សកម្មជន និងប្រជាសហគមន៍ដីធ្លី ដាក់ញ្ញត្តិទៅស្ថានទូតថៃទាមទារឲ្យគោរពសិទ្ធិពលករខ្មែរ
សកម្មជន និងប្រជាសហគមន៍ដីធ្លី ប្រមាណជា ២០០នាក់ នៅព្រឹកថ្ងៃពុធនេះ បានយកញ្ញត្តិទៅដាក់នៅស្ថានទូតថៃ ប្រចាំនៅកម្ពុជា ដើម្បីស្នើសុំឲ្យប្រទេសថៃ គោរពសិទ្ធិពលករខ្មែរ ដែលទៅធ្វើការ នៅក្នុងប្រទេសថៃ។ សកម្មជនទាំងនោះ ក៏បានស្នើសុំឲ្យរដ្ឋាភិបាលថៃ និងកម្ពុជា ចាត់វិធានការ ចំពោះការស្លាប់ពលករខ្មែរ នៅលើទឹកដីថៃផងដែរ។ តំណាងស្ថានទូតថៃ បានចេញមកទទួលយកញ្ញត្តិ ហើយសន្យាថានឹងយកទៅពិចារណា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
សកម្មជន និងប្រជាសហគមន៍ដីធ្លី មកពីសមាគមសេដ្ឋកិច្ចក្រៅប្រព័ន្ធ បណ្តាញព្រះសង្ឃឯករាជ្យ និងសកម្មជនដីធ្លី តំបន់បឹងកក់ បុរីកីឡា និងថ្មគោល នៅព្រឹកថ្ងៃទី២៥មិថុនានេះ បាននាំគ្នាយកញ្ញត្តិ ទៅដាក់នៅមុខស្ថានទូតថៃ ប្រចាំនៅកម្ពុជា ដើម្បីទាមទារសិទ្ធសមស្រប ដល់ពលករខ្មែរ ដែលទៅធ្វើការនៅប្រទេសថៃ។
លោក វន់ ពៅ ប្រធានសមាគមសេដ្ឋកិច្ចក្រៅប្រព័ន្ធ បានប្រាប់វិទ្យុបារាំងថា ញ្ញត្តិដែលយកទៅដាក់នៅស្ថានទូតថៃនោះ គឺមានការទាមទារ និងស្នើសុំចំនួន ៥ចំនុច។ ៥ចំនុចនេះ រួមមាន ស្នើឲ្យរដ្ឋាភិបាលថៃ ផ្តល់ភាពមនុស្សធម៌ និងជូនដំណឹង ដល់ភាគីខ្មែរ មុនពេលមានការបណ្តេញពលករ ចេញពីប្រទេស។ ត្រូវគោរពសិទ្ធិ ពលករខ្មែរ ដូចប្រទេសនៅក្នុងតំបន់អាស៊ានផ្សេងទៀត។ ញ្ញត្តិក៏បានស្នើសុំឲ្យរដ្ឋាភិបាលថៃ ចាត់វិធានការជាបន្ទាន់ ចំពោះការស្លាប់ពលករខ្មែរ នៅក្នុងប្រទេសថៃ នាពេលថ្មីៗនេះផងដែរ។
ជាមួយនោះដែរ ញ្ញត្តិបានស្នើសុំឲ្យរដ្ឋាភិបាលកម្ពុជា ត្រូវតែទទួលខុសត្រូវ ចំពោះវត្តមាននៃការត្រលប់មកវិញ របស់ពលករ ដោយត្រូវផ្គត់ផ្គង់ចំណីអាហារ និងសេវាសុខភាព ឲ្យបានត្រឹមត្រូវ។ និងចំនុចចុងក្រោយ គឺទាមទារឲ្យរដ្ឋាភិបាលកម្ពុជា មានយន្តការជាក់លាក់មួយ ដោយបង្កើតការិយាល័យឲ្យជិតនឹងប្រជាពលរដ្ឋរបស់ខ្លួន ដែលធ្វើការនៅក្រៅប្រទេស។
បន្ទាប់ពីបានរង់ចាំអស់រយៈពេលមួយម៉ោង តំណាងស្ថានទូតថៃប្រចាំទីក្រុងភ្នំពេញ បានចេញមកទទួលយកញ្ញត្តិពីក្រុមសកម្មជន និងបានសន្យាថាយកញ្ញត្តិនោះ ទៅពិចារណាជាបន្តទៀត។ សកម្មភាពដាក់ញ្ញត្តិ នៅព្រឹកថ្ងៃពុធនេះ មិនមានការរារាំងពីអាជ្ញាធរនោះទេ។
សូមបញ្ជាក់ថា ចាប់ពីដើមខែមិថុនានេះ ពលករខ្មែរ ដែលឆ្លងដែនទៅធ្វើការ នៅប្រទេសថៃ ប្រមាណជាជិត ២៣ម៉ឺននាក់ ត្រូវបាន របបសឹកយោធាថៃ ចាប់បញ្ជូនតាមរថយន្ត មកកម្ពុជាវិញ តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ក្រោមហេតុផល ដើម្បីពង្រឹងការអនុវត្តន៍ច្បាប់ក្នុងប្រទេស និងចៀសវាងការជួញដូរមនុស្ស។
នៅពេលថ្មីៗនេះ រដ្ឋាភិបាលកម្ពុជា តាមរយៈក្រសួងការងារ បានចេញនៅនីតិវិធីថ្មីៗមួយចំនួន ដើម្បីសម្រួលដល់ពលករខ្មែរ ឲ្យក្លាយទៅជាពលករស្របច្បាប់ ទៅធ្វើការនៅប្រទេសថៃផងដែរ។ យ៉ាងណាក៏ដោយ ប្រធានសមាគមសេដ្ឋកិច្ចក្រៅប្រព័ន្ធ លោក វន់ ពៅ បានហៅនីតិវិធីនេះថា នៅតែមានភាពស្មុគស្មាញ សម្រាប់ពលករខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ