ថៅកែរោងចក្រអះអាងមិនចរចាបញ្ហាប្រាក់ខែឡើងវិញទេ
ខណៈដែលក្រុមសហជីព កំពុងតែប្រកូកប្រកាស ប្រមូលគ្នា ធ្វើកូដកម្មទ្រង់ទ្រាយធំ នៅទូទាំងប្រទេស ដើម្បីសុំអោយមានការចចាឡើងវិញ អំពីការដំឡើងប្រាក់ឈ្នួលគោល១៦០ដុល្លារ ក្នុងមួយខែ ខាងភាគីនិយោជកបានបញ្ជាក់អះអាងថា គ្មានទៀតឡើយការចចាឡើងវិញអំពីបញ្ហាប្រាក់ឈ្នួលអប្បបរមា។ ប្រឈមនឹងស្ថានភាពនេះ ក្រសួងការងារបានអំពាវនាវឲ្យភាគីទាំងពីរ ពិចារណាឡើងវិញដោយគិតគូរផលប្រយោជន៍រួម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
គ្មានទេការចរចាឡើងវិញនិយាយអំពីប្រាក់ឈ្នួលអប្បបរមារបស់កម្មករ។ នេះបើយោងតាមការអះអាងរបស់លោក កេន លូ អគ្គលេខាធិការសមាគមថៅកែរោងចក្រកាត់ដេរកម្ពុជាដែលបានប្រាប់វិទ្យុបារាំងអន្តរជាតិនៅថ្ងៃអង្គារទី ១៨ កុម្ភៈនេះ។
ទាក់ទងទៅនឹងសេចក្តីអំពាវនាវរបស់សហជីពដែលសូមអោយកម្មករធ្វើពហិការមិនធ្វើការបន្ថែមម៉ោង និងឲ្យកម្មករចូលរួមធ្វើកូដកម្មទ្រង់ទ្រាយធំនោះ លោក កេន លូ បញ្ជាក់ថា នេះគឺជាសិទ្ធិសម្រេចចិត្តរបស់កម្មករ ប្រសិនចង់ធ្វើកូដកម្មសូមអោយពួកគាត់រៀបចំសុំធ្វើតាមនិតិវិធីចុះ។ ប៉ុន្តែ ប្រសិនបើមានបញ្ហាហិង្សាកើតឡើង នឹងមានការបញ្ឈប់បុគ្គលិកណាដែលបង្កបញ្ហា។
តំណាងនិយោជកក៏បានសម្តែងការព្រួយបារម្ភដែរ អំពីការខាតបង់ប្រាក់ចំណេញរបស់រោងចក្រ ក្នុងកំឡុងពេលធ្វើកូដកម្ម និងពហិកាមិនធ្វើការរបស់ក្រុមកម្មករ។ លោក វង្ស សុវណ្ណ អគ្គលេខាធិការងនៃគណៈកម្មការដោះស្រាយបញ្ហាបាតុកម្ម កូដកម្ម នៅគ្រប់មុខសញ្ញានៃក្រសួងការងារ និងបណ្តុះបណ្តាលវិជ្ជាជីវៈ បានអះអាងថា គណៈកម្មការជាតិស្រាវជ្រាវប្រាក់ឈ្នួលអប្បបរមា កំពុងតែសិក្សាអំពីបញ្ហានេះ។ លោកបានអំពាវនាវឲ្យភាគីទាំងពីរពិចារណាឡើងវិញ ដោយគិតពីផលប្រយោជន៍រួម។
សូមបញ្ជាក់ថា ក្រុមសហពន្ធ័សហជីពនិងសមាគមចំនួន ១៨អង្គភាព បានប្រកាសថា នឹងរៀបចំធ្វើកូដកម្មទ្រង់ទ្រាយធំទូទាំងប្រទេសចាប់ពីថ្ងៃទី ១២ ដល់ថ្ងៃទី១៩ ខែមីនា ខាងមុខនេះ។ នេះបើតាមសេចក្តីអំពាវនាវរួម ចុះថ្ងៃទី១៣កុម្ភៈ ដែលទើបតែផ្សព្វផ្សាយដល់អ្នកសារពត៌មាន នៅថ្ងៃទី១៧កុម្ភៈ។
សេចក្តីអំពាវនាវរួមគ្នាដែលចែកផ្សាយកាលពីថ្ងៃចន្ទ បានស្នើសុំឲ្យសមាជិក កម្មករនិយោជិត មន្ត្រីរាជការ ចូលរួមធ្វើពហិការ មិនធ្វើការថែមម៉ោង នៅគ្រប់បណ្តារោងចក្រសហគ្រាស និងគ្រឹះស្ថានទាំងអស់ ចាប់ពីថ្ងៃទី ២៤ ដល់ថ្ងៃទី ២៨កុម្ភៈ ព្រមទាំងស្នើសុំឲ្យគ្រប់ភាគី ដែលមានអារម្មណ៍ថា ខ្លួនកំពុងជូបភាពអយុត្តិធម៌ ចូលរួមវេទិកាសាធារណៈ នៅថ្ងៃទី៨មីនា នៅទីលានប្រជាធិបតេយ្យ និងប្រកាសធ្វើកូដកម្មទូទាំងប្រទេសនាខែមីនា ដើម្បីស្នើឲ្យមានការចរចាដំឡើងប្រាក់ឈ្នួលគោល ១៦០ ដុល្លារ ក្នុងមួយខែឡើងវិញ ទាមទារសុំឲ្យដោះលែងជនជាប់ចោទទាំង ២១ នាក់ និងទំលាក់ចោលការចោទប្រកាន់ជនទាំង ២៣ នាក់ ត្រូវដាក់ទោសដល់ជនល្មើសដែលប្រើហិង្សាជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ