សហព័ន្ធសហជីពកម្មករ និងសមាគម ១៨ ស្នើឲ្យកម្មករផ្តើមធ្វើកូដកម្មជាថ្មី តាមរូបភាពផ្សេង
សហព័ន្ធសហជីពកម្មករ និងសមាគម ចំនួន ១៨ ស្ថាប័ន បានរួមគ្នា អំពាវនាវមួយ កាលពីថ្ងៃទី ១៣កុម្ភៈ ដែលអ្នកកាសែតទើបតែទទួលបាននៅថ្ងៃទី ១៧កុម្ភៈនេះ អំពីសេចក្តីអំពាវនាវនៃការធ្វើកូដកម្មជាថ្មី។ ជាសេចក្តីអំពាវនាវ ឲ្យកម្មកររោងចក្រកាត់ដេរ ផ្តើមធ្វើកូដកម្មពីថ្ងៃទី ២៤កុម្ភៈ តាមរូបភាពថ្មី ដោយមិនមែនជាការដើរហែក្បូនកូដកម្ម បិទផ្លូវដូចកាលពីលើកមុននោះទេ។
ចុះផ្សាយនៅថ្ងៃ៖
ស្តាប់ - ០២:២២
សហព័ន្ធសហជីពកម្មករ និងសមាគមចំនួន ១៨ បានចេញសេចក្តីអំពាវនាវរួមគ្នាមួយ ស្នើសុំឲ្យសមាជិក កម្មករនិយោជិត មន្រ្តីរាជការ ចូលរួមធ្វើពហិការ មិនធ្វើការថែមម៉ោង នៅគ្រប់បណ្តារោងចក្រសហគ្រាស និងគ្រឹះស្ថានទាំងអស់ ចាប់ពីថ្ងៃទី ២៤ ដល់ថ្ងៃទី ២៨កុម្ភៈ។ សេចក្តីអំពាវនាវនោះ ក៏បានស្នើសុំឲ្យគ្រប់ភាគី ដែលមានអារម្មណ៏ថា ខ្លួនកំពុងជូបភាពអយុត្តិធម៌ ចូលរួមវេទិកាសាធារណៈ នៅថ្ងៃទី៨មីនា នៅទីលានប្រជាធិបតេយ្យ។ ជាវេទិកា ដែលសហជីព ស្នើសុំ យល់ថា នឹងមានការចូលរួមពី កម្មករ មន្ត្រីរាជការ ដោយមានការអញ្ចើញលោក ស ខេង លោក គាត ឈន់ លោក អ៊ិត សំហេង និងលោក ជីវ កេង តំណាងខាងរដ្ឋាភិបាល មកឆ្លើយបំភ្លឺនៅមុខមហាជន ជុំវិញករណីមិនអាចតម្លើងប្រាក់ខែ ដល់កម្មករ និងមន្ត្រីរាជការ។
នៅក្នុងសេចក្តីប្រកាសនោះ សហជីព ថែមទាំងព្រមានទៀតថា ប្រសិនបើនៅតែមិនមានដំណោះស្រាយ ចំពោះការតំលើងប្រាក់ខែគោលកម្មករ ១៦០ដុល្លា ក្នុងមួយខែ និងការតំលើងប្រាក់ខែជូនគ្រូបង្រៀន និងមន្ត្រីរាជការ នោះកូដកម្មទ្រង់ទ្រាយឌំ នឹងធ្វើឡើង នៅទូទាំងប្រទេស ចាប់ពីថ្ងៃទី ១២មិនា ដល់ថ្ងៃទី ១៥មិនា ដោយកម្មករនិយោជិត និងមន្ត្រីរាជការ ធ្វើកូដកម្មមិនមកធ្វើការ។ និងពីថ្ងៃទី ១៦ ដល់ ១៩មិនា កម្មករនិយោជិត នឹងមកកន្លែងធ្វើការ ប៉ុន្តែមិនបំពេញការងារ តាមមុខជំនាញខ្លួន។
សេចក្តីអំពាវនាវរបស់ សហព័ន្ធសហជីពកម្មករ និងសមាគម ទាំង ១៨នេះ ត្រូវបានបញ្ជាក់ថា គឺក្នុងគោលបំណង ចំនួន៧ធំៗ ដែលរួមមាន ទាមទារសុំឲ្យដោះលែងជនជាប់ចោទទាំង ២១ នាក់ និងទំលាក់ចោលការចោទប្រកាន់ជនទាំង ២៣ នាក់។ ស្នើ ឲ្យមានការចរចាតម្លើងប្រាក់ឈ្នួលគោល ១៦០ ដុល្លារ ក្នុងមួយខែឡើងវិញ។ ទាមទារឲ្យដាក់ទោសដល់ជនល្មើស ដែលបានប្រើហិង្សា និងសម្លាប់កម្មករ កាលពីដើមខែមករា ព្រមទាំងផ្តល់សំណងជំងឺចិត្តដល់ជនរងគ្រោះ ដែលបានបាត់បង់ជីវិត រងរបួស និងជាប់ឃុំឃាំង។
ក្នុងនោះ សេចក្តីអំពាវនាវ ក៏ផ្តោតសំខាន់ ឲ្យរដ្ឋាភិបាល ដកបម្រាម នៃការជួបប្រជុំជាសាធារណៈ របស់ប្រជាពលរដ្ឋចេញ។ សុំឲ្យតំណាងក្រុមហ៊ុន ដកបណ្តឹង ដែលប្រឆាំងសហជីព និងកម្មករនិយោជិត ហើយទទួលយកកម្មករ ដែលបានបញ្ឈប់ពីការងារឲ្យចូលធ្វើការវិញ ព្រមទាំងបង់ប្រាក់រំលឹក ដល់ពួកគេគ្រប់គ្នា។ និង ថែមទាំងសុំឲ្យនិយោជកណា ដែលបានកាត់ប្រាក់ឈ្នួល និងប្រាក់រង្វាន់ទៀងទាត់ ក្នុងអំឡុងពេលធ្វើកូដកម្មកន្លងមក ត្រូវផ្តល់ជូនដល់កម្មករវិញ។
យ៉ាងណាក៏ដោយ នៅមិនទាន់មានប្រតិកម្មតាមសេចក្តីថ្លែងការណ៏ បែបណាពីភាគីនិយោជក និងមន្ត្រីក្រសួងការងារ ជុំវិញគម្រោងធ្វើកូដកម្ម ជាថ្មីទៀតរបស់កម្មករ និងមន្ត្រីរាជការ ដែលត្រូវបានប្រកាស នាពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ