បុគ្គលិកក្រុមហ៊ុនប្រេងសាំង កាល់តិច បន្តកូដកម្ម ក្រោយការចរចាមិនបានលទ្ធផល
បុគ្គលិកក្រុមហ៊ុនប្រេងសាំង កាល់តិច នៅថ្ងៃទី ១៤ឧសភានេះ នៅតែបន្តកូដកម្ម តវ៉ាទាមទារដំឡើងប្រាក់ខែ ១៦០ដុល្លា និងប្រាក់ខែទី ១៣ ដោយមិនចូលធ្វើការដដែល បន្ទាប់ពីការចរចា ជាមួយតំណាងក្រុមហ៊ុន Chevron កាលពីថ្ងៃទី ១៣ឧសភានោះ មិនបានជោគជ័យ។ ស្ថានីយ៍ប្រេងសាំង កាល់តិច ទាំងអស់នៅបន្តបិទមិនដំណើរការ ខណៈដែលបុគ្គលិកបន្តលើកបដាទាមទារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
បុគ្គលិកក្រុមហ៊ុនប្រេងសាំង កាល់តិច ប្រមាណជា ២០០នាក់ មកពី ១៨សាខា ស្ថានីយ៍ប្រេងសាំង កាល់តិច ក្នុងទីក្រុងភ្នំពេញ បានជួបជុំប្រមូលផ្តុំគ្នា នៅមុខស្ថានីយ៍សាំងកាល់តិច សាខាស្តុបបូកគោ ដើម្បីទាមទារលក្ខខណ្ឌ ដែលពួកគេបានស្នើសុំដដែល នៅព្រឹកថ្ងៃទី ១៤ឧសភានេះ។ នេះគឺជាថ្ងៃទី ៣ហើយ នៃការតវ៉ា គិតចាប់ពីថ្ងៃទី ១២ឧសភាមក។
នៅថ្ងៃពុធនេះ មានការតវ៉ាតែនៅស្ថានីយ៍ប្រេងសាំងកាល់តិចស្តុបបូកគោ តែមួយប៉ុណ្ណោះ ដោយសារនៅស្ថានីយ៍នេះ បានបើកដំណើរការលក់សាំងឡើងវិញ ដោយក្រុមហ៊ុន បានឲ្យអ្នកគ្រប់គ្រងប្រចាំតំបន់ ធ្វើជាអ្នកចាក់សាំង ស្របពេល ដែលសាខាផ្សេងៗទៀត របស់ក្រុមហ៊ុននេះ នៅបន្តបិទដាក់រនាំង និងដាក់ខ្សែព័ទ្ធ ជុំវិញកន្លែងចាក់សាំង ដោយសារបុគ្គលិកបន្តធ្វើកូដកម្ម។
លោក យឿន រ៉េត ប្រធានសហជីពមូលដ្ឋានប្រចាំក្រុមហ៊ុន Chevron បានប្រាប់វិទ្យុបារាំងអន្តរជាតិថា បុគ្គលិកទាំងអស់ មិនយល់ព្រមទទួលយកសំណើ ដែលក្រុមហ៊ុនបានសម្រេច នៅក្នុងកិច្ចចរចា កាលពីរសៀលថ្ងៃទី ១៣ឧសភានោះទេ។ ប្រធានសហជីពរូបនេះដដែល បានបន្តថា លក្ខខណ្ឌទាំងនោះ មិនសមស្រប ហើយបុគ្គលិកនឹងធ្វើការតវ៉ារហូត ទាល់តែមានដំណោះស្រាយ។
សូមរម្លឹកជូនថា នៅរសៀលថ្ងៃទី១៣ឧសភា ក្នុងកិច្ចប្រជុំរវាង ភាគីថៅកែក្រុមហ៊ុន Chevron និងបុគ្គលិកក្រុមហ៊ុនប្រេងសាំង កាល់តិច ភាគីថៅកែក្រុមហ៊ុន បានស្នើសុំពេលពីរបីខែទៀត ដើម្បីសិក្សាស្រាវជ្រាវ លើការដំឡើងប្រាក់ខែ និងប្រាក់អត្ថប្រយោជន៍ផ្សេងទៀត ដល់បុគ្គលិកដែលកំពុងតវ៉ានោះ។ យ៉ាងណាក៏ដោយ ភាគីថៅកែក្រុមហ៊ុន បានព្រមព្រៀងមួយចំណុចដែរ គឺបានតំឡើង ប្រាក់ខែ ១០ដុល្លារ បន្ថែមដល់ផ្នែកគិតលុយ ដែលសព្វថ្ងៃ ទទួលបានប្រាក់ខែ ១៣០ដុល្លារ។ រីឯផ្នែកចាក់សាំង ដែលទទួលបានប្រាក់ខែ ១១០ដុល្លារ និងផ្នែកអនាម័យ មានប្រាក់ខែ ១០០ដុល្លារ គឺមិនត្រូវបានដំឡើងនោះទេ។
ប៉ុន្តែ លោក យឿន រ៉េត បានឲ្យដឹងថា សូម្បីតែផ្នែកគិតលុយ ក៏មិនអាចទទួលយក ការដំឡើងប្រាក់ ១០ដុល្លា ពីសំណាក់ក្រុមហ៊ុនបានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ