តម្លៃលិខិតឆ្លងដែន សម្រាប់ពលករ ត្រឹម ៤ ដុល្លារ តែនីតិវិធីនៅតែលំបាក
ប្រមុខរដ្ឋាភិបាល ទើបតែសម្រេចបញ្ចុះតម្លៃធ្វើលិខិតឆ្លងដែន សម្រាប់ពលករខ្មែរ ចេញទៅធ្វើការនៅក្រៅប្រទេស ត្រូវបង់ត្រឹមតែ ៤ ដុល្លារ សម្រាប់ថ្លៃថតរូប។ ប៉ុន្តែពលករនោះ តម្រូវឲ្យមានការបញ្ជាក់ត្រឹមត្រូវពីក្រសួងការងារ ពោលគឺត្រូវធ្វើតាមរយៈក្រុមហ៊ុនភ្នាក់ងារបញ្ជូនពលករ។ អង្គការធ្វើការខាងពលករចំណាកស្រុក បានចាត់ទុកនីតិវិធី ក្នុងការបំពេញបែបបទ ដើម្បីទទួលបានលិខិតឆ្លងដែន សម្រាប់ពលករខ្មែរ នៅតែលំបាក។ ដូច្នេះប្រជាពលរដ្ឋ នឹងបន្តជ្រើសយកការចេញទៅធ្វើការនៅបរទេសដោយខុសច្បាប់ ពិសេសទៅប្រទេសថៃ។
ចុះផ្សាយនៅថ្ងៃ៖
ស្តាប់ - ០២:៣៧
អនុក្រឹត្យ ចុះថ្ងៃទី២០មិថុនា ចុះហត្ថលេខាដោយលោកនាយករដ្ឋមន្ត្រី ហ៊ុន សែន បានសម្រេចថា លិខិតឆ្លងដែន សម្រាប់ពលករ ដែលត្រូវទៅធ្វើការដោយស្របច្បាប់ នៅបរទេស ត្រូវបង់ប្រាក់ចំនួន ៤ ដុល្លារ សម្រាប់ថ្លៃថតរូប។ ជាវិធានការ ដើម្បីបញ្ចៀស កុំឲ្យពលករខ្មែរ ធ្វើចំណាកស្រុក ចេញទៅធ្វើការនៅបរទេស ដោយខុសច្បាប់។
ប៉ុន្តែប្រជាពលរដ្ឋ នៅខេត្តបាត់ដំបង លោក សួន សុខន បានឲ្យដឹងថា ប្រជាពលរដ្ឋ មិនអាចទៅសុំធ្វើលិខិតឆ្លងដែន នៅសាខាខេត្តបាត់ដំបង ក្នុងតម្លៃ ៤ ដុល្លារ ដើម្បីចេញទៅធ្វើការស្របច្បាប់ នៅប្រទេសថៃបានទេ។ ប៉ូលិសនៅការិយាល័យលិខិតឆ្លងដែន តម្រូវឲ្យពលករ ពលការិនីខ្មែរ ដែលមានបំណងចេញទៅធ្វើការនៅបរទេស ត្រូវមានភ្នាក់ងារក្រុមហ៊ុន នាំទៅ ទើបអាចធ្វើលិខិតឆ្លងដែន តម្លៃ ៤ ដុល្លារបាន។ តែលោក សួន សុខន អះអាងថា ប្រជាពលរដ្ឋភាគច្រើន មិនចង់ទៅតាមភ្នាក់ងារក្រុមហ៊ុនទេ ដោយសារតែក្រុមហ៊ុនគាបសង្កត់ និងដកយកលិខិតឆ្លងដែនថែមទៀត នៅពេលទៅដល់កន្លែងធ្វើការនៅប្រទេសថៃ។
លោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី បានបញ្ជាក់ថា ប្រជាពលករ អាចធ្វើលិខិតឆ្លងដែន ក្នុងតម្លៃបញ្ចុះត្រឹមតែ ៤ ដុល្លារ ទាល់តែពលករនោះ មានការបញ្ជាក់ទទួលស្គាល់ត្រឹមត្រូវពីក្រសួងការងារ និងបណ្តុះបណ្តាលវិជ្ជាជីវៈ ថាពលករនោះ ពិតជាត្រូវចេញទៅធ្វើការ នៅបរទេស។
ចំណែកលោក យ៉ា ណាវុធ នាយកប្រតិបត្តិអង្គការខារ៉ាមកម្ពុជា បានស្នើដល់រដ្ឋាភិបាល ឲ្យកំណត់ច្បាស់លាស់ថែមទៀត លើបែបបទ សម្រាប់ពលករចេញទៅធ្វើការដោយស្របច្បាប់។ រដ្ឋាភិបាលក៏ត្រូវបើកទូលាយដល់ពលករម្នាក់ៗ អាចធ្វើលិខិតឆ្លងដែន ក្នុងតម្លៃ ៤ ដុល្លារ ដោយមិនចាំបាច់ឆ្លងកាត់ក្រុមហ៊ុនភ្នាក់ងារនាំពលករនោះទេ។
ក្នុងពេលកន្លងមក រដ្ឋាភិបាលបានសម្រេចបញ្ចុះតម្លៃធ្វើលិខិតឆ្លងដែន សម្រាប់ពលករ មកត្រឹមជាង ២០ ដុល្លារ ប៉ុន្តែលោកយ៉ាណាវុធ អះអាងថា ពលករម្នាក់ ត្រូវចំណាយតាមរយៈក្រុមហ៊ុនភ្នាក់ងារ រហូតដល់ជាង ១០០ ដុល្លារ ដោយមិនទាន់គិតថ្លៃពិនិត្យឈាម ៤៥ ដុល្លារ និងលិខិតឯកសារផ្សេងទៀត មុននឹងបានចេញទៅធ្វើការដោយស្របច្បាប់ តាមភ្នាក់ងារក្រុមហ៊ុន នៅក្រៅប្រទេស។
នីតិវិធីស្មុគស្មាញ ហើយពលករត្រូវសងបំណុលក្រុមហ៊ុនភ្នាក់ងារពលករ រហូតដល់ត្រូវកាត់ប្រាក់ខែ ១០ ខែ ហើយត្រូវក្រុមហ៊ុនដកហូតលិខិតឆ្លងដែន ជាដើមនោះ ត្រូវបានលោក យ៉ា ណាវុធ កត់សម្គាល់ថា នាំឲ្យពលករខ្មែរ ងាកមកធ្វើចំណាកស្រុក ទៅធ្វើការ មិនស្របច្បាប់ ពិសេសនៅប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ