ការដង្ហែក្បួននៅថ្ងៃវិសាខបូជា ត្រូវរារាំងដោយ អាជ្ញាធរ
ក្បួនដង្ហែធម្មយាត្រាវិសាខបូជា ដែលមានអ្នកចូលរួម មកពីព្រះសង្ឃសាសនាព្រះពុទ្ធសាសនាគ្រិស្ត និងអ្នកកាន់សាសនាឥស្លាម ត្រូវបានអាជ្ញាធរសមត្ថកិច្ច រារាំង និងបំបែកការជួបជុំ នៅម្តុំវត្តភ្នំ នាព្រឹកថ្ងៃទី១៣ឧសភានេះ។ តាមគម្រោង ក្បួនធម្មយាត្រាវិសាខបូជា នៅភ្នំពេញ នាព្រឹកនេះ ក្នុងបំណងកសាងសន្តិភាពនៅកម្ពុជា បញ្ឃប់អំពើហិង្សា ពិសេសក្នុងពេលជាប់គាំងនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ក្រុមប្រជាពលរដ្ឋស្រលាញ់សន្តិភាព ប្រមាណជា ៣០០នាក់ ត្រូវបានកំលាំងសន្តិសុខសាលាខណ្ឌដូនពេញបំបែក កាលពីព្រឹកមិញនេះ នៅក្នុងការប៉ុនប៉ងហែក្បួនសាសនាមួយ ដើម្បីប្រារព្ធពិធីវិសាខបូជាជាតិ និងអន្តរជាតិ។ ក្រុមការងារមានចាស់ៗ និងយុវជនដែលមានកាន់បដានៅនឹងដៃ រួមទាំងទង់សាសនាផងនោះ បានត្រៀមចេញដំណើរនៅម៉ោង ៨ព្រឹក ក៏ប៉ុន្តែពួកគេត្រូវបានបំបែកកន្លះម៉ោងមុនការចាប់ផ្តើម។
តាមគម្រោង ក្រុមអ្នកស្រលាញ់សន្តិភាពត្រូវធ្វើការដង្ហែក្បួនចាប់ពីរមណីយដ្ឋានវត្តភ្នំឆ្ពោះទៅកាន់ព្រះអង្គដងកើ មុខព្រះបុរមរាជវាំង ដើម្បីជាការពង្រឹងសាមគ្គីភាព និងភាពស្និទ្ធស្នាល រវាងពុទ្ធសាសនិក ឥស្លាមសាសនិក និងគ្រិស្តសាសនិក រួមនឹងសាសនាដទៃទៀតនៅក្នុងប្រទេសកម្ពុជា ក៏ដូចជានៅលើសកលលោកក្នុងការចូលរួមផ្សព្វផ្សាយមេត្តាធម៌ បញ្ឈប់អំពើហិង្សារ និងគោលការណ៍សន្តិភាពរវាងគ្នានិងគ្នា នេះបើតាមលោកស្រី ប្រាក់ សុខានី តំណាងក្រុមការងារដើម្បីសន្តិភាព។
ដោយមិនមានអត្ថាធិប្បាយពីការពីហែក្បួនសន្តិភាពរបស់ប្រជាពលរដ្ឋទាំងនោះ លោក
ឡុង ឌីម៉ង់ អ្នកនាំពាក្យសាលារាជធានីភ្នំពេញបានបញ្ជាក់ប្រាប់វិទ្យុបារាំងអន្តរជាតិ RFI នៅថ្ងៃនេះដែរថា អាជ្ញាធរមិនអនុញ្ញាតឲ្យមានការហែក្បួនណាមួយដែលមិនមានការសុំច្បាប់ជាមុនឡើយ។
ក៏ប៉ុន្តែ លោកស្រី ប្រាក់ សុខានី តំណាងឲ្យអ្នកហែក្បួនបានរំលឹកថា ក្រុមការងារសន្តិភាពរបស់លោកស្រី បានជូនដំណឹងទៅសាលារាជធានីភ្នំពេញ កាលពីថ្ងៃសុក្រសប្តាហ៍មុនម្ល៉េះ។
លោកស្រីចោទ អាជ្ញាធរថា មិនបានជួយសម្រួលដល់សកម្មភាពនេះទេ ផ្ទុយទៅវិញបែរជា
បង្កើតឧបសគ្គរារាំងមិនអាចឲ្យពួកគេហែក្បួនបាន ដូចជាការកំណត់ឲ្យមានហត្ថលេខា ឬស្នាមមេដៃពីអ្នកចូលរួម ឬថតចំលងអត្តសញ្ញាណបណ្ណអ្នកចូលរួមជាដើម។
ទោះជាយ៉ាងនេះក្តីក្រុមការងារដើម្បីសន្តិភាព ដែលខកខានមិនបានហែក្បួនវិសាខបូជា
ព្រឹកមិញនេះ នឹងចេញផ្សាយសេចក្តីថ្លែងការណ៍មួយនៅល្ងាចនេះនៅសង្កាត់បឹងកេងកង ទាក់ទងទៅនឹងព្រឹត្តិការណ៍ដែលបានកើតឡើងកាលពីព្រឹក និងស្នើសុំឲ្យអាជ្ញាធរប្រគល់បដា
និងសំភារៈផ្សេងៗដែលរឹបអូសបាន ឲ្យទៅពួកគេវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ