សាលាក្តីខ្មែរក្រហមកាត់បន្ថយបុគ្គលិក១០ភាគរយ
សាលាក្តីខ្មែរក្រហមបានសម្រេចកាត់បន្ថយបុគ្គលិកភាគីកម្ពុជាចំនួន ១០ ភាគរយចាប់ពីដើមខែកក្កដានេះតទៅក្នុងចំណោមបុគ្គលិកសរុបចំនួន ២៦៧ នាក់ដែលសាលាក្តីមានបច្ចុប្បន្ន។ បុគ្គលិកចំនួនជិត ៣០ នាក់បានរងផលប៉ះពាល់ដោយសារការកាត់បន្ថយនេះ។ សាលាក្តីក៏គ្រោងកាត់បន្ថយបុគ្គលិក ១០ ភាគរយទៀតនៅដំណាច់ឆ្នាំ ២០១៣។ មូលហេតុគឺដោយសារបញ្ហាថវិកា និងតម្រូវការជាក់ស្តែងរបស់សាលាក្តី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ចាប់ពីដើមខែកក្កដានេះតទៅ បុគ្គលិកដែលធ្លាប់បម្រើការឲ្យសាលាក្តីខ្មែរក្រហមចំនួន១០% ត្រូវជាប្រមាណ ៣០ នាក់ត្រូវបានរដ្ឋបាលសាលាក្តីសម្រេចមិនបន្តកិច្ចសន្យាការងារជូនទៀតទេ។ ចំណែកឯបុគ្គលិកដែលនៅបន្តបម្រើការងារតទៅទៀតនោះក៏មិនទាន់ទទួលបានប្រាក់ខែដែរ ពីព្រោះតែសាលាក្តីនេះអស់ថវិកាសម្រាប់ដំណើរការទៅហើយ។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហមបានប្រាប់វិទ្យុបារាំងអន្តរជាតិនៅថ្ងៃនេះថា មូលហេតុនៃការកាត់បន្ថយបុគ្គលិកនេះគឺដោយសារតែសាលាក្តីជួបបញ្ហាថវិកានិងដោយសារតម្រូវការជាក់ស្តែងរបស់សាលាក្តីផងដែរ ពោលគឺជនជាប់ចោទនៅសល់តែពីរនាក់ប៉ុណ្ណោះ។សាលាក្តីខ្មែរក្រហមក៏គ្រោងកាត់បន្ថយបុគ្គលិកបន្ថែម ១០%ទៀតនៅដំណាច់ឆ្នាំ ២០១៣ នេះ។
សូមបញ្ជាក់ថា នៅដំណាច់ខែមិថុនានេះ បុគ្គលិកជាតិទាំងអស់នៅសាលាក្តីខ្មែរក្រហមមិនបានទទួលប្រាក់បៀវត្សរ៍របស់ពួកគេឡើយ ខណៈដែលប្រាក់ខែខែឧសភានៅមិនទាន់បើកបានគ្រប់ចំនួនផង។ បើតាមការអះអាងរបស់អ្នកនាំពាក្យនៃតុលាការខ្មែរក្រហម នេះជាស្ថានភាពអាក្រក់មួយ ពីព្រោះថា ខណៈដែលសាលាក្តីគ្មានថវិកាសម្រាប់បើកប្រាក់ខែជូនបុគ្គលិកខាងភាគីកម្ពុជាទៀតនោះ សាលាក្តីក៏នៅមិនទាន់បានទទួលការសន្យាផ្តល់ជំនួយពីប្រទេសផ្តល់ជំនួយណាមួយនៅឡើយដែរ។
លោក នេត្រ ភក្ត្រាបន្តថា ភាគីជាតិនៃសាលាក្តីខ្មែរក្រហមនៅត្រូវការថវិកាជិត ៤លានដុល្លារទៀតសម្រាប់ការប្រើប្រាស់រហូតដល់ដំណាច់ឆ្នាំ២០១៣នេះ។ រីឯថវិការបស់ភាគីអន្តរជាតិក៏នឹងអស់នៅក្នុងខែកញ្ញាខាងមុខនេះដែរ។ បញ្ហាថវិកាគឺជាចំណោទដ៏ធំធេងមួយសម្រាប់សាលាក្តីកាត់ទោសអតីតមេដឹកនាំខ្មែរក្រហម។ ចំណោទថវិកាដែលកើតឡើងខណៈដែលជនជាប់ចោទកាន់តែមានវ័យចាស់ជរាទៅហើយនោះបានធ្វើឲ្យអនាគតរបស់សាលាក្តីនេះស្ថិតក្នុងភាពមិនច្បាស់លាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ