ក្រុមហ៊ុនមេរបស់ Mfone ព្រមសងប្រាក់ខែដល់បុគ្គលិក
ក្រុមហ៊ុនមេរបស់ក្រុមហ៊ុន អ៊ឹមហ្វូន យល់ព្រមបើកប្រាក់បំណាច់ និងប្រាក់អត្ថប្រយោជន៍ផ្សេងៗដល់បុគ្គលិកជាង ១ពាន់នាក់ ដែលបានធ្វើកូដកម្មទាមទារ បន្ទាប់ពីក្រុមហ៊ុនទូរគមនាគមន៍មួយនេះក្ស័យធន កាលពីដើមឆ្នាំ ២០១៣។ តាមការប៉ាន់ប្រមាណទឹកប្រាក់ដែលនឹងគ្រោងបើកឲ្យបុគ្គលិកនោះ មានចំនួន ៤,៤លានដុល្លារ ដែលជាការបញ្ចេញសាច់ប្រាក់បើកឲ្យបុគ្គលិកមុន របស់ក្រុមហ៊ុនធំនៅក្រៅប្រទេស ដោយក្រុមហ៊ុនមេនេះ នឹងកាត់យកប្រាក់នេះវិញ នៅពេលដែលទ្រព្យសម្បត្តិក្រុមហ៊ុនអ៊ឹមហ្វូន នៅកម្ពុជាត្រូវបានលក់ដាច់។
ចុះផ្សាយនៅថ្ងៃ៖ កែប្រែថ្ងៃទី៖
បុគ្គលិកទូរស័ព្ទ MFone ជាង១០០០ នាក់ ដែលបានខកខានបំពេញការងារអស់រយៈពេលជាច្រើនខែកន្លងមកហើយ ដោយសារក្រុមហ៊ុនក្ស័យធន នៅមិនទាន់បានទទួលប្រាក់បំណាច់ នៅឡើយមកទល់ពេលនេះ។
លោក នឹម សូលីដា តំណឆាង ប្រតិភូបុគ្គលិកក្រុមហ៊ុន MFone ដែលកំពុងតាមដានដំណើរវិវឌ្ឍន៍ ក្នុងការស្វែងរកមធ្យោបាយដោះស្រាយប្រាក់បំណាច់ជូនបុគ្កលិកទាំងអស់បានរៀបរាប់ថា លោក និងអ្នកឯទៀតកំពុងរង់ចាំអភិបាលបណ្តោះអាសន្ន ក្រុមហ៊ុន MFone លក់ទ្រព្យសម្បត្តិរបស់ក្រុមហ៊ុន ដើម្បីបានលុយបើកឲ្យបុគ្គលិក។
ជាទូទៅ នីតិវិធីក្នុងដំណើរការលក់ទ្រព្យសម្បត្តិក្រុមហ៊ុន ត្រូវបានអនុញ្ញាតពីតុលាការរួចហើយ ក៏ប៉ុន្តែគេនៅពុំទាន់ស្វែងរកអ្នកទិញទ្រព្យសម្បត្តិ ក្រុមហ៊ុនដែលនៅសេសសល់ទាំងនេះបាននៅឡើយ។ ទោះជាយ៉ាងនេះក្តី លោក នឹម សូលីដា តំណាងប្រតិភូបុគ្គលិក បានបញ្ជាក់ថា លោកបានធ្វើលិខិតទៅកាន់ក្រុមហ៊ុនមេនៅឯប្រទេសថៃ និងប្រទេសសិង្ហបុរី គឺ Asia Holding និងThaicom ដើម្បីឲ្យក្រុមហ៊ុនទូរគមនាគមន៍ដ៏ធំនេះ បញ្ចេញសាច់ប្រាក់បើកឲ្យបុគ្គលិកកម្មករ ដែលបានបាត់បង់ប្រាក់ខែកន្លងមក។ តំណាងបុគ្គលិករូបនេះបញ្ជាក់ថាក្រុមហ៊ុនធំរបស់ MFone បានយល់ព្រមហើយ ក្នុងការផ្តល់ប្រាក់សម្រាប់ដោះស្រាយ បើកឲ្យបុគ្គលិក MFone ដោយគ្រាន់តែរង់ចាំមេធាវីធ្វើការឲ្យបានច្បាស់លាស់សិន។
លោក វង្ស សុវណ្ណ អគ្គលេខាធិការរងគណៈកម្មការដោះស្រាយបាតុកម្ម កូដកម្ម គ្រប់រូបភាពបានប្រាប់ RFI ថាគណៈកម្មការរបស់លោក ក៏បានជំរុញផងដែរ ឲ្យមានការដោះស្រាយ ឲ្យបានលឿន ក៏ប៉ុន្តែនីតិវិធីនៃការដោះស្រាយបញ្ហាក្ស័យធន ដែលមិនដែលកើតមាននៅស្រុកខ្មែរមានលក្ខណៈស្មុគស្មាញបន្តិច។
សូមរំលឹកថាក្រុមហ៊ុន MFone បានប្រកាសក្ស័យធនកាលពីចុងឆ្នាំ ២០១២កន្លងទៅ និងពុំមានសកម្មភាពការងារទាំងស្រុងនៅខែមីនា ឆ្នាំ២០១៣ កន្លងទៅនេះ បណ្តាលឲ្យមានកូដកម្មកើតឡើងជាច្រើនលើកពីសំណាក់បុគ្គលិក កម្មករ។
ទោះជាយ៉ាងនេះក្តី គេរំពឹងថាថវិកាសម្រាប់ដោះស្រាយ និងបើកជូនដល់បុគ្គលិកទាំងអស់ នឹងត្រូវចាត់ទុកជាអាទិភាព ដោយសារបុគ្គលិកមួយចំនួនកំពុងជួបប្រទះនឹងបញ្ហាជីវភាពធ្ងន់ធ្ងរ។ តាមការគណនា ទឹកប្រាក់ចំនួន ៤,៤លានដុល្លារ នឹងត្រូវចំណាយសម្រាប់ប្រាក់បំណាច់ ប្រាក់អតីតភាព ប្រាក់បញ្ឈប់ពីការងារ និងប្រាក់អត្ថប្រយោជន៍ផ្សេងៗទៀត របស់បុគ្គលិក បន្ទាប់ពីក្រុមហ៊ុនក្ស័យធន។
តាមការប៉ាន់ប្រមាណ ក្រុមហ៊ុន MFone បានជំពាក់បំណុលសរុបប្រមាណជា ១៦០លាន ដុល្លារ ក៏ប៉ុន្តែទ្រព្យសម្បត្តិរបស់ក្រុមហ៊ុនទាំងអស់ ត្រូវគេរកឃើញតែជាង ១០០លានដុល្លារបន្តិចបន្តួចប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ