WWF៖ ការសាងសង់ទំនប់វារីអគ្គិសនីឡាវ នៅទន្លេមេគង្គប៉ះពាល់បរិស្ថាន និងបង្កឲ្យមានការខូចខាតធ្ងន់ធ្ងរដល់ជលផល
ចរាចរត្រី ព្រមទាំងប្រភពផ្គត់ផ្គង់អាហារចាំបាច់សម្រាប់ប្រជាជនរាប់លាននាក់ រួមទាំងប្រជាជនកម្ពុជា ដែលរស់នៅក្នុងតំបន់នៃអាងទន្លេមេគង្គ នឹងត្រូវកាត់ផ្តាច់ ប្រសិនបើគេអនុញ្ញាតឲ្យមានការសាងសង់ទំនប់វារីអគ្គិសនីដំបូងមួយ នៅប្រទេសឡាវ ក្នុងដងទន្លេមេគង្គ ផ្នែកខាងក្រោម។ នេះជាការវាយតម្លៃទុកជាមុនរបស់អង្គការមូលនិធិសកល សម្រាប់អភិរក្សធម្មជាតិ ហៅកាត់ថា WWF។ អង្គការ WWF បានស្នើឲ្យមានការពន្យារពេលសាងសង់ទំនប់វារីអគ្គិសនី នៅដងទន្លេមេគង្គ ១០ ឆ្នាំទៀត ដើម្បីឲ្យមានការសិក្សាគ្រប់ជ្រុងជ្រោយពីផលប៉ះពាល់បរិស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហូរពីភ្នំពេញ
ក្នុងសេចក្តីប្រកាសបន្ទាន់របស់អង្គការ WWF ប្រចាំកម្ពុជា បង្ហាញថា គម្រោងសាងសង់ទំនប់វារីអគ្គិសនីដំបូងមួយ នៅដងទន្លេមេគង្គក្រោម ក្នុងប្រទេសឡាវ នឹងបង្កឲ្យមានការខូចខាតធ្ងន់ធ្ងរដល់ជលផល នៅក្នុងតំបន់អាងទន្លេមេគង្គ។
សេចក្តីប្រកាសបានបញ្ជាក់ថា ការវាយតម្លៃផលប៉ះពាល់បរិស្ថានសម្រាប់ផែនការសាងសង់ទំនប់វារីអគ្គិសនី សាយាបូរី ដែលត្រូវបានស្នើឡើងនៅក្នុងប្រទេសឡាវ គ្មានលក្ខណៈគ្រប់ជ្រុងជ្រោយ ហើយមានកំរិតទាប បើធៀបនឹងបទដ្ឋានស្តង់ដារអន្តរជាតិ តម្រូវសម្រាប់ការសិក្សាបែបនេះ។
ទំនប់សាយាបូរី នៅក្នុងប្រទេសឡាវ គឺជាទំនប់វារីអគ្គិសនីទីមួយ ក្នុងចំណោមទំនប់ទាំងអស់ចំនួន ១១ ដែលត្រូវបានគេស្នើសុំសាងសង់នៅក្នុងតំបន់នៃដងទន្លេមេគង្គក្រោម។ រដ្ឋាភិបាលបណ្តាប្រទេស ដែលស្ថិតនៅអាងទន្លេមេគង្គក្រោម រួមមាន៖ កម្ពុជា វៀតណាម ឡាវ និងថៃ នឹងប្រជុំគ្នា នៅថ្ងៃទី២២មេសាខាងមុខ ដើម្បីសម្រេចថា តើគម្រោងសាងសង់ទំនប់វារីអគ្គិសនី ឆ្លងកាត់ទន្លេមេគង្គក្រោម អាចធ្វើទៅបាន ឬមិនបាន។
តាមការសិក្សាថ្មី របស់ WWF មានត្រីចំនួន ២២៩ ប្រភេទ ដែលត្រូវការទីជម្រកនៅផ្នែកខាងលើដងទន្លេនៃតំបន់គ្រោងសាងសង់ទំនប់វារីអគ្គិសនី សម្រាប់ធ្វើជាការពងកូន និងរស់នៅពេលរដូវទឹកស្រក។ ក្នុងនោះ មានត្រី ៧០ ប្រភេទ ត្រូវធ្វើចរាចរឡើងចុះ។
ក្នុងសេចក្តីប្រកាសព័ត៌មាន អង្គការ WWF បានលើកឡើងថា ត្រីចំនួន ៨៥% នៃចំនួនត្រីសរុប បានទទួលរងការប៉ះពាល់ ដោយសារទំនប់វារីអគ្គិសនីនៅដងទន្លេមេគង្គ។ ក្នុងនោះ មានត្រី ៥៦ ប្រភេទ បានបាត់បង់ទាំងស្រុង។ ចំណែកផលត្រី ក៏បានធ្លាក់ចុះ ចំពោះត្រី ១៦៩ ប្រភេទថែមទៀត។
អង្គការ WWF គាំទ្រឲ្យមានការពន្យារពេល ១០ ឆ្នាំទៀត ចំពោះការសាងសង់ទំនប់វារីអគ្គិសនីនានា នៅដងទន្លេមេគង្គប៉ែកខាងក្រោម ក្នុងនោះ មានគម្រោងទំនប់សាយាបូរី របស់ប្រទេសឡាវផងដែរ ដើម្បីអាចធានាថា មានការសិក្សាឲ្យបានល្អិតល្អន់ និងគ្រប់ជ្រុងជ្រោយលើគ្រប់ទិដ្ឋភាពនៃផលប៉ះពាល់ផ្នែកបរិស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ