លោក ហ៊ុន សែន ប្រកាសមិនលើកលែង «អ្នកញុះញង់» និងអ្នកប្រព្រឹត្តអំពើហិង្សា
លោកនាយករដ្ឋមន្ត្រី ហ៊ុន សែន បានប្រកាសនៅថ្ងៃចន្ទនេះថា អ្នកញុះញង់និងអ្នកប្រព្រឹត្តអំពើហិង្សាមិនត្រូវបានលើកលែងចំពោះមុខច្បាប់នោះឡើយ។ បើទោះជាលោកនាយករដ្ឋមន្ត្រីមិនបានសំដៅចំពោះករណីណាមួយក៏ដោយ ក៏ប៉ុន្តែ សេចក្តីថ្លែងការណ៍នេះ បានធ្វើឡើងបន្ទាប់ពីតុលាការក៏បានបន្តនីតិវិធីចំពោះសកម្មជនគណបក្សសង្គ្រោះជាតិទាក់ទងនឹងអំពើហិង្សានៅក្បែរទីលានប្រជាធិបតេយ្យកាលពីថ្ងៃទី ១៥ កក្កដា។ យ៉ាងណាក៏ដោយ គណបក្សទាំងពីរកំពុងបន្តការចរចា ដើម្បីឈានទៅបញ្ចប់បញ្ហា។
ចុះផ្សាយនៅថ្ងៃ៖
ស្តាប់ - ០២:១៥
ថ្លែងក្នុងពិធីចែកសញ្ញាបត្រដល់និស្សិត នៅថ្ងៃចន្ទទី៤សីហានេះ លោកនាយករដ្ឋមន្ត្រី ហ៊ុន សែន បានប្រកាសថា អ្នកដែលញុះញង់ឲ្យកើតមានអំពើហិង្សា និងអ្នកប្រព្រឹត្តហិង្សា មិនត្រូវបានលើកលែងចំពោះមុខច្បាប់នោះទេ។ សេចក្តីថ្លែងការណ៍បែបនេះបានកើតឡើងស្របពេលដែលតុលាការសាលាដំបូងរាជធានីភ្នំពេញបានចេញដីកាចាប់ខ្លួន និងឃុំខ្លួនសកម្មជនយុវជនគណបក្សសង្គ្រោះជាតិ៣នាក់ទៀត កាលពីថ្ងៃសៅរ៍កន្លងទៅ ពីបទពាក់ព័ន្ធនឹងអំពើហិង្សានៅក្បែរទីលានប្រជាធិបតេយ្យ កាលពីថ្ងៃទី ១៥ កក្កដា។
ចំណែកឯលោក កឹម សុខា អនុប្រធានគណបក្សសង្គ្រោះជាតិ រួមទាំងតំណាងរាស្ត្រជាប់ឆ្នោតគណបក្សនេះ៧នាក់ និងសកម្មជនម្នាក់ទៀត ដែលត្រូវបានតុលាការដោះលែងឲ្យនៅក្រៅឃុំបណ្តោះអាសន្នកាលពីថ្ងៃទី ២២កក្កដានោះ ក៏ត្រូវបានតុលាការកោះហៅឲ្យចូលខ្លួនទៅបំភ្លឺជាថ្មីទៀតដែរ។ ព្រឹត្តិការណ៍នេះត្រូវបានគណបក្សប្រឆាំង និងអ្នកសង្កេតការណ៍សង្គមស៊ីវិលខ្លះចាត់ទុកថា ជាសម្ពាធនយោបាយថ្មីទៀតទៅលើគណបក្សប្រឆាំង ខណៈដែលគណបក្សនេះនៅកិកកុក មិនព្រមចូលសភាតាមការសន្យានៅឡើយ។
ប៉ុន្តែ មន្ត្រីជាន់ខ្ពស់គណបក្សប្រជាជនកម្ពុជា បានបដិសេធថា ចំណាត់ការរបស់តុលាការ ក្នុងសំណុំរឿងព្រហ្មទណ្ឌមិនជាប់ពាក់ព័ន្ធនឹងការចរចានយោបាយរវាងគណបក្សទាំងពីរទេ។ យ៉ាងណាក៏ដោយ កម្តៅនយោបាយហាក់កំពុងឆាបឆេះឡើងវិញ។ បញ្ហាខ្ទាស់ចុងក្រោយគឺ គណបក្សសង្គ្រោះជាតិបានស្នើឲ្យបញ្ចូលក្នុងមាត្រាថ្មីនៃរដ្ឋធម្មនុញ្ញអំពីស្វ័យភាពរបស់ គ.ជ.ប និងការចែងអំពីការជំនួសសមាជិកថ្មី ក្នុងករណីដែលសមាជិកណាម្នាក់បាត់បង់សមាជិកភាពពីគណបក្សនយោបាយ។
ប៉ុន្តែ សំណើនេះត្រូវបានភាគីគណបក្សប្រជាជនកម្ពុជាបដិសេធ ក្រោមហេតុផលថា វាជាចំណុចលម្អិត ដែលមិនគួរចែងក្នុងរដ្ឋធម្មនុញ្ញទេ។ នេះបើយោងតាមលិខិតឆ្លើយតបរបស់លោក ស ខេង មន្ត្រីជាន់ខ្ពស់គណបក្សប្រជាជនកម្ពុជា ទៅកាន់គណបក្សសង្គ្រោះជាតិកាលពីល្ងាចថ្ងៃទី៣សីហា។ ភ្លាមៗនេះ នៅមិនទាន់មានការឆ្លើយតបយ៉ាងណាពីគណបក្សសង្គ្រោះជាតិនៅឡើយទេ។
យ៉ាងណាក៏ដោយ គេរំពឹងថា ស្ថានការណ៍អាចវិលទៅរកភាពធូរស្រាលវិញ ប្រសិនបើគណបក្សទាំងពីរស្រុះស្រួលគ្នាអំពីរឿងនយោបាយ ជាពិសេសប្រសិនបើគណបក្សសង្គ្រោះជាតិធ្វើសច្ចាប្រណិធានចូលកាន់តំណែងក្នុងរដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ