គណបក្សកាន់អំណាច និងបក្សប្រឆាំង ប្រជែងជួយពលករ ដែលត្រូវបញ្ជូនមកពីថៃ
រហូតដល់ថ្ងៃទី១៧មិថុនានេះ ទាំងគណបក្សកាន់អំណាច តាមរយៈអាជ្ញាធរគ្រប់លំដាប់ថ្នាក់ និងទាំងក្រុមការងារគណបក្សប្រឆាំង បានបន្តសកម្មភាពផ្សេងពីគ្នា ដើម្បីចុះជួយដល់ពលករ ដែលត្រូវបានថៃ ចាប់បញ្ជូនត្រលប់មកវិញ។ ម្ហូបអាហារ កន្លែងស្នាក់នៅ និងឡានដឹកជញ្ជូន ដោយឥតគិតថ្លៃ ត្រូវបានអាជ្ញាធរ និងក្រុមការងារគណបក្សទាំងពីរ ផ្តល់ជូនដល់ពលកររាប់ម៉ឺននាក់ នៅច្រកព្រំដែនប៉ោយប៉ែត។ ស្ថានភាពនៅប៉ោយប៉ែត ត្រូវបានលោក គោ ស៊ុំសារឿត អភិបាលខេត្តបន្ទាយមានជ័យ ឲ្យដឹងនៅព្រឹកថ្ងៃទី១៧មិថុនានេះថា ចំនួនពលករខ្មែរ ដែលថៃបញ្ជូនត្រលប់មកវិញ បានថយចុះ បើធៀបនឹងប៉ុន្មានថ្ងៃមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ជាសកម្មភាពមនុស្សធម៌ ដែលអាជ្ញាធរសមត្ថកិច្ច ក្នុងនាមគណបក្សប្រជាជនកម្ពុជា ព្រមទាំងក្រុមការងារគណបក្សសង្គ្រោះជាតិ បានចុះជួយដល់ពលករខ្មែររាប់ម៉ឺននាក់ នៅព្រំដែនប៉ោយប៉ែត។ សង្គមស៊ីវិល និងយុវជនកាកបាទក្រហម ក៏បានធ្វើសកម្មភាពមនុស្សធម៌ ផ្តល់បាយទឹក ពិនិត្យជំងឺ ផ្តល់កន្លែងស្នាក់នៅ រួមទាំងមធ្យោបាយដឹកជញ្ជូនសម្រាប់ពលករ ដែលថៃ ចាប់បញ្ជូនមកវិញ ចាប់តាំងពីថ្ងៃទី៦មិថុនា។
លោក ឡុង រី ប្រធានក្រុមការងារគណបក្សសង្គ្រោះជាតិ ខេត្តបន្ទាយមានជ័យ បានឲ្យដឹងថា បក្សប្រឆាំងបានចាត់តាំងក្រុមការងារ ឈរជើងនៅព្រំដែនប៉ោយប៉ែត យូរថ្ងៃមកហើយ ដើម្បីផ្តល់ម្ហូបអាហារ បាយទឹកកន្លែងស្នាក់នៅ និងឡាន សម្រាប់ដឹកពលករ ទៅកាន់ស្រុកកំណើត។
គណបក្សប្រឆាំង ក៏បានរៃអង្គាសថវិកា និងទទួលជំនួយជាសម្ភារៈម្ហូបអាហារ ដើម្បីជួយដល់ពលករជួបការលំបាក ពេលមកពីថៃ បន្ថែមលើជំនួយផ្ទាល់ខ្លួនរបស់លោក សម រង្ស៊ី ជួយជិត ៥.០០០ ដុល្លារ ដល់ពលករជាង ៥០ នាក់ ដែលបក្សប្រឆាំង នាំមកបង្ហាញខ្លួន នៅទីស្នាក់ការកណ្តាល នៅភ្នំពេញ កាលពីថ្ងៃទី១២មិថុនា។
លោក ឡុង រី បានបដិសេធនូវសេចក្តីជូនដំណឹង របស់គណបក្សសង្គ្រោះជាតិ ចុះថ្ងៃទី១៣មិថុនា ដែលបានប្រកាសផ្តល់ប្រាក់ឧបត្ថម្ភដល់ពលករ ម្នាក់ ៦០០ បាត ព្រោះនោះជាលិខិតក្លែងបន្លំ។ រហូតដល់ថ្ងៃ១៧មិថុនានេះ អាជ្ញាធរសមត្ថកិច្ច ដែលជាថ្នាក់ដឹកនាំគណបក្សប្រជាជនកម្ពុជា នៅខេត្តជាប់ព្រំដែនថៃ បានបន្តសកម្មភាព ជួយសម្រួលដល់ដំណើរការវិលត្រលប់របស់ពលករខ្មែរ។ ពលករខ្មែរ ដែលចូលតាមច្រកប៉ោយប៉ែត គិតត្រឹមយប់ថ្ងៃទី១៦មិថុនា មានចំនួនជិត ១៦ម៉ឺននាក់។
ប៉ុន្តែ នៅព្រឹកថ្ងៃទី១៧មិថុនានេះ ពលករខ្មែរ ដែលថៃបញ្ជូនមក មានចំនួនតែជាង ១០០០ នាក់ប៉ុណ្ណោះ គឺថយចុះច្រើន បើធៀបនឹងប៉ុន្មានថ្ងៃមុន។ នេះបើតាមលោក គោ ស៊ុំសារឿត អភិបាលខេត្តបន្ទាយមានជ័យ។
លោកអភិបាល បានលើកឡើងថា អាជ្ញាធរសមត្ថកិច្ច បន្តជួយដល់ពលករចំណាកស្រុក ហើយមកដល់ពេលនេះ បាយទឹក ម្ហូបអាហារ មិនខ្វះទេ សម្រាប់ចែកជូនពលករ។ រីឯឡានធំៗប្រមាណ ៣១០ គ្រឿង ជាឡានទាហាន ប៉េអឹម ឡានប៉ូលិស ឡានមកពីបណ្តាខេត្ត ឡានក្រុមហ៊ុន រួមទាំងអង្គការ IOM បន្តដឹកជញ្ជូនពលករខ្មែរ ទៅស្រុកកំណើត។
រហូតដល់ពេលនេះ មានពលករខ្មែរ ១០ នាក់ បានស្លាប់ ដោយគ្រោះថ្នាក់ចរាចរណ៍ និងខ្យល់គ ក្នុងពេលថៃ ចាប់បញ្ជូនមកវិញ ពេលនេះ។ នេះបើតាមលោកគោស៊ុម សារឿត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ