សាលារាជធានីភ្នំពេញធ្វើយុទ្ធនាការស្តារលូទ្រង់ទ្រាយធំ
សាលារាជធានីភ្នំពេញ នឹងបើកយុទ្ធនាការស្តារលូ ទ្រង់ទ្រាយធំជាលើកដំបូងបន្ទាប់ពី ទីក្រុងដ៏សំខាន់របស់ប្រទេសមួយនេះបានផ្លាស់ប្តូរចៅហ្វាយក្រុងចាស់ លោក កែប ជុតិមា ដាក់ចៅហ្វាយក្រុងថ្មីលោក ប៉ា សុជាតិវង្ស កាលពីខែមិថុនា ឆ្នាំ២០១៣ កន្លងទៅនេះ។ ការសម្រេចបើកយុទ្ធនាការស្តារលូនៅក្នុងរាជធានីដែលនឹងប្រព្រឹត្តិទៅនៅថ្ងៃ សៅរ៍ទី២៤ ខែសីហាស្អែកនេះ បន្ទាប់ពីហេដ្ឋារចនាសម្ព័ន្ធនៅក្នុងទីក្រុងភ្នំពេញ បានលិចលង់នៅពេលមានភ្លៀងធ្លាក់ម្តងៗនៅរដូវវស្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
សាលារាជធានីភ្នំពេញនឹងបើកយុទ្ធនាការទ្រង់ទ្រាយធំមួយ នៅទូទាំងក្រុង នៅថ្ងៃសៅរ៍ទី ២៤សីហាស្អែកនេះ ដើម្បីស្តារលូ និងជួសជុលលូឡើងវិញ បន្ទាប់ពីគេពិនិត្យឃើញថាមានការកកស្ទះ ហើយបណ្តាលឲ្យជន់លិចយ៉ាងធ្ងន់ធ្ងរនៅពេលមានភ្លៀងធ្លាក់។ យុទ្ធនាការនេះមានការចូលរួមពីមន្ទីរចំណុះឲ្យសាលាក្រុង សាលាខ័ណ្ឌទាំង៩ និងមានការចូលរួមពីប្រជាពលរដ្ឋនិងផ្នែកឯកជនផងដែរ។
តាមគម្រោងអភិបាលរាជធានីភ្នំពេញ លោក ប៉ា សុជាតិវង្ស នឹងមានវត្តមានដឹកនាំយុទ្ធនាការនេះនៅតាមដងមហាវិថី ម៉ៅ សេទុង ម្តុំឃ្លាំងរំសេវ។
ក្នុងសេចក្តីជូនដំណឹងមួយរបស់សាលាក្រុងភ្នំពេញកាលពីសប្តាហ៍មុនឲ្យដឹងថា នៅក្នុង
រដូវវស្សានេះ នៅរាជធានីភ្នំពេញបានទទួលរងនូវទឹកភ្លៀងធ្លាក់យ៉ាងខ្លាំង បណ្តាលឲ្យលិចលង់នៅតាមដងវិថីនានា ក្នុងរាជធានីភ្នំពេញ បើទោះបីជាកន្លងមកសាលារាជធានីភ្នំពេញបាននិងកំពុងខិតខំធ្វើការកែលម្អ និងស្តារប្រព័ន្ធលូជាបន្តបន្ទាប់ក៏ដោយ។
ចំពោះការលិចលង់នេះ កត្តាបង្កឲ្យមានផលប៉ះពាល់ជាច្រើនដូចជា ខូចខាតដល់ហេដ្ឋារចនាសម្ព័ន្ធ បង្កការលំបាកដល់ការធ្វើដំណើររបស់ប្រជាពលរដ្ឋ ការរស់នៅ និងការប្រកបអាជីវកម្មផ្សេងៗនៅតាមតំបន់មួយចំនួន ដែលទទួលរងនូវការលិចលង់ពីជំនន់ទឹកភ្លៀង។
ហើយនោះត្រូវបានមន្ត្រីសាលាក្រុងពិនិត្យឃើញថា អណ្តូងលូភាគច្រើនត្រូវបានកកស្ទះដោយកំណកដី សំរាមនៅមាត់និងនៅក្នុងអណ្តូងលូរួមទាំងមានការថែទាំសំអាតមិនបានដិតដល់ផងដែរ។
ចាប់តាំងពីរដូវភ្លៀងបានចូលមកកាលពីខែមិថុនាឆ្នាំ ២០១៣ កន្លងទៅនេះ គេសង្កេតឃើញ
វិថីមួយចំនួន នៅទីក្រុងភ្នំពេញ រងនូវការលិចលង់ធ្ងន់ធ្ងរក្លាយទៅជាស្ទឹង រយៈពេលប៉ុន្មានម៉ោង អំឡុងពេល និងក្រោយពេលភ្លៀងធ្លាក់។ អ្នកធ្វើដំណើរដោយសារម៉ូតូមួយចំនួនមិនអាចធ្វើទៅបាន ហើយអ្នកខ្លះត្រូវបណ្តើរម៉ូតូដែលរលត់ក្នុងទឹក។
ទិដ្ឋភាពបែបនេះធ្វើឲ្យមានការរិះគន់ជាច្រើននៅតាមទីសាធារណៈ ក៏ដូចជានៅលើទំព័រហ្វេសប៊ុក ព្រមទាំងរូបភាពទឹកលិចខ្លះត្រូវគេកាត់តបន្ថែម ដោយមានត្រីដូហ្វាំងកំពុងលេងទឹក បន្ថែមរូបនាវា និង រូបទូកលក់ទំនិញជាដើម។ ដោយភាពច្នៃប្រឌិតទាំងអស់នេះ ព្រមជាមួយការធ្វើអត្ថាធិប្បាយផងនោះ សុទ្ធសឹងទម្លាក់កំហុសទៅលើការអភិវឌ្ឍន៍របស់ចៅហ្វាយក្រុងចាស់ លោក កែប ជុតិមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ