ពិធីបុណ្យអុំទូកថ្ងៃទីមួយ ចាប់ផ្តើមជាផ្លូវការ
ថ្ងៃពុធ ទី០៥ វិច្ឆិកានេះ គឺជាថ្ងៃទីមួយនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ។ ក្នុងថ្ងៃទីមួយនេះ ការប្រណាំងទូក បានចាប់ផ្តើមឡើងជាផ្លូវការ នៅម៉ោងប្រមាណ ១១ព្រឹក។ ព្រះរាជពិធីបុណ្យអុំទូក ដែលមានរយៈពេលបីថ្ងៃ បានអង្រួនរាជធានីភ្នំពេញសារជាថ្មីក្រោយពីអវត្តមានបីឆ្នាំជាប់ៗគ្នា។
ចុះផ្សាយនៅថ្ងៃ៖
ស្តាប់ - ០២:០០
គឺនៅម៉ោងប្រមាណ ១១ថ្ងៃត្រង់ ការប្រណាំងទូក បានចាប់ផ្តើមធ្វើជាផ្លូវការ។ ឆ្នាំនេះ មានទូកចំនួន ២៤៨ ទូកបានចុះបញ្ជីចូលរួមប្រកួត ប៉ុន្តែជាក់ស្តែង មានទូកតែ ២៤៥ ប៉ុណ្ណោះដែលមានវត្តមានចូលរួមប្រកួត ដោយសារទូកបីទៀតបានអវត្តមាន។
យ៉ាងណាក៏ដោយ នៅក្នុងពិធីបុណ្យអុំបុណ្យឆ្នាំនេះ ទូកដែលចូលរួមប្រកួតមានចំនួនតិចជាងកាលពីឆ្នាំ ២០១០ ដែលកាលណោះមានទូកចំនួន ៤២១ទូក បានចូលរួម។ លោកប៊ូ ជុំសេរី អនុរដ្ឋលេខាធិការក្រសួងអប់រំ យុវជន និង កីឡា និង ជាប្រធានគណៈមេប្រយោគនៃការប្រណាំងទូកនេះ បានឲ្យដឹងមុនពិធីប្រណាំងចាប់ផ្តើមថា មូលហេតុដែលទូកចូលរួមប្រកួតនៅឆ្នាំនេះ មានចំនួនតិចជាងឆ្នាំ២០១០ គឺដោយសារតែ ពិធីបុណ្យអុំទូកបានអាក់ខានយូរដែលធ្វើឲ្យការត្រៀមលក្ខណៈ មិនបានល្អទើបទូកមួយចំនួនខកខានមិនបានចូលរួម។
ចំណែកទូកខ្លះមានសភាពចាស់ មិនអាចប្រកួតបាន និងម្យ៉ាងទៀត គឺដោយសារយុវជនដែលជាកម្លាំងអុំទូកមួយចំនួន បានធ្វើចំណាកស្រុក។
បើតាមលោកប៊ូ ជុំសេរី ចម្ងាយនៃការប្រណាំងទូកនៅឆ្នាំនេះ មានប្រវែង ១៧០០ម៉ែត្រ ហើយការប្រណាំងទូកចាប់ផ្តើមពីម៉ោង១១ ដល់ម៉ោង ៥ ល្ងាច ដោយប្រណាំងពីរជើងក្នុងមួយថ្ងៃ។
អាជ្ញាធរ បានប៉ាន់ស្មានថា បុណ្យអុំទូកឆ្នាំនេះនឹងមានអ្នកមកកម្សាន្តប្រមាណពីរលាននាក់ ខណៈដែលកីឡាករ កីឡាការិនីចំណុះទូកមានចំនួន១ម៉ឺន៧ពាន់៤២១នាក់។ ជាមួយគ្នានេះ ព្រះបាទ សម្តេចនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និង សម្តេចម៉ែបានប្រោសប្រទាន ដល់កីឡាករ កីឡាការិនីចំណុះទូកក្នុងម្នាក់ក្រមាមួយ និង បានប្រទានថវិកាចំនួន២សែនរៀលដល់ទូកនីមួយៗផងដែរ។
សូមបញ្ជាក់ថា រដ្ឋាភិបាលកម្ពុជា បានផ្អាកការរៀបចំពិធីបុណ្យអុំទូករយៈពេលបីឆ្នាំជាប់ៗគ្នា ដោយសារមានហេតុការណ៍ជាន់គ្នាស្លាប់នៅលើស្ពានកោះពេជ្រ កាលពីឆ្នាំ២០១០ បញ្ហាទឹកជំនន់ និង ពេលដែលព្រះមហាវីរក្សត្រ សម្តេច នរោត្តមសីហនុ យាងសោយទិវង្គត។
ពិធីបុណ្យអុំទូកឆ្នាំ បានប្រព្រឹត្តទៅក្រោមការក្សាសន្តិសុខ សណ្តាប់ធ្នាប់ និងសុវត្ថិភាពយ៉ាងតឹងរ៉ឹងជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ