សំណុំរឿងព្រះវិហារ៖ តុលាការក្រុងឡាអេជំរុញកម្ពុជា និងថៃឲ្យដកទ័ពចេញពីតំបន់ជម្លោះ
នៅថ្ងៃច័ន្ទ ទី១៨ កក្កដានេះ តុលាការយុត្តិធម៌អន្តរជាតិក្រុងឡាអេបានប្រកាសសាលក្រមទាក់ទងនឹងបណ្តឹងរបស់កម្ពុជាដែលបានសុំឲ្យតុលាការបកស្រាយសាលក្រមឆ្នំា ១៩៦២ និងសុំឲ្យចាត់វិធានការបន្ទាន់ នៅក្នុងសំណុំរឿងព្រះវិហារដែលកម្ពុជា និងថៃកំពុងមានជម្លោះជាមួយគ្នា។ នៅទីបំផុត តុលាការបានសម្រេចឲ្យភាគីទំាងពីរដកកងទ័ពទំាងអស់ចេញពីតំបន់ជម្លោះ។
ចុះផ្សាយនៅថ្ងៃ៖
ស្តាប់ - ០៣:០៨
សាលក្រមដែលទើបប្រកាសដោយតុលាការយុត្តិធម៌អន្តរជាតិក្រុងឡាអេនៅថ្ងៃនេះ ទាក់ទងតែបណ្តឹងមួយប៉ុណ្ណោះ ក្នុងចំណោមបណ្តឹងចំនួនពីររបស់កម្ពុជា។ បណ្តឹងទំាងពីរនោះរួមមាន ការសុំឲ្យតុលាការបកស្រាយសាលក្រមឆ្នំា ១៩៦២ និងការសុំឲ្យចាត់វិធានការបន្ទាន់ នៅក្នុងសំណុំរឿងព្រះវិហារដែលកម្ពុជា និងថៃកំពុងមានជម្លោះជាមួយគ្នា។ នៅថ្ងៃនេះ តុលាការបានប្រកាសសាលក្រមទាក់ទងតែបណ្តឹងសុំឲ្យចាត់វិធានការបន្ទាន់។ ចំណែកបណ្តឹងទាក់ទងសុំឲ្យបកស្រាយសាលក្រមឆ្នំា ១៩៦២ នឹងត្រូវតុលាការលើកទៅប្រកាសនៅថ្ងៃខាងមុខ។ ទាក់ទងនឹងបណ្តឹងសុំឲ្យចាត់វិធានការបន្ទាន់ តុលាការបានសម្រេចឲ្យភាគីទំាងសងខាង ទំាងកម្ពុជា និងថៃដកកម្លំាងទ័ពរបស់ខ្លួនទំាងអស់ជាបន្ទាន់ចេញពីតំបន់ជម្លោះ ទំាងពីតំបន់ប្រាសាទព្រះវិហារ និងតំបន់ជុំវិញប្រាសាទព្រះវិហារ។ ជារួម តុលាការបានសម្រេចទុកឲ្យតំបន់ជម្លោះ ជាតំបន់គ្មានកងទ័ព។ ការសម្រេចបែបនេះ ដោយតុលាការកត់សម្គាល់ឃើញថា ការដែលភាគីទំាងពីរបន្តរក្សាវត្តមានកងទ័ពនៅទីនោះ នឹងអាចបង្កឲ្យមានការប៉ះទង្គិចគ្នាតាមផ្លូវអាវុធជាថ្មី ដោយចៀសមិនរួច។ ទន្ទឹមគ្នានេះ តុលាការបានតម្រូវឲ្យកម្ពុជា និងថៃអនុញ្ញាតឲ្យមានក្រុមអ្នកសង្កេតការណ៍របស់អាស៊ាននៅលើតំបន់ជម្លោះ។
ដោយឡែក តុលាការក៏បានបញ្ជាក់ផងដែរថា កម្ពុជាមានសិទ្ធិពេញលេញក្នុងការបន្តសកម្មភាពប្រចំាថ្ងៃនៅក្នុងប្រាសាទព្រះវិហារ និងនៅតំបន់ជុំវិញប្រាសាទព្រះវិហារ លើកលែងតែសកម្មភាពកងទ័ពចេញ។ ចំណែកភាគីថៃត្រូវជួយបង្កលក្ខណៈងាយស្រួលដល់ពលរដ្ឋខ្មែរស៊ីវិល ក្នុងការធ្វើដំណើរទៅកាន់ប្រាសាទព្រះវិហារ និងតំបន់ជុំវិញប្រាសាទព្រះវិហារ។
ចំណុចសំខាន់មួយទៀត គឺទាក់ទងនឹងការច្រានចោលរបស់តុលាការចំពោះការចោទរបស់ថៃដែលថា តុលាការយុត្តិធម៌អន្តរជាតិក្រុងឡាអេគ្មានសមត្ថភាព និងសមត្ថកិច្ចក្នុងការដោះស្រាយវិបត្តិព្រំដែនខ្មែរ ថៃនាពេលបច្ចុប្បន្ននេះទេ។ តុលាការបានប្រកាសច្បាស់ៗនៅថ្ងៃនេះថា តុលាការមានសិទ្ធិ និងសមត្ថកិច្ចគ្រប់គ្រាន់ក្នុងការដោះស្រាយបញ្ហានេះ និងបន្តដោះស្រាយរហូតដល់ចប់។ នៅថ្ងៃនេះ ជាការប្រកាសសាលក្រមទាក់ទងនឹងបណ្តឹងឲ្យចាត់វិធានការបន្ទាន់។ នៅថ្ងៃខាងមុខ តុលាការនឹងផ្តើមពិនិត្យលើបណ្តឹងសុំឲ្យធ្វើការបកស្រាយសាលក្រមឆ្នំា ១៩៦២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ