កូដកម្ម របស់បុគ្គលិកក្រុមហ៊ុនសាំងកាល់តិច ឈានចូល ដល់សប្តាហ៍ទី២
គិតត្រឹមថ្ងៃចន្ទ ទី ១៩ឧសភានេះ គឺមានរយៈពេល៨ថ្ងៃហើយ ដែលបុគ្គលិកក្រុមហ៊ុនប្រេងសាំងកាល់តិច នៅតែបន្តកូដកម្មមិនចូលធ្វើការ ហើយស្ថានីយ៍ប្រេងសាំងកាល់តិច ទាំង ១៨សាខា ក្នុងទីក្រុងភ្នំពេញ នៅតែបន្តបិទទ្វារ។ តំណាងក្រុមហ៊ុន Chevron បុគ្គលិកក្រុមហ៊ុនសាំងកាល់តិច និងសហជីព គ្រោងជួបចរចារគ្នាជាថ្មី ក្រោមការសម្របសម្រួលពីក្រសួងការងារនៅថ្ងៃអង្គារទី ២០ ឧសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ដោយសារមិនទាន់មានដំណោះស្រាយ បុគ្គលិកក្រុមហ៊ុនសាំងកាល់តិច នៅតែបន្តធ្វើកូដកម្ម ដោយមិនចូលធ្វើការដដែល។ កូដកម្មនៅតែបន្ត បើទោះបីជាតំណាងក្រុមហ៊ុនសាំងកាល់តិច និង បុគ្គលិកបានព្រមព្រៀងគ្នាចំនួន២ចំណុចកាលពីសប្តាហ៍មុនក៏ដោយ។ ជំហរមិនចូលធ្វើការនេះ ត្រូវបានសហជីពបញ្ជាក់ថា ដោយសារតែតំណាងក្រុមហ៊ុន ហាក់នៅស្ទាក់ស្ទើរ មិនទាន់បានសរសេរជាលាយលក្ខណ៍អក្សរ និងកិច្ចសន្យាត្រឹមត្រូវ ដោយគ្រាន់តែព្រមព្រៀងគ្នា តាមតែការនិយាយ។
លោក ស ម៉ូរ៉ា ប្រធាន សហព័ន្ធសហជីពកម្មករចំណីអាហារ និងសេវាកម្មកម្ពុជា បានប្រាប់វិទ្យុបារាំងអន្តរជាតិ នៅថ្ងៃចន្ទនេះថា មកដល់ថ្ងៃនេះ បុគ្គលិកក្រុមហ៊ុនសាំងកាល់តិច នៅតែបន្តលើកបដានៅមុខស្ថានីយ៍ប្រេងសាំង ក្នុងទីក្រុងភ្នំពេញ និងនៅពេលរសៀល ពួកគេនៅផ្ទះ មិនមកធ្វើការ។ ប្រធានសហព័ន្ធសហជីពរូបនេះ បានឲ្យដឹងផងដែរថា នៅវេលាម៉ោង ២រសៀល ថ្ងៃទី ២០ឧសភាស្អែក តំណាងបុគ្គលិក តំណាងក្រុមហ៊ុន និងសហជីព នឹងជួបចរចារគ្នា ជាលើកទី៣ ក្រោមការជួយសម្របសម្រួល ពីតំណាងក្រសួងការងារ។
សូមបញ្ជាក់ថា នៅក្នុងកិច្ចប្រជុំលើកទី២ តំណាងក្រុមហ៊ុន Chevron និងបុគ្គលិក បានព្រមព្រៀងគ្នា ចំនួន២ ចំណុច ដែលរួមមាន យល់ព្រមទទួលបា្រក់រង្វាន់ ២០ដុល្លា ពីក្រុមហ៊ុន ដែលប្រាក់នេះ នឹងត្រូវបើកជាមួយនឹងប្រាក់បៀវត្សរ៍ ខែឧសភានេះ។ មួយទៀត គឺភាគីទាំងពីរព្រមព្រៀង ទុករយៈ២ខែ អោយក្រុមហ៊ុន សិក្សាស្រាវជ្រាវអំពីការតម្លើប្រាក់ខែ ហើយការតម្លើងនឹងត្រូវគិតចាប់ពីខែមេសាទៅ។
គួររម្លឹកជូនថា កូដកម្មមិនចូលធ្វើការ ដើម្បីទាមទារតម្លើប្រាក់ខែ ១៦០ដុល្លារក្នុងមួយខែ រួមនិងលក្ខខណ្ឌការងារមួយចំនួន របស់បុគ្គលិកក្រុមហ៊ុន Chevron បានអូសបន្លាយចាប់ពីថ្ងៃទី ១២ឧសភាមក ។ ក្រោយបរាជយ័នៃការចចារលើកទី១ ក្រុមបុគ្គលិក របស់ក្រុមហ៊ុនប្រេងសាំងដ៏ធំរបស់អាមេរិកមួយនេះ ក៏បានដាក់ញ្ញត្តិតវ៉ា ដើម្បីសុំអន្តរាគមន៍ពីស្ថានទូតសហរដ្ឋអាមេរិក កាលពីថ្ងៃទី ១៥ឧសភា ។ បុគ្គលិកដែលផ្ទុះកូដកម្មតវ៉ាតម្លើងប្រាក់ឈ្នួលនេះ បានបញ្ជាក់ថា ប្រាក់ខែរបស់ពួកគេទាបជាងក្រុមហ៊ុនលក់ប្រេងសាំងឯទៀត ដែលមានការប្រកួតប្រជែងគ្នា និងអន់ជាងកម្មករកាត់ដេរទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ