អង្គការក្រៅរដ្ឋាភិបាល៖ ក្រុមហ៊ុនពិបាកទទួលយកចំណាត់ការបង់ប្រាក់៤៩ដុល្លារសម្រាប់ពលករ ចេញទៅធ្វើការនៅថៃ
ក្រសួងការងារកម្ពុជា បានប្រកាសជាសាធារណៈកាលពីម្សិលមិញថា ពលករកម្ពុជានឹងត្រូវបង់ប្រាក់សរុប ៤៩ដុល្លារ ក្នុងនោះមានការធ្វើលិខិតឆ្លងដែន, ការបំពេញឯកសារផ្សេងៗមានទិដ្ឋាការ ថ្លៃធ្វើដំណើរ និងថ្លៃអាហារជាដើម។ ការសម្រេចនេះ បានធ្វើឡើង បន្ទាប់ពីក្រសួងការងារបើកកិច្ចប្រជុំមួយជាមួយនឹងក្រុមហ៊ុននាំពលករទៅក្រៅប្រទេស ចំនួន៤។ ក៏ប៉ុន្តែអង្គការឃ្លាំមើលសិទ្ធិពលករចំណាកស្រុក មានជំនឿថាក្រុមហ៊ុននឹងប្រឈមបញ្ហាជាច្រើន ដែលពិបាកនឹងទទួលយកគោលការណ៍នេះណាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
ក្រសួងការងារកម្ពុជាកាលពីម្សិលមិញ បានបញ្ចប់ការជជែកដេញដោលគ្នាជាមួយនឹងផ្នែកពាក់ព័ន្ធនានា ជាពិសេសជាមួយនឹងទីភ្នាក់ងារនាំពលករចេញទៅក្រៅប្រទេស ដោយកិច្ចប្រជុំសម្រេចរកឃើញថាពលករម្នាក់ៗ ត្រូវចំណាយថវិកាអស់ចំនួន ៤៩ដុល្លារ ក្នុងការទទួលបានភាពស្របច្បាប់ ទៅធ្វើការ នៅក្នុងប្រទេសថៃ។
ទាក់ទងទៅនឹងបញ្ហានេះ ក្រុមហ៊ុននាំពលករទៅធ្វើការ នៅប្រទេសថៃមួយចំនួន បង្ហាញយោបល់យល់ស្រប ហើយអង្គការឃ្លាំមើលសិទ្ធិពលករចំណាកស្រុក ក៏បានអបអរផងដែរ ប្រសិនបើយន្តការនេះប្រព្រឹត្តទៅដោយមានការយោគយល់គ្នា។ ក៏ប៉ុន្តែ ជំនឿនៃការទទួលយកបានច្រើនពីក្រុមហ៊ុននាំពលករទៅធ្វើការនៅបរទេស ហាក់ដូចជាមានតិចតួចណាស់។ នេះបើតាមការកត់សម្គាល់ របស់លោក យ៉ា ណាវុធ នាយកប្រតិបត្តិអង្គការខារ៉ាមកម្ពុជា។
លោក យ៉ា ណាវុធ ពន្យល់ថាតម្លៃ ៤៩ ដុល្លារវាពិបាកឲ្យក្រុមហ៊ុនកម្ពុជាដែលនាំពលករទៅធ្វើការនៅក្រៅប្រទេស ទទួលយកណាស់ ព្រោះថាមុននឹងបើកក្រុមហ៊ុនពួកគេត្រូវតម្កល់ប្រាក់១០ម៉ឺនដុល្លារ នៅក្រសួងការងារកម្ពុជា រួមនឹងការបើកការិយាល័យតាមខេត្តក្រុង និងការចំណាយថ្លៃទឹកថ្លៃភ្លើង និងសំបុត្រស្នាមផ្សេងៗ គឺពួកគាត់មិនអាចរកប្រាក់ចំណូលបានទេ ហើយទីបញ្ចប់នឹងឈានទៅរកការបិទអាជីវកម្ម។
នាយកអង្គការរូបនេះបន្តថា យុទ្ធសាស្ត្រដោះស្រាយបន្ទាន់របស់ក្រសួងការងារនៅពេលនេះវាជាការពិបាកទទួលយកពីក្រុមហ៊ុន ក៏ប៉ុន្តែលើកលែងតែករណីម្យ៉ាង គឺប្រទេសទទួលពលករដូចជាថៃជាដើម សុខចិត្តចេញថ្លៃចំណាយផ្សេងៗរួមទាំងចំណាយលើការពិនិត្យសុខភាព បណ្ណអនុញ្ញាតការងារផង ទៅឲ្យក្រុមហ៊ុននាំពលករទៅកាន់ប្រទេសទាំងនោះ។
ជាមួយគ្នានេះលោក អន ប៊ុនហាក់ ប្រធានក្រុមហ៊ុននាំពលករទៅប្រទេសថៃ TOP MAN POWER ក៏បានបញ្ជាក់ផងដែរ ពីសំណូមពររបស់ក្រសួងការងារកម្ពុជាទៅកាន់និយោជកនៅប្រទេសថៃ ដើម្បីឲ្យពួកគេជួយចេញចំណាយមួយចំនួន ប្រសិនបើម្ចាស់សហគ្រាសចង់បានកំលាំងពលកម្មកម្ពុជាទៅធ្វើការនៅទីនោះ។ មានន័យថា ក្រសួងការងារកម្ពុជា បានចេញថវិកាមួយចំនួន ហើយនិយោជកនៅប្រទេសថៃ ចេញមួយផ្នែកទៀត។
សូមបញ្ជាក់ថា បន្ទាប់ពីបើកកិច្ចប្រជុំជាមួយភ្នាក់ងារបញ្ជូនពលករទៅក្រៅប្រទេសកាលពីម្សិលមិញ ក្រសួងការងារបានចេញសេចក្តីជូនដំណឹងមួយ ដោយបានបញ្ជាក់ថា ក្រុមហ៊ុនភ្នាក់ងារបញ្ជូនពលករទៅក្រៅប្រទេស ចំនួនជាង ៤០ ក្រុមហ៊ុន ដែលត្រូវបានក្រសួងការងារ កំណត់ឲ្យសម្របសម្រួលធ្វើបែបបទ ដល់ក្រុមពលករខ្មែរស្របច្បាប់ ទៅធ្វើការនៅប្រទេសថៃ។ ក្នុងនោះ ពលករម្នាក់ ត្រូវបង់ប្រាក់ចំណាយលើសេវាសរុប ៤៩ ដុល្លារ រួមមាន៖ បណ្ណពលករ កម្ពុជា ទៅធ្វើការនៅបរទេស ចំនួន ១០ ដុល្លារ ថ្លៃលិខិតឆ្លងដែន ៤ ដុល្លារ ទិដ្ឋាការការងារ នៅស្ថានទូតថៃ ប្រចាំប្រទេសកម្ពុជា ២០ ដុល្លារ ប្រាក់សោហ៊ុយធ្វើដំណើរទៅកាន់ក្រុងប៉ោយប៉ែត ១០ ដុល្លារ និងប្រាក់អាហារតាមផ្លូវធ្វើដំណើរ ចំនួន ៥ ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ