ការសិក្សាឡើងវិញពីលទ្ធភាពសាងសង់ទំនប់វារិអគ្គិសនីនៅដងទន្លេមេគង្គត្រូវមានលក្ខណៈស្តង់ដារ
ប្រទេសឡាវ បានព្រមព្រៀង ឲ្យមានការសិក្សាស្រាវជ្រាវជាថ្មីឡើងវិញលើផលប៉ះពាល់បរិស្ថាន ទាក់ទងនឹងគម្រោងសាងសង់ទំនប់វារីអគ្គិសនី សាយ៉ាបូរី នៅដងទន្លេមេគង្គផ្នែកក្រោម។ សេចក្តីប្រកាសដូច្នេះ ត្រូវបានធ្វើឡើង ក្រោយពីគណៈកម្មការទន្លេមេគង្គ រួមមាន កម្ពុជា ថៃ វៀតណាម និងឡាវ បានសម្រេចពន្យារពេលសាងសង់ទំនប់វារិអគ្គិសនី សាយ៉ាបូរី ក្នុងប្រទេសឡាវ កាលពីខែមុន។ ចំណែកអង្គការ ផ្នែកបរិស្ថាន WWF បានស្នើយ៉ាងទទូច ឲ្យបណ្តាក្រុមហ៊ុន ដែលមានបំណងចូលរួមដេញថ្លៃយកការសិក្សាវាយតម្លៃឡើងវិញ លើការសាងសង់ទំនប់វារិអគ្គិសនីរបស់ឡាវ ត្រូវតែបង្ហាញឆន្ទៈអនុវត្តបច្ចេកទេសសិក្សា និងវាយតម្លៃ តាមលក្ខណៈស្តង់ដារត្រឹមត្រូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ប្រទេសឡាវនឹងបង្កើតក្រុមអ្នកជំនាញ ដើម្បីធ្វើការសិក្សាជាថ្មីឡើងវិញពីផលប៉ះពាល់បរិស្ថាន ក្នុងពេលឆាប់ៗខាងមុខ ទាក់ទងនឹងគម្រោងសាងសង់ទំនប់វារិអគ្គិសនី សាយ៉ាបូរី ដែលមានតម្លៃ ៣,៨ ពាន់លានដុល្លារ។ នេះបើតាមមន្ត្រីជាន់ខ្ពស់ប្រទេសឡាវ ថ្លែងប្រាប់ទីភ្នាក់ងារព័ត៌មានបារាំង AFP។
កាសែតបានផ្សាយថា ការសិក្សាឡើងវិញលើកង្វល់នៃផលប៉ះពាល់បរិសា្ថន ចំពោះគម្រោងសាងសង់ទំនប់វារិអគ្គិសនី នៅដងទន្លេមេគង្គក្រោម ក្នុងប្រទេសឡាវ នឹងត្រូវធ្វើឡើងដោយមានការចូលរួមពីអ្នកជំនាញអន្តរជាតិ។ រីឯការចំណាយ ជាការធានារ៉ាប់រងរបស់ក្រុមហ៊ុនថៃ CH. Karnchang Public Co. ដែលទទួលសិទ្ធិក្នុងការសាងសង់ទំនប់វារិអគ្គិសនីដ៏ធំនោះ។
ក្នុងកិច្ចប្រជុំកាលពីថ្ងៃ១៩មេសា គណៈកម្មការទន្លេមេគង្គ ដែលរួមមានតំណាងមកពីកម្ពុជា វៀតណាម ថៃ និងប្រទេសឡាវ បានសម្រេច ពន្យារពេលការសាងសង់ទំនប់វារិអគ្គិសនី សាយ៉ាបូរី។ ជាការសំរេច ដោយផ្អែកលើការផ្តល់យោបល់រិះគន់ពីសំណាក់ក្រុមអ្នកជំនាញផ្នែកបរិស្ថាននៃប្រទេសកម្ពុជា វៀតណាម និងថៃ ព្រមទាំងផ្អែកលើក្តីបារម្ភនានារបស់ប្រជាជនសហគមន៍ និងផ្អែកលើភស្តុតាងជាច្រើន ដែលបង្ហាញពីកង្វះខាតព័ត៌មានចាំបាច់ ស្តីពីហេតុប៉ះពាល់សំខាន់ៗអាចកើតចេញពីការសាងសង់ទំនប់វារិអគ្គិសនី។ ផលប៉ះពាល់ទាំងនោះ អាចបង្កជាផលវិបាកធ្ងន់ធ្ងរដល់ការផ្គត់ផ្គង់ស្បៀង និងការចិញ្ចឹមជីវិតរបស់ប្រជាជនរាប់សិបលាននាក់ ក្នុងប្រទេសកម្ពុជា វៀតណាម ប្រទេសថៃ និងប្រទេសឡាវ ជាពិសេសនឹងបង្ក ការខូចខាតធ្ងន់ធ្ងរដល់ធនធានជលផល។
អង្គការមូលនិធិសកល សម្រាប់អភិរក្សធម្មជាតិ ហៅកាត់ជាភាសាអង់គ្លេសថា WWF បានស្នើយ៉ាងទទូចថា បណ្តាក្រុមហ៊ុន ដែលមានបំណងចូលរួមដេញថ្លៃយកការសិក្សាវាយតម្លៃឡើងវិញមួយ លើការសាងសង់ទំនប់វារិអគ្គិសនី សាយ៉ាបូរី ក្នុងដងទន្លេមេគង្គក្រោម នៅប្រទេសឡាវ ត្រូវតែបង្ហាញឆន្ទៈអនុវត្តបច្ចេកទេសសិក្សា និងវាយតម្លៃ ដែលមានលក្ខណៈស្តង់ដារត្រឹមត្រូវ។
ក្នុងសេចក្តីប្រកាសព័ត៌មាន ចេញផ្សាយបន្ទាន់នៅថ្ងៃនេះ អង្គការ WWF បានទទូចសុំឲ្យមានការពន្យាររយៈពេល ១០ ឆ្នាំ ចំពោះរាល់ការសាងសង់ទំនប់វារិអគ្គិសនីទាំងឡាយ ដែលគេបានស្នើឡើងលើដងទន្លេមេគង្គប៉ែកខាងក្រោម រហូតដល់មានការសិក្សាច្បាស់លាស់ ក៏ដូចជា ការប្រមូលព័ត៌មានគ្រប់គ្រាន់ ស្តីពី ផលប៉ះពាល់នានាជាមុនសិន។
ការស្នើយ៉ាងដូច្នេះ ក៏ត្រូវបានប្រទេសវៀតណាម បានបញ្ចេញសំឡេងតវ៉ាយ៉ាងខ្លាំង ដោយថា ទំនប់វារិអគ្គិសនី នៅដងទន្លេមេគង្គក្រោម នឹងបង្កការប៉ះពាល់ដល់ការនេសាទ និងការធ្វើស្រែចំការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ