សាលាឧទ្ធរណ៍បន្ថយទោសលើសកម្មជនដីធ្លី លើកលែងតែអ្នកស្រីទេព វន្នី និងអតីតព្រះសង្ឃ សឺន ហាយ
ចៅក្រមតុលាការសាលាឧទ្ធរណ៍ នៅព្រឹកថ្ងៃចន្ទ ទី២៦មករានេះ បានសម្រេចកាត់បន្ថយទោសជាប់ ពន្ធនាគារ លើស្ត្រីសកម្មជនដីធ្លី ពីទោសជាប់ពន្ធនាគារ ១ ឆ្នាំ មកនៅត្រឹម ៦ ខែ ទៅ ១០ ខែ។ ក្នុងនោះ ប្រាក់ពិន័យ ក៏ត្រូវបានកាត់បន្ថយពី ២ លានរៀល ក្នុងម្នាក់ៗ មកនៅត្រឹម ១ លាន ទៅ ១ លាន ៥ សែនរៀល។ ប៉ុន្តែអ្នកស្រី ទេព វន្នី និងអតីតព្រះសង្ឃ សឺន ហាយ គឺចៅក្រមតម្កល់សាលក្រម ទោសជាប់ពន្ធនាគារ ១ ឆ្នាំដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
សម្រែករបស់ស្ត្រីសកម្មជនដីធ្លី និងអតីតព្រះសង្ឃ បានលាន់លឺកងរំពង ពេញបន្ទប់សវនាការ និងបរិវេណតុលាការសាលាឧទ្ធរណ៍ នៅព្រឹកថ្ងៃចន្ទ ទី២៦មករា។ នោះគឺសកម្មជនដីធ្លី ៥ នាក់ រួមមាន គង់ចន្ថា បូរឆវី នងស្រេង ផាន់ឈុនរ៉េត និងសុខស្រីលាភ ជាប់ពន្ធនាគារ ១០ ខែ និងពិន័យ ១,៥ លានរៀល។ ចំណែកលោកយាយ ង៉ែត ឃុន ហៅហាយម៉ាំមី ជាប់ពន្ធនាគារ ៦ ខែ និងពិន័យ ១ លានរៀល។ រីឯអ្នកស្រី ទេព វន្នី នៅជាប់ទោស ១ ឆ្នាំដដែល និងត្រូវបង់ប្រាក់ពិន័យ ១,៥ លានរៀល។
ដោយឡែកអតីតព្រះសង្ឃ សឺន ហាយ ត្រូវចៅក្រម សម្រេចតម្កល់សាលក្រមដដែល គឺជាប់ពន្ធនាគារ ១ ឆ្នាំ និងពិន័យ ២ លានរៀល។ រីឯស្ត្រី ៣ នាក់ទៀត រួមមាន៖ អ៊ឹម ស្រីទូច ហេង ពេជ្រ និង ភួង សុភាព ជាប់ពន្ធនាគារ ១០ ខែ និងពិន័យជាប្រាក់ ១,៥ លានរៀល។
លោក អំ សំអាត ប្រធានផ្នែកបច្ចេកទេសស៊ើបអង្កេតរបស់អង្គការលីកាដូ ដែលបានតាមដានសំណុំរឿងក្តីនេះ បានចាត់ទុកសាលក្រមរបស់តុលាការសាលាឧទ្ធរណ៍ ថាជាសាលក្រមបែបនយោបាយ និងមានចរិកបែបគំនុំពីអាជ្ញាធរលើអ្នកតវ៉ាដីធ្លី។
លោក អំ សំអាត បានបញ្ជាក់ថា “សាលក្រមនេះ ជាសាលក្រមបែបចរិកនយោបាយ មិនមែនជាសាលក្រមដោយអង្គហេតុ អង្គច្បាប់ និងគតិយុត្តិទេ។ អីចឹង បើសាលក្រមសម្រេចឈរលើបែបនយោបាយដូច្នេះ គឺប្រជាពលរដ្ឋនឹងត្រូវតែរងគ្រោះជាបន្ត ហើយយើងមើលទៅចរិកនៃសាលក្រមនេះ ក៏បង្កប់ដោយការគំនុំ។ អានេះ គឺដោយសារការគំនុំពីអាជ្ញាធរចំពោះអ្នកទាំងអស់នេះ ដែលធ្វើការតវ៉ាជាញឹកញាប់។
ដោយឡែក លោកស្រី សាម សុគន្ធា មេធាវីសកម្មជនដីធ្លី បានសម្តែងការខកចិត្ត ហើយប្រកាសប្តឹងសារទុក្ខ បន្តទៅកាន់តុលាការកំពូល។
ស្ត្រីសកម្មជនដីធ្លី ៧ នាក់ ត្រូវបានចាប់ខ្លួន នៅមុខសាលារាជធានីភ្នំពេញ នៅពេលតវ៉ារឿងទឹកលិចផ្ទះ នៅសហគមន៍បឹងកក់ កាលពីថ្ងៃទី១០វិច្ឆិកា ឆ្នាំ២០១៤។ មួយថ្ងៃក្រោយមក អតីតព្រះសង្ឃ សឺនហាយ និងស្ត្រីសកម្មជនដីធ្លី ៣ នាក់ ត្រូវចាប់ខ្លួន ពេលតវ៉ា មុខតុលាការសាលាដំបូងរាជធានីភ្នំពេញ។ ទាំង ១១ នាក់នោះ ត្រូវបានតុលាការសាលាដំបូង សម្រេចផ្តន្ទាទោសភ្លាមៗ ដាក់ពន្ធនាគារ ១ ឆ្នាំ និងពិន័យជាប្រាក់ ២ លានរៀល ក្នុងម្នាក់ៗ ពីបទបិទផ្លូវ បង្កការរាំងស្ទះចរាចរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ