នាយករដ្ឋមន្ត្រីបញ្ជាឲ្យបន្តថែរក្សាធនធានត្រី ក្នុងបឹងទន្លេសាប
ក្នុងទិវាមច្ឆជាតិ នៅថ្ងៃ១កក្កដានេះ លោកនាយករដ្ឋមន្ត្រី ហ៊ុន សែន បានបញ្ជាដោយផ្ទាល់មាត់ឲ្យដកតំណែងនាយខណ្ឌជលផល ក្នុងខេត្តបាត់ដំបង កំពង់ឆ្នាំង ពោធិ៍សាត់ សៀមរាប និងខេត្តកំពង់ធំ ដែលស្ថិតនៅជុំវិញបឹងទន្លេសាប។ ការដកតំណែងមន្ត្រីជលផលទាំងនោះ ដោយសារតែការបណ្តែតបណ្តោយ ឲ្យកើតមានបទល្មើសនេសាទក្នុងបឹងទន្លេសាប។ បទបញ្ជាលេខ ០១ រុះរើសម្រាស់ និងព្រួល ដែលនាំដល់ការគោករាក់ទឹកបឹង។ ទិវាមច្ឆជាតិ នៅថ្ងៃទី ១ កក្កដា នៅខេត្តស្វាយរៀង កូនត្រីជាង ១ លានក្បាល ក៏ត្រូវបានព្រលែងក្នុងទន្លេវ៉ៃកូផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
នៅថ្ងៃនេះ លោកនាយករដ្ឋមន្ត្រី ហ៊ុន សែន បានដាក់បញ្ជាឲ្យលោក ច័ន្ទ សារុន រដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ ដកតំណែងនាយខណ្ឌជលផល ក្នុងខេត្តចំនួន៥ នៅជុំវិញបឹងទន្លេសាប រួមមាន៖ ខេត្តបាត់ដំបង កំពង់ឆ្នាំង ពោធិ៍សាត់ សៀមរាប និងខេត្តកំពង់ធំ។
ប្រធានជលផលទាំង ៥ ខេត្តនេះ ត្រូវបានលោកនាយករដ្ឋមន្ត្រី អះអាងថា មានកំហុសឆ្គង ដែលបានបណ្តែតបណ្តោយឲ្យមានបទល្មើសនេសាទ ជាពិសេសការដាក់សម្រាស់ និងព្រួល នៅក្នុងបឹងទន្លេសាប។
ការដាក់សម្រាស់ និងព្រួល ដែលធ្វើឲ្យគោករាក់ និងនាំដល់ការបាត់បង់ធនធានត្រី ក្នុងបឹងប្រវត្តិសាស្ត្ររបស់កម្ពុជានេះ។ ថ្មីៗនេះ អាជ្ញាធរបានចុះអនុវត្តបទបញ្ជាលេខ ០១ ដោយរុះរើសម្រាស់ ព្រួលធំៗ និងបំផ្លាញអាងទប់ទឹកជាច្រើន ក្នុងបឹងទន្លេសាប។
ជាថ្មីម្តងទៀត នៅថ្ងៃនេះ លោកនាយករដ្ឋមន្ត្រី ហ៊ុន សែន បានប្រកាសថា បទបញ្ជាលេខ ០១ ដើម្បីការពារធនធានត្រីក្នុងបឹងទន្លេសាប គ្មានឱសានវាទទេ គឺត្រូវអនុវត្តជាប្រចាំពិសេសការចំណុចទី២ ដែលកំណត់ពីការរុះរើសម្រាស់ និងព្រួល។
លោកនាយករដ្ឋមន្ត្រី ក៏បានប្រកាស បង្កើតអធិការកិច្ចមួយក្រុម ដឹកនាំដោយឧបនាយករដ្ឋ មន្ត្រីម្នាក់ ដើម្បីចុះពិនិត្យដល់បណ្តាឡូតិ៍នេសាទ ក្នុងបឹងទន្លេសាប ពិសេសនៅឡូតិ៍លេខ២ ក្នុងខេត្តបាត់ដំបង ដែលកើតមានបញ្ហាធ្ងន់ធ្ងរជាងគេ។
ការលើកឡើងរបស់ប្រមុខរដ្ឋាភិបាលយ៉ាងដូច្នេះ ធ្វើឡើងក្នុងទិវាមច្ឆាជាតិ ដែលកូនត្រី កូនបង្កង អណ្តើក កន្ធាយ កង្កែប អន្ទង់ ជាង ១ លានក្បាល ត្រូវបានព្រលែងក្នុងទន្លេវ៉ៃកូ នៅទីរួមខេត្តស្វាយរៀង។
ក៏ប៉ុន្តែលោកនាយករដ្ឋមន្ត្រី បានកត់សម្គាល់ថា វាគ្មានន័យទាល់តែសោះ បើសិនជាលែងត្រីជាង ១ លានក្បាលនៅថ្ងៃនេះ តែគេនៅតែបំផ្លាញធនធានត្រី ក្នុងបឹងទន្លេសាប។ ដូច្នេះតាមលោកនាយករដ្ឋមន្ត្រី អាជ្ញាធរសមត្ថកិច្ច ត្រូវធ្វើការងារពីរទន្ទឹមគ្នា ដោយដៃម្ខាងលែងកូនត្រី និងជំរុញការចិញ្ចឹមភ្ញាស់កូនត្រី ហើយដៃម្ខាងទៀត ការពារធនធានត្រីតាមបឹងបួ តាមរយៈការបង្ក្រាបបទល្មើស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ