តុលាការឡាអេប្រកាសសេចក្តីសម្រេចលើបញ្ហាកម្ពុជា-ថៃ នៅថ្ងៃទី១៨កក្កដា
តុលាការយុត្តិធម៌អន្តរជាតិទីក្រុងឡាអេនឹងប្រកាសសេចក្តីសម្រេចលើពាក្យបណ្តឹងចាត់វិធានការបន្ទាន់ចំពោះបញ្ហាព្រំដែនកម្ពុជា-ថៃនៅថ្ងៃទី១៨កក្កដា។ សេចក្តីសម្រេចនាពេលខាងមុខ គឺធ្វើឡើងតាមពាក្យបណ្តឹងដែលកម្ពុជាបានស្នើសុំវិធានការបន្ទាន់ ចំពោះបញ្ហាព្រំដែនប្រាសាទព្រះវិហារប៉ុណ្ណោះ។ មានន័យថា សេចក្តីសម្រេចខាងមុខ មិនទាន់ផ្តោតលើសំណើរបស់កម្ពុជា ដែលបានស្នើឲ្យតុលាការឡាអេ បកស្រាយសាលក្រមឆ្នាំ១៩៦២នោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
តុលាការយុតិ្តធម៌អន្តរជាតិ ទីក្រុងឡាអេ បានប្រកាសកាលពីថ្ងៃទី៧កក្កដាថា នៅថ្ងៃទី១៨កក្កដាខាងមុខ តុលាការកំពូលនេះនឹងប្រកាសជាសាធារណៈនូវសេចក្តីសម្រេចលើពាក្យបណ្តឹង ចាត់វិធានការបន្ទាន់ ចំពោះជម្លោះព្រំដែនរវាងកម្ពុជានិងថៃ។
សេចក្តីសម្រេចរបស់តុលាការ ដែលមានចៅក្រមចម្រុះជាតិសាសន៍ ១៥ រូប នៅថ្ងៃ១៨កក្កដាខាងមុខ ធ្វើឡើងយោងតាមពាក្យបណ្តឹងរបស់កម្ពុជា ដែលមានការទាញសំអាងហេតុផ្ទាល់មាត់ កាលពីថ្ងៃទី៣០ និងថ្ងៃ៣១ឧសភា។ ភាគីកម្ពុជា តំណាងដោយលោកប្រមុខការទូត ហោ ណាំហុង និងភាគីថៃ តំណាងដោយឯកអគ្គរាជទូតថៃ ប្រចាំប្រទេសហូឡង់ដ៍។
កម្ពុជាបានស្នើសុំឲ្យតុលាការយុត្តិធម៌អន្តរជាតិ ចាត់វិធានការជាបន្ទាន់ ដើម្បីឱ្យថៃដកកងទ័ពចេញពីតំបន់ព្រំដែន ពិសេសដើម្បីកុំឲ្យមានការខូចខាត ដែលមិនអាចជួសជុលបាន។ នោះគឺខូចខាតប្រាសាទព្រះវិហារ និងការបាត់បង់អាយុជីវិតមនុស្ស ដោយសារការវាយប្រហាររបស់ថៃ។
នៅថ្ងៃប្រកាសសាលក្រម ថ្ងៃ១៨កក្កដាខាងមុខ លោកប្រមុខការទូត ហោ ណាំហុង នឹងចូលរួមស្តាប់ដោយផ្ទាល់ នៅតុលាការទីក្រុងឡាអេ។ ចំណែកខាងភាគីថៃ ក៏ត្រូវបានគេរាយការណ៍ថា មានលោកប្រមុខការទូតថៃ កាស៊ីតភិរម្យ និងឯកអគ្គរាជទូតថៃ ប្រចាំប្រទេសហូឡង់ដ៍ ដែលជាអ្នកតតាំងក្តីជាមួយកម្ពុជា។
យ៉ាងណាក៏ដោយ តាមអ្នកនាំពាក្យក្រសួងការបរទេសកម្ពុជាលោក កុយ គួង នៅពេលរង់ចាំការសម្រេចរបស់តុលាការឡាអេ លើសំណើរបស់កម្ពុជា អំពីវិធានការបណ្តុះអាសន្ន ឬវិធានបន្ទាន់ សម្រាប់ប្រាសាទព្រះវិហារ នៅពេលនេះស្ថានភាពនៅតាមព្រំដែនកម្ពុជា-ថៃ មានភាពស្ងប់ស្ងាត់ មានន័យថា បទឈប់បាញ់ ហាក់ដូចជាកើតឡើងហើយ ខណៈដែលប្រទេសថៃ នឹងមានរដ្ឋាភិបាលថ្មី ក្នុងពេលឆាប់ៗខាងមុខ។
សូមរម្លឹកថា ជាមួយនឹងពាក្យបណ្តឹងលើវិធានការបន្ទាន់ កាលពីថ្ងៃទី២៨មេសា ឆ្នាំ២០១១ បន្ទាប់ពីថៃបង្កសង្គ្រាមទ្រង់ទ្រាយធំនៅតំបន់ប្រាសាទព្រះវិហារ កម្ពុជាក៏បានប្តឹងឲ្យតុលាការឡាអេ បកស្រាយសាលក្រមឆ្នាំ១៩៦២ ដែលតុលាការកំពូលនេះ បានសម្រេចក្តីឲ្យកម្ពុជាឈ្នះថៃ លើបញ្ហាប្រាសាទព្រះវិហារ។ ក៏ប៉ុន្តែបណ្តឹងសុំបកស្រាយសាលក្រមតុលាការមិនទាន់លើកមកជំនុំជម្រះនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ