ស្រោមអនាម័យ ២៥ម៉ឺនស្រោម នឹងត្រូវចែកជូនឥតគិតថ្លៃ អំឡុងពេលបុណ្យអុំទូក
ស្រោមអនាម័យចំនួន២៥ម៉ឺនស្រោម នឹងត្រូវចែកជូនដោយឥតគិតថ្លៃ ដល់ប្រជាពលរដ្ឋដែលអញ្ជើញចូលរួមនៅក្នុងព្រះរាជពិធីបុណ្យអុំទូក នៅឆ្នាំនេះ។ យុទ្ធនាការនេះ រៀបចំដោយគណៈកម្មការសម្របសម្រួលប្រយុទ្ធនឹងជំងឺអេដស៍ សហការជាមួយអង្គការសង្គមស៊ីវិលនានា ដែលធ្វើការពាក់ព័ន្ធនឹងជំងឺអេដស៍។ ជាយុទ្ធនាការ ដែលធ្វើឡើងក្នុងគោលដៅ ទប់ស្កាត់ការរីករាលដាលនៃជំងឺអេដស៍ នៅក្នុងពេលបុណ្យអុំទូក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
គណៈកម្មការសម្របសម្រួលប្រយុទ្ធ នឹងជំងឺអេដស៍ ហៅកាត់ថា HACC សហការជាមួយអង្គការសង្គមស៊ីវិលនានា ដែលធ្វើការពាក់ព័ន្ធនឹងជំងឺអេដស៍ បានចាប់ផ្ដើមយុទ្ធនាការចែកស្រោមអនាម័យ ដោយឥតគិតថ្លៃ ចំនួន២៥ម៉ឺនស្រោម ដល់ប្រជាពលរដ្ឋដែលអញ្ជើញមកចូលរួមព្រះរាជពិធីបុណ្យអុំទូកឆ្នាំនេះ នៅរាជធានីភ្នំពេញ។ ជាយុទ្ធនាការ ដែលមានរយៈពេល៤ថ្ងៃ ចាប់ផ្ដើមពីថ្ងៃទី៤ ដល់ថ្ងៃទី៧ ខែវិច្ឆិកាខាងមុខ។ នេះបើតាមសេចក្ដីប្រកាសព័ត៌មាន របស់គណៈកម្មការសម្របសម្រួលប្រយុទ្ធនឹងជំងឺអេដស៍ ដែលវិទ្យុបារាំងទើបតែទទួលបាននៅថ្ងៃពុធនេះ។
មនុស្សជាង ៥លាននាក់ ត្រូវបានរំពឹងថានឹងធ្វើដំណើរមកក្រុងភ្នំពេញ ដើម្បីចូលរួមបុណ្យអុំទូកនៅឆ្នាំនេះ។ ខណៈកីឡាករប្រណាំងទូក និងអ្នកចូលរួមមកពីបណ្ដាខេត្តផ្សេងៗ ភាគច្រើនជាបុរស និងទំនងជាស្វែងរកសេវាផ្លូវភេទ គណៈកម្មការសម្របសម្រួលប្រយុទ្ធនឹងជំងឺអេដស៍ និងអង្គការដៃគូ បានបង្ហាញពីក្ដីបារម្ភ។ បារម្ភ អំពីកង្វះការយល់ដឹងពីបញ្ហាជំងឺអេដស៍ និងបារម្ភថា ការរួមភេទដោយមិនបានការពារត្រឹមត្រូវ នឹងអាចបង្កឲ្យមានការឆ្លងថ្មី។
ជាមួយគ្នានេះ អ្នកស្ម័គ្រចិត្តជាង៣០០នាក់ មកពីអង្គការ RHAC, Mith Samlanh,KHANA, CHEC, ACTED-PSF និង CWDA ក៏ត្រៀមធ្វើយុទ្ធនាការអប់រំ និងជំរុញឲ្យអ្នកចូលរួមធ្វើតេសន៍ឈាមចុងម្រាមដៃ ដើម្បីរកមេរោគអេដស៍ នៅតាមតំបន់ប្រឈមមួយចំនួនដូចជា បៀរហ្គាដិន រង្គសាល និងហាងខារ៉ាអូខេនានាផងដែរ។
ក្រៅពីចែកចាយស្រោមអនាម័យ និងអប់រំសុខភាព គណៈកម្មការសម្របសម្រួលប្រយុទ្ធនឹងជំងឺអេដស៍ នឹងរៀបចំការប្រគុំតន្ដ្រីរយៈពេល៣ថ្ងៃ នៅជិតសណ្ឋាគារសុខា ទល់មុខព្រះបរមរាជវាំង ដោយមានការចូលរួមពីតារាចម្រៀង សិល្បករ-សិល្បការិនីល្បីៗ។ ក្រុមសម្ដែងរបស់អង្គការសង្គមស៊ីវិល ក៏នឹងចូលរួមសម្ដែង ដើម្បីបង្ហាញសារអប់រំពីជំងឺអេដស៍ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ