អំបែងគ្រាប់កំាភ្លើងថៃបានបំផ្លាញប្រាសាទព្រះវិហារយ៉ាងដំណំ
ជញ្ជាំងប្រាសាទព្រះវិហារកាន់ស្លែ រាប់រយឆ្នាំមានពណ៌ខ្មៅប្រផេះ បានរបេះសាច់ខ្មៅខាងក្រៅចេញ ធ្វើអោយគេមើលឃើញស្នាមពណ៌សៗ ពាសពេញប្រាសាទ ប្រៀបដូចជាខ្លួនមនុស្ស ដែលមានស្នាមដំបៅ មិនទាន់សះ ពេញដងខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អ៊ឹម ណាវិនពីភ្នំពេញ
សាច់ថ្មប្រាសាទ នៅកន្លែងខ្លះបានរបេះចេញ ទំហំប៉ុនប្រអប់ប្រេងកូឡា រីឯកន្លែងខ្លះរបេះសាច់ខ្មៅចេញ ឃើញសាច់ស មានទំហំរហូតប៉ុនចានឡូ ដូចគេយកពូថៅទៅកាប់។ ប៉ុន្តែ ស្លាកស្នាមប្រេះបែកទំាងអស់នោះមិនមែនស្នាមពូថៅកាប់នោះទេ វាគឺលទ្ធផល នៃការបាញ់ដោយគ្រាប់កំាភ្លើងរបស់ទាហានថៃ។
ជញ្ជាំងជណ្តើរប្រាសាទ ផ្នែកខាងស្តាំ ចាប់ពីគូបារ៉ាក់ទី៥ រហូតដល់គូប៉ារ៉ាក់ទី១ សុទ្ឋតែមានស្នាមរបេះ។ កន្លែងទទួលរងអំបែងគ្រាប់ច្រើនជាងគេ គឺនៅត្រង់ចំណុចគូបារ៉ាក់ទី១ ទី៣ និងទី៥។
ក្បាលនាគ នៅចន្លោះរវាងគូបារ៉ាក់ទី៥ ទៅទី៤ បានរបេះសាច់ចេញមួយចំហៀងមុខ ធ្វើអោយបាត់បង់ទម្រង់មុខសត្វនាគ។ សសរ ប្រាសាទត្រង់គូបារ៉ាក់ទី៥ បានបែកមួយចំហៀង។
កន្លែងដែលគ្រាប់កំាភ្លើងថៃធ្លាក់ផ្តាច់ជីវិត អ្នកប្រកបរបរថតរូបអោយភ្ញៀវទេសចរម្នាក់ នៅចំណុច គូបារ៉ាក់ទី៥ បានទម្លាយ កម្រាលប្រាសាទ ទៅជារណ្តៅធំប៉ុនភ្លៅមនុស្ស និងមានជម្រៅជិតមួយចំអាមដៃ។
បន្ថែមពីលើអ្វីដែលគេបានមើលឃើញមុនការប្រយុទ្ឋគ្នាយ៉ាងខ្លំាងក្លា រវាងកងទ័ពកម្ពុជា និងកងទ័ពថៃ មួយប្រាវទៀតកាលពីយប់ថ្ងៃអាទិត្យ និង ព្រឹកថ្ងៃចន្ទទី ៧ កុម្ភៈនេះ។
ភ្លាមៗក្នុងថ្ងៃចន្ទដដែលនេះ អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្រ្តី បានចេញសេចក្តី ប្រកាសព័ត៌មានជារួមថាផ្នែកខ្លះនៃប្រាសាទព្រះវិហារ ពិសេសចំណុចគូបារ៉ាក់ទី១ ទី៣ និងទី៥ ត្រូវបំផ្លាញយ៉ាងដំណំដោយអាវុធរបស់ភាគីថៃ។
អ្នកជំនាញវត្ថុបុរាណនៅកម្ពុជា កំពុងបូកសរុបពីការខូចខាត ប្រាសាទព្រះវិហារជាផ្លូវការហើយលទ្ធផលលំអិតពីការខូចខាត ប្រាសាទដែលជាបេតិកភណ្ឌពិភពលោកនេះ នឹងចេញជាផ្លូវការក្នុងពេលខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ