ព្រំដែនកម្ពុជាថៃស្ងប់ស្ងាត់នៅពេលរដ្ឋាភិបាលជួបគ្នានៅឆាកអន្តរជាតិ
អ្នកនាំពាក្យយោធាកម្ពុជាបានអះអាងអោយដឹងថា ស្ថានភាពព្រំដែនបានស្ថិតនៅក្នុងសភាពស្ងប់ស្ងាត់ ប៉ុន្តែទាហាននៅតែប្រុងប្រយ័ត្នចំពោះឧបទ្ទវហេតុនៃការផ្ទុះអាវុធដូចពេលមុនៗ។ កម្ពុជា និងថៃកំពុងរង់ចាំសេចក្តីសម្រេចរបស់តុលាការអន្តរជាតិ ចំពោះបណ្តឹងរបស់កម្ពុជាដែលស្នើអោយថៃដកកងទ័ពចេញពីតំបន់ប្រាសាទ ព្រះវិហារ។ តំណាងរដ្ឋាភិបាលទាំងពីរក៏កំពុងត្រៀមខ្លួនចូលរួមកិច្ចប្រជុំ គណៈកម្មការបេតិកភណ្ឌពិភពលោកលើកទី៣៥ នៅទីក្រុងប៉ារីសដែលនឹងចាប់ផ្តើមនៅថ្ងៃទី១៩មិថុនានេះផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
នៅពេលដែលចៅក្រមរបស់តុលាការយុត្តិធម៌អន្តរជាតិឡាអេកំពុងស្តាប់ទឡ្ហីករណ៍របស់កម្ពុជា និងថៃ ជុំវិញបណ្តឹងរបស់កម្ពុជាទាមទារអោយថៃដកកងទ័ពចេញពីតំបន់ប្រាសាទព្រះវិហារ ប្រជាជាតិទាំងពីរអ្នកតាមដានបញ្ហាព្រំដែន ក៏កំពុងតាមដានព្រឹត្តិការណ៍នេះយ៉ាងយកចិត្តទុកដាក់។ ការតាមដាននេះ ក៏អាចមាននៅក្នុងមជ្ឈដ្ឋានកងទ័ពផងដែរ។
អ្នកនាំពាក្យក្រសួងការពារជាតិ លោកឧត្តមសេនីយឯក ឈុំ សុជាតិបានអះអាងនៅថ្ងៃពុធនេះថា ស្ថានភាពនៅតាមព្រំដែនមានសភាពស្ងប់ស្ងាត់គួរអោយលើកទឹកចិត្ត។ ប៉ុន្តែថា កងទ័ពត្រូវបានបញ្ជាអោយប្រុងប្រយ័ត្នជានិច្ច ដើម្បីទប់ទល់ការវាយប្រហារពីសត្រូវជាយថាហេតុ។ នៅថ្ងៃនេះ សារព័ត៌មានក្នុងស្រុកបានផ្សព្វផ្សាយថា ទាហានថៃបានបើកយន្តហោះ ហោះតាមព្រំដែនកម្ពុជាថៃ នៅខេត្តបន្ទាយមានជ័យ និងឧត្តរមានជ័យកាលពីថ្ងៃម្សិលមិញ និងថ្ងៃនេះ។
គួររម្លឹកថា តុលាការអន្តរជាតិក្រុងឡាអេបានបើកសវនាការសាធារណៈ២ថ្ងៃកន្លងមកនេះ ដើម្បីចាត់ការបណ្តឹងរបស់កម្ពុជាមួយ ដែលស្នើអោយតុលាការចាត់វិធានការបន្ទាន់ដើម្បីការថែរក្សាប្រាសាទព្រះវិហារ ពីការវាយប្រហារដោយគ្រាប់កាំភ្លើង។
ទន្ទឹមនឹងនេះដែរ ប្រធានបទនៃការវាយប្រហារដោយកាំភ្លើងធុនធ្ងន់របស់ទាហានថៃមកលើសម្បត្តិបេតិកភណ្ឌពិភពលោក នឹងក្លាយទៅជាប្រធានបទសំខាន់មួយផងដែរ ដែលកម្ពុជានឹងលើកយកមកដាក់លើតុនៅក្នុងកិច្ចប្រជុំគណៈកម្មការបេតិកភណ្ឌពិភពលោកលើកទី៣៥ បន្ថែមពីលើផែនការអភិវឌ្ឍន៍តំបន់រមណីយដ្ឋានសម្បត្តិបេតិកភណ្ឌពិលោក ប្រាសាទព្រះវិហារនេះ។ នេះបើតាមការបញ្ជាក់របស់លោកទិត សុធាអ្នកនាំពាក្យអង្គភាពប្រតិកម្មរហ័សរបស់ទីស្តីការគណៈរដ្ឋមន្ត្រី។ កិច្ចប្រជុំគណៈកម្មការបេតិកភណ្ឌពិភពលោកលើកទី៣៥ នឹងប្រព្រឹត្តទៅនៅទីក្រុងប៉ារីសប្រទេសបារាំងនៅក្នុងខែមិថុនានេះពីថ្ងៃទី១៩ដល់ថ្ងៃទី២៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ