ក្រុមប្រឹក្សាឃ្លាំមើលកម្ពុជា ស្នើលុបចោលសន្ធិសញ្ញាព្រំដែនបំពេញបន្ថែមឆ្នាំ ២០០៥ តែមន្ត្រីជំនាញ ស្នើឲ្យរៀនសូត្រពីច្បាប់អន្តរជាតិឡើងវិញ
ក្រុមប្រឹក្សាឃ្លាំមើលកម្ពុជា ដែលមានសហព័ន្ធសហជីព រួមទាំងក្រុមតំណាងក្រុមយុវជន ចំនួន១៤ នៅព្រឹកថ្ងៃទី ១៩វិច្ឆិកានេះ បានធ្វើសន្និសីទកាសែតរួមគ្នា ស្នើឲ្យតំណាងរាស្ត្រទាំង ១២៣រូប ក្នុងរដ្ឋសភា ពិចារណាលុបចោលសន្ធិសញ្ញាព្រំដែនបំពេញបន្ថែមឆ្នាំ២០០៥។ សន្និសីទ ដែលបានធ្វើឡើង នៅភោជនីយដ្ឋានទន្លេបាសាក់ បានអះអាងថា ដោយសារតែសន្ធិសញ្ញាឆ្នាំ២០០៥នេះ ប៉ះពាល់ដល់ប្រទេសកម្ពុជា។ ប៉ុន្តែមន្ត្រីរដ្ឋាភិបាល បានស្នើឲ្យក្រុមអ្នកឃ្លាំមើល ស្រាវជ្រាវពីច្បាប់អន្តរជាតិឡើងវិញ និងបង្ហាញទឡ្ហីករណ៍ជាក់លាក់។
ចុះផ្សាយនៅថ្ងៃ៖
ស្តាប់ - ០១:៤៣
ក្រុមប្រឹក្សាឃ្លាំមើលកម្ពុជា បានទទួចឲ្យរដ្ឋសភា ដែលបច្ចុប្បន្នមានតំណាងរាស្រ្ត ១២៣រូបនោះ ត្រូវតែពិចារណាឡើងវិញ គិតគូរពីការលុបចោលនូវសន្ធិសញ្ញាព្រំដែនបំពេញបន្ថែម ទៅលើសន្ធិសញ្ញាព្រំដែនរដ្ឋ រវាងកម្ពុជា និងវៀតណាម ឆ្នាំ ១៩៨៥ ដែលត្រូវបានផ្តល់សច្ចាប័ន និងប្រកាសឲ្យប្រើប្រាស់ នៅឆ្នាំ ២០០៥។ ជាសន្ធិសញ្ញា ដែលក្រុមប្រឹក្សាឃ្លាំមើលកម្ពុជានេះ អះអាងថា ប៉ះពាល់ដល់បូរណភាពទឹកដី កម្ពុជា ដោយសារការលួចយកដី តាមរយៈការបោះបង្គោលព្រំដែន ពីសំណាក់ភាគីវៀតណាមជាប្រទេសជិតខាង។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងជាតំណាងសមាជិកក្រុមប្រឹក្សាឃ្លាំមើលកម្ពុជា ថ្លែងនៅក្នុងសន្និសីទកាសែតនោះថា ក្រុមរបស់លោក បានចុះទៅពិនិត្យបង្គោលព្រំដែន នៅស្រុករំដួល ខេត្តស្វាយរៀង កាលពីថ្ងៃទី ១៦វិច្ឆិកាថ្មីៗនេះ ហើយបានរកឃើញថា ទឹកដីខ្មែរ បានបាត់បង់ចូលទឹកដីវៀតណាម ពី ១០០ម៉ែត្រ ទៅ ៥០០ម៉ែត្រ ត្រង់ចំណុចធ្មេញរណា បង្គោលលេខ ១៤៧, ១៤៨។
លោករ៉ុង ឈុន បានបន្តថា លោកមានសាក្សីរស់ ពីពលរដ្ឋ ថាភាគីវៀតណាម បានបោះបង្គោលជាន់លើដីបញ្ចុះសពដូនតា និងដីចម្ការរបស់ពួកគេទៀត។ ដូច្នេះក្រុមសហព័ន្ធសហជីព និងតំណាងយុវជន បានចេញលិខិតចំហ ទៅកាន់រដ្ឋសភា ដើម្បីឲ្យស្ថាប័ននេះ ពិចារណាឡើងវិញ ចំពោះសន្ធិសញ្ញា ដែលផ្តល់ប្រយោជន៍បូរណភាពទឹកដីច្រើន ទៅកាន់វៀតណាមនេះ។
ផ្ទុយនឹងការលើកឡើងនេះ លោក ទេសរដ្ឋមន្ត្រី វ៉ា គឹមហុង ប្រធានគណៈកម្មការព្រំដែនកម្ពុជា បានចាត់ទុកថា ការអះអាង និងស្នើសុំនេះ គឺខ្វះការស្រាវជ្រាវពិតប្រាកដ ថែមទាំងមិនបានស្វែងយល់ពីសន្ធិសញ្ញាអន្តរជាតិឲ្យបានច្បាស់លាស់ទៀតផង។ លោកបានបន្តថា សន្ធិសញ្ញានេះ គឺត្រឹមត្រូវ និងបានការទទួលស្គាល់ពិតប្រាកដ ពីស្ថាប័នរដ្ឋសភា ព្រឹទ្ធសភា និងព្រះមហាក្សត្រនៃប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ