះនៅចំណុចសំបុកឃ្មុំនិងភ្នំទ្រព្យដដែល។ ឆាកប្រយុទ្ធដែលមានរយៈពេលជិតកន្លះម៉ោងបានបញ្ចប់ទៅវិញដោយមិនបង្កគ្រោះថ្នាក់ដល់ទាហានកម្ពុជាទេ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ ប៉ែន បូណា
ការចរចាគ្នានៅច្រកជាំ ស្រុកអន្លង់វែងបានចប់ហើយនៅវេលាថ្ងៃត្រង់ថ្ងៃទី៥កុម្ភៈនេះដោយ ភាគីទាំងពីរបានព្រមព្រៀងថាឈប់បាញ់គ្នាទៀតហើយ។ កិច្ចចរចាព្រឹកមិញបានធ្វើឡើងនៅលើខ្នងភ្នំដងរែកក្នុងទឹកដី កម្ពុជាដែលមានចម្ងាយប្រហែលមួយគីឡូម៉ែត្រពីព្រំដែន។
ភាគីកម្ពុជាដឹកនាំដោយលោកឧត្តមសេនីយ៍ទោ ជា ម៉ន មេបញ្ជាការយោធភូមិភាគ៤ និងលោកឧត្តមសេនីយ៍ទោ ស្រី ឌឹក មេបញ្ជាការកងពលធំលេខ៣ ប្រចាំការទិសព្រះវិហារ។ ចំណែកឯភាគីថៃវិញដឹកនាំដោយឧត្តមសេនីយ៍ សុវត្ថិឆៃ សាមុតសាខន មេបញ្ជាការភូមិភាគ២ និងឧត្តមសេនីយ៍ ឆៅវ៉ាលីត ឈុនប្រាក់សាន មេបញ្ជាការកងពលតូចលេខ៦។
ក្រោយពីការចរចារយៈពេលជាង១ម៉ោង ភាគីទាំងពីរបានឯកភាពគ្នាថា នឹងមិនផ្ទុះអាវុធនៅតាមជាយដែនទៀតឡើយ។ ទាក់ទងនឹងតំបន់ជម្លោះនៅសំបុកឃ្មុំ ភាគីកម្ពុជានិងថៃបានឯកភាពគ្នាថា មិនឱ្យភាគីណាមួយចូលក្នុងតំបន់សំបុកឃ្មុំឡើយ។ ក្រៅពីនោះ ការចល័តកម្លាំងយោធាចុះឡើងនៅតាមជាយដែនជាពិសេសនៅក្នុងតំបន់ ព្រះវិហារត្រូវបានហាមឃាត់ជាដាច់ខាត។ មិនត្រឹមតែនៅព្រះវិហារប៉ុណ្ណោះទេ នៅតាមបណ្តោយព្រំដែនជាទូទៅ ចាប់ពីច្រកជាំស្រុកអន្លង់វែងរហូតដល់ប្រាសាទតាមាន់ក៏ភាគី ទាំងពីរត្រូវរក្សាកម្លាំងឱ្យនៅដដែលដែរ។
ទាក់ទងនឹងការឈរជើងនៅតំបន់ព្រះវិហារ កម្ពុជានិងថៃបានព្រមព្រៀងគ្នាថាថានឹងបន្តអនុញ្ញាតឱ្យទាហាន ខ្មែរ៥នាក់និងថៃ៥នាក់បោះទីតាំងនៅតំបន់បន្លាលួសដែលជារបង ប្រាសាទព្រះវិហារ តែអ្នកទាំងនោះត្រូវស្លៀកពាក់ស៊ីវិល។ អ្នកទាំង១០នាក់នោះមានសិទ្ធិចេញចូលក្នុងតំបន់សំបុកឃ្មុំបាន។ រីឯទាហានថៃ៤នាក់ដែលកម្ពុជាចាប់បានកាលពីម្សិលមិញក៏ត្រូវបាន ប្រគល់ឱ្យទៅថៃវិញហើយដែរ។
ភាគីកម្ពុជាអះអាងថានៅចំពោះមុខភាគីថៃថា ការផ្ទុះអាវុធគឺបណ្តាលមកពីភាគីថៃជាអ្នកបង្កពីព្រោះកងទ័ពថៃ បានចល័តចូលក្នុងតំបន់សំបុកឃ្មុំដោយគ្មានការអនុញ្ញាត។ ត្រង់ចំណុចនេះគ្មានព័ត៌មានណាឱ្យដឹងពីគោលជំហរខាងភាគីថៃនៅឡើយ ទេ។ ប៉ុន្តែ នៅល្ងាចថ្ងៃទី៤កុម្ភៈម្សិលមិញ រដ្ឋមន្ត្រីការបរទេសថៃ លោកកាស៊ីត ភីរម្យ បានថ្លែងប្រាប់ក្រុមអ្នកកាសែតនៅពេលចាកចេញពីកម្ពុជាថា ភាគីទាំងពីរត្រូវពិនិត្យកន្លែងនេះដើម្បីឱ្យច្បាស់ថាតើអ្នកណា ជាអ្នកផ្ទុះអាវុធមុន។
មបញ្ជាក់ថា នៅព្រឹកមិញនេះ មុនពេលជំនួបចរចារវាងមេទ័ពកម្ពុជាថៃ ការផ្ទុះអាវុធបានកើតឡើងមួយឈុតទៀតនៅតំបន់សំបុកឃ្មុំនិងភ្នំ ទ្រព្យខណៈដែលទាហានថៃបានលបចូលក្នុងតំបន់នោះទាំងព្រឹកព្រលឹម។ ឆាកប្រយុទ្ធដែលមានរយៈពេលជិតកន្លះម៉ោងបានបញ្ចប់ទៅវិញដោយគ្មាន សេចក្តីរាយការណ៍អំពីគ្រោះថ្នាក់ទេ។តុល្យការចុងក្រោយឱ្យដឹងថាកងទ័ព និងប្រជាជនកម្ពុជាស្លាប់និងរបួសជាង១០នាក់ក្នុងហេតុការណ៍ផ្ទុះ អាវុធនៅថ្ងៃម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ