ប្រជាជនកម្ពុជាខ្លះ បួសសងគុណឪពុកម្តាយ ខ្លះដើរដើម្បីសន្តិភាព ក្នុងឱកាសបុណ្យវិសាខបូជា
នៅខេត្តសៀមរាប ប្រជាជនកម្ពុជាមួយចំនួន បានកោរសក់បួសសងគុណឪពុកម្តាយ ក្នុងឱកាសបុណ្យវិសាខបូជា ឆ្នាំនេះ។ នៅឯភ្នំពេញឯណេះវិញ ប្រជាជនខ្លះទៀត គ្រោងធ្វើធម្មយាត្រាដើម្បីសាមគ្គីភាព និងសន្តិភាព។ ទាំងនេះជាការប្រារព្ធពិធីបុណ្យពុទ្ធសាសនា ដែលបានក្លាយជាបុណ្យអន្តរជាតិ នៅឆ្នាំ១៩៩៩។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងឱកាសបុណ្យវិសាខបូជាឆ្នាំនេះ យុវជនកម្ពុជា៨៣២នាក់ មកពីខេត្តក្រចេះ ព្រះសីហនុ ព្រៃវែង រាជធានីភ្នំពេញ និងសៀមរាបផ្ទាល់ ដែលមានសទ្ធាជ្រះថ្លាក្នុងព្រះពុទ្ធសាសនា បានសម្រេចចិត្តសាងផ្នួស រយៈពេលមួយសប្តាហ៍ ដើម្បីបំពេញកតញ្ញូតាធម៌ ចំពោះឪពុកម្តាយរបស់ខ្លួន និងដើម្បីស្វែងយល់អំពីព្រះធម៌ ជាពិសេសសីលធម៌ និងចរិយាធម៌ក្នុងព្រះពុទ្ធសាសនា។ នេះបើយោងតាមទីភ្នាក់ងារសារព័ត៌មានកម្ពុជា ដែលបានឱ្យដឹងថា ការបំបួសយុវជនទាំងនេះ បានចាប់ផ្តើមពីថ្ងៃទី១០ រហូតដល់ថ្ងៃទី១៥ ខែឧសភា ឆ្នាំ២០១៤ នៅវត្តអង្គរខាងត្បូង ក្នុងខេត្តសៀមរាប។
នៅឯរាជធានីភ្នំពេញវិញ ក្រុមការងារដើម្បីសន្តិភាព ដែលជាបណ្តាញអ្នកស្ម័គចិត្ត នឹងធ្វើធម្មយាត្រា ដើម្បីប្រារព្ធបុណ្យវិសាខបូជានៅថ្ងៃអង្គារ ទី១៣ ខែឧសភានេះ ដោយមានអ្នកចូលរួមជាង៣០០នាក់។ ដោយធ្វើការជួបជុំយុវជន ពុទ្ធសាសនិក ឥស្លាមសាសនិក និងគ្រិស្តសាសនិក នៅចំនុចវត្តភ្នំ វេលាម៉ោង០៧និង៣០នាទីព្រឹក ធម្មយាត្រានឹងចេញដំណើរទៅព្រះអង្គដងកើ មុខព្រះបរមរាជវាំង មុននឹងបញ្ចប់កម្មវិធីនៅម៉ោង១០និង៣០នាទីព្រឹក។ បុណ្យវិសាខបូជាបានក្លាយជាបុណ្យអន្តរជាតិ ដោយសេចក្តីសម្រេចរបស់មហាសន្និបាទអង្គការសហប្រជាជាតិ នៅឆ្នាំ១៩៩៩។
បើតាមបណ្តាញក្រុមការងារដើម្បីសន្តិភាព ការរៀបចំព្រឹត្តិការណ៍នៅព្រឹកថ្ងៃទី១៣ ខែឧសភា មានគោលបំណងពង្រឹងសាមគ្គីភាពយ៉ាងស្និទ្ធស្នាល រវាងសាសនិកនានា ដែលស្រឡាញ់សន្តិភាព ដើម្បីផ្សព្វផ្សាយមេត្តាធម៌ដល់សព្វសត្វទូទាំងសាកលលោកឱ្យយល់ដឹងអំពីគោលការណ៍នៃសន្តិភាពរវាងគ្នានិងគ្នា។ បណ្តាញនេះក៏អញ្ជើញប្រជាជនទូទៅឱ្យចូលរួមក្នុងធម្មយាត្រានេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ