ត្រូវធ្វើសកម្មភាពបញ្ឈប់កុំឲ្យទាហានថៃប្រមាថជីវិតពលរដ្ឋខ្មែរ
ចុះផ្សាយនៅថ្ងៃ៖
ស្តាប់ - ០៤:២៣
ក្រសួងការបរទេសកម្ពុជាបានផ្ញើកំណត់ទូតថ្មីមួយទៀតកាលពីថ្ងៃទី២៨កុម្ភៈដើម្បីតវ៉ារឿងទាហានថៃបាញ់សម្លាប់ពលរដ្ឋខ្មែរ៣នាក់នៅក្នុងទឹកដីទល់ដែនខេត្តសុរិន្ទ។ពលរដ្ឋខ្មែរទាំង៣ត្រូវបានទាហានថៃបាញ់សម្លាប់នៅពេលឆ្លងដែនខុសច្បាប់ចូលក្នុងទឹកដីថៃកាលពីថ្ងៃទី២២កុម្ភៈ។ គ្រាន់តែក្នុងឆ្នាំ២០១១ និង២ខែដើមឆ្នាំ២០១២នេះមានពលរដ្ឋខ្មែរដល់ទៅ២៤នាក់បានស្លាប់ដោយសារគ្រាប់កាំភ្លើងរបស់ទាហានថៃ។ នេះជាតួលេខដ៏គួរឲ្យព្រឺខ្លាចដែលអាជ្ញាធរនិងពលរដ្ឋខ្មែរមិនអាចនៅស្ងៀមបានឡើយ។ តើកម្ពុជាត្រូវធ្វើបែបណាដើម្បីបញ្ឈប់អំពើឃោរឃៅអមនុស្សធម៌របស់ទាហានថៃដែលកំពុងប្រមាថយ៉ាងធ្ងន់ធ្ងរមកលើជីវិតពលរដ្ឋរបស់ខ្លួន?
ការបាញ់សម្លាប់ប្រជាពលរដ្ឋខ្មែរដោយគ្រាន់តែឆ្លងដែនខុសច្បាប់ចូលក្នុងទឹកដីថៃបានក្លាយជារឿងភាគនៃសោកនាដកម្មគួរឲ្យឈឺចាប់បំផុតមួយដែលគ្មានទីបញ្ចប់។ គ្រាន់តែក្នុងឆ្នាំ២០១១ បូកនឹង២ខែដំបូងនៃដើមឆ្នាំ២០១២នេះ មានពលរដ្ឋខ្មែរដល់ទៅ២៤នាក់បានស្លាប់ដោយសារគ្រាប់កាំភ្លើងរបស់ទាហានថៃ។ បើរាប់ចាប់តាំងពីឆ្នាំ២០០៩មកមានពលរដ្ឋខ្មែររាប់សិបនាក់ហើយដែលបានស្លាប់ដោយសារចុងកាណុងទាហានសៀម។ នេះបើយោងតាមរបាយការណ៍របស់សមាគមការពារសិទ្ធិមនុស្សអាដហុក។
តួលេខនេះពិតជាគួរឲ្យព្រឺខ្លាចនិងមិនគួរឲ្យជឿ ពីព្រោះថា ប្រទេសមួយដែលគេចាត់ទុកថាមានអារ្យធម៌មួយដែរនៅអាស៊ីអាគ្នេយ៍បែរជាក្លាយជាប្រទេសដែលប្រើច្បាប់ព្រៃសម្លាប់ជាតិសាសន៍ខ្មែរដូចសត្វធាតុបែបនេះទៅវិញ។ ក្រសួងការបរទេសកម្ពុជាបានផ្ញើកំណត់ការទូតជាច្រើនលើកហើយទៅកាន់ក្រសួងការបរទេសថៃដើម្បីថ្កោលទោសនិងទាមទារឲ្យទាហានថៃបញ្ឈប់អំពើអមនុស្សធម៌ប្រកបដោយការប្រមាថជីវិតពលរដ្ឋខ្មែរ។ កំណត់ទូតចុងក្រោយ ត្រូវបានផ្ញើទៅក្រសួងការបរទេសថៃកាលព្រឹកថ្ងៃទី២៨កុម្ភៈដើម្បីប្រឆាំងតវ៉ាចំពោះការបាញ់សម្លាប់ពលរដ្ឋខ្មែរ៣នាក់ទៀតកាលពីថ្ងៃទី២២កុម្ភៈនៅឯតំបន់ទល់ដែនខេត្តសុរិន្ទ។
ជាការពិតណាស់ ការតវ៉ាតាមផ្លូវការទូតជារឿងចាំបាច់ដែលត្រូវធ្វើក្នុងឋានៈជាប្រទេសជិតខាងដែលរស់ក្រោមដំបូលច្បាប់ជាតិនិងអន្តរជាតិ។ ប៉ុន្តែ វិធីនេះអាចធ្វើទៅបានតែជាមួយអ្នកដែលចេះស្តាប់ភាសាការទូតតែប៉ុណ្ណោះ តែជាមួយនឹងប្រទេសថៃ ភាសាការទូតមិនខុសអ្វីពីស្ថានភាព«ផ្លុំខ្លុយឲ្យគោស្តាប់»នោះឡើយ។ ដូច្នេះ វាជាការចាំបាច់ដែលកម្ពុជាត្រូវដំឡើងកម្រិតនៃការប្រឆាំងតវ៉ារបស់ខ្លួនតបទៅនឹងអំពើឃោរឃៅរបស់ទាហានសៀម។
ពិតហើយ វាជាអកុសលណាស់ដែលពលរដ្ឋកម្ពុជាជាច្រើនបាននាំគ្នាឆ្លងដែនដោយខុសច្បាប់ចូលក្នុងប្រទេសថៃជារៀងរាល់ថ្ងៃដើម្បីស្វែងរកការងារធ្វើ។ អ្នកខ្លះបានប្រថុយជីវិតឆ្លងដែនទៅស៊ីឈ្នួលកាប់ឈើឲ្យគេក្នុងព្រៃទឹកដីថៃជាថ្នូរនឹងប្រាក់បន្តិចបន្តួច។ នេះពិតជាកំហុសគួរឲ្យសោកស្តាយរបស់ពលរដ្ឋកម្ពុជាទាំងនោះ ឬក៏ជាកំហុសរបស់អាជ្ញាធរក៏ថាបានពីព្រោះពួកគេមិនអាចទប់ស្កាត់បញ្ហានេះបាន។ ប៉ុន្តែ ទោះជាក្នុងលក្ខខណ្ឌណាក៏ដោយចុះ ការបាញ់សម្លាប់មនុស្សជារឿងដែលមិនអាចធ្វើបានឡើយនៅក្នុងប្រទេសនីតិរដ្ឋលើកលែងតែប្រទេសដែលប្រើច្បាប់ព្រៃតែប៉ុណ្ណោះ។
នៅពេលដែលពលរដ្ឋរបស់ខ្លួនរាប់សិបនាក់ត្រូវគេបាញ់សម្លាប់ ក្រុមគ្រួសារ និងអាជ្ញាធរកម្ពុជាបានត្រឹមទទួលយកសពពីភាគីថៃមកធ្វើបុណ្យ និងបានត្រឹមតវ៉ាតាមការទូតដែលគ្មានលទ្ធផលអ្វីទាំងអស់។ ដូច្នេះ តើអាជ្ញាធរ និងប្រជាពលរដ្ឋកម្ពុជាទាំងអស់គួរនៅស្ងៀមចំពោះមុខការប្រមាថជីវិតបែបនេះតទៅទៀតបានដែរឬទេ? វាមិនមែនមានន័យថាពលរដ្ឋខ្មែរត្រូវក្រោកឡើងប្រឆាំងនឹងផលប្រយោជន៍ថៃ ឬប្រឆាំងពលរដ្ឋថៃជាទូទៅនោះឡើយ ហើយក៏ត្រូវប្រើអំពើហិង្សាណាមួយដែរ ប៉ុន្តែ វាជាការចាំបាច់ដែលកម្ពុជាត្រូវការពារខ្លួនចេញពីការប្រមាថពីទាហានថៃមកលើពលរដ្ឋរបស់ខ្លួន។
មានវិធីច្រើនយ៉ាងណាស់ដែលត្រូវធ្វើ និងធ្វើដោយសេចក្តីថ្លៃថ្នូរ និងអហិង្សា ដូចជា ការចូលរួមកាន់ទុក្ខអ្នកស្លាប់ក្នុងក្របខណ្ឌទូទាំងប្រទេស ការរឹតត្បិតទំនាក់ទំនងក្នុងផ្នែកណាមួយជាមួយថៃ ឬការប្តឹងទៅឧត្តមស្នងការសិទ្ធិមនុស្សសហប្រជាជាតិជាដើម។ ទន្ទឹមនឹងនោះ អាជ្ញាធរកម្ពុជាក៏ត្រូវធ្វើយុទ្ធនាការទ្រង់ទ្រាយធំមួយដែរក្នុងការទប់ស្កាត់ពលរដ្ឋមិនឲ្យឆ្លងដែនខុសច្បាប់ចូលក្នុងទឹកដីថៃបន្តទៀត។សកម្មភាពទាំងនេះចាំបាច់ត្រូវធ្វើ និងធ្វើឲ្យបានខ្លាំងក្លាទៀតផង។ ការសម្ងំស្ងៀមចំពោះមុខស្ថានការណ៍ដ៏ធ្ងន់ធ្ងរនេះគឺជារឿងដែលមិនអាចធ្វើបានក្នុងឋានៈជាជនជាតិមួយដែលរងការប្រមាថអាយុជីវិតម្តងហើយម្តងទៀតពីប្រទេសជិតខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ