ប្រមុខការទូតខ្មែរចេញដំណើរទៅស្តាប់ក្តីសម្រេចរបស់តុលាការឡាអេ
ប្រមុខការទូតកម្ពុជាលោកឧបនាយករដ្ឋមន្ត្រីហោ ណាំងហុងនឹងដឹកនាំគណៈប្រតិភូចេញទៅប្រទេសហូឡង់ ដើម្បីស្តាប់សេចក្តីសម្រេចរបស់តុលាការយុត្តិធម៌អន្តរជាតិ លើបណ្តឹងរបស់កម្ពុជាដែលស្នើអោយថៃដកកងទ័ពចេញពីតំបន់ព្រំដែនប្រាសាទព្រះវិហារ។ សេចក្តីសម្រេចរបស់តុលាការក្រុងឡាអេនឹងត្រូវប្រកាសនៅថ្ងៃចន្ទទី១៨កក្កដា ដើមសប្តាហ៍ក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
រដ្ឋមន្ត្រីការបរទេសកម្ពុជាលោកហោ ណាំហុងនឹងចេញដំណើរទៅទីក្រុងឡាអេប្រទេសហូឡង់នៅចុងសប្តាហ៍នេះ ដើម្បីស្តាប់សេចក្តីសម្រេចរបស់តុលាការយុត្តិធម៌អន្តរជាតិមួយនេះនៅថ្ងៃចន្ទទី១៨កក្កដាដើមសប្តាហ៍ក្រោយ។ តុលាការអន្តរជាតិក្រុងឡាអេនឹងប្រកាសសាលក្រមលើបណ្តឹងរបស់កម្ពុជាដែលសុំអោយតុលាការចាត់វិធានការបន្ទាន់ដើម្បីការថែរក្សាសម្បត្តិបេតិកភណ្ឌមនុស្សជាតិប្រាសាទព្រះវិហារ។
កម្ពុជាបានដាក់បណ្តឹងនេះកាលពីថ្ងៃទី២៨ខែមេសាហើយតុលាការយុត្តិធម៌អន្តរជាតិបានបើកសវនាការរយៈពីរថ្ងៃកាលពីថ្ងៃទី៣០និង៣១ឧសភាកន្លងទៅ។
នៅក្នុងការធ្វើបទបង្ហាញផ្ទាល់មាត់កម្ពុជាដែលតំណាងដោយរដ្ឋមន្ត្រីការបរទេស បានធ្វើសំណើ៣ចំនុច ទៅក្រុមចៅក្រម។ ចំនុចទី១ កម្ពុជាស្នើអោយថៃដកទ័ពជាបន្ទាន់ដោយគ្មានលក្ខខណ្ឌចេញពីតំបន់ប្រាសាទព្រះវិហារ។ ទី២ ហាមមិនអោយថៃចល័តទ័ពនៅក្នុងតំបន់ប្រាសាទព្រះវិហារ និងទី៣ហាមមិនអោយកងទ័ពថៃបញ្ចេញសកម្មភាពណាមួយដែលអាចបង្កអោយមានស្ថានភាពតានតឹងនៅតាមព្រំដែន។
អ្នកនាំពាក្យក្រសួងការបរទេស លោកកុយ គួងបានថ្លែងថាកម្ពុជាមិនទាន់អាចសន្និដ្ឋានអំពីអនាគតសាលក្រមរបស់តុលាការអន្តរជាតិនោះឡើយ។
ក្រោយពីចូលរួមស្តាប់សាលក្រមតុលាការក្រុងឡាអេរួចហើយនោះ លោកហោ ណាំហុងនឹងដឹកនាំគណៈប្រតិភូកម្ពុជាទៅចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៤៤ កិច្ចប្រជុំវេទិកាតំបន់អាស៊ានលើកទី១៨ ដែលប្រព្រឹត្តទៅចាប់ពីថ្ងៃទី១៩ ដល់ ២៣ កក្កដា នៅប្រទេសឥណ្ឌូនេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ