កូនរបស់លោក សុខ អាន នឹងក្លាយជាតំណាងរាស្ត្រជំនួស លោក សូ ឃុន
ព្រឹកនេះ គណៈកម្មាធិការអចិន្ត្រៃយ៍នៃរដ្ឋសភាកម្ពុជាបានសម្រេចទទួលយកបេក្ខភាពរបស់លោក សុខ សូកាន ដែលជាកូនលោក សុខ អាន ឧបនាយករដ្ឋមន្ត្រី និងរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ឱ្យធ្វើជាតំណាងរាស្ត្រជំនួសលោក សូ ឃុន តាមសំណើគណៈកម្មាធិការជាតិរៀបចំការបោះឆ្នោតហើយ។ ប៉ុន្តែ គេត្រូវរងចាំរហូតដល់មានការអនុម័តពីកិច្ចប្រជុំសភាពេញអង្គ និងការធ្វើសច្ចាប្រណិធានសិនទើប លោក សុខ សូកាន អាចក្លាយជាតំណាងរាស្ត្រពេញសិទ្ធិបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១០
កិច្ចប្រជុំគណៈកម្មាធិការអចិន្ត្រៃយ៍រដ្ឋសភាកម្ពុជា នាព្រឹកថ្ងៃចន្ទ ទី០២ ខែកុម្ភៈ ឆ្នាំ២០១៥ បានសម្រេចតាមសំណើថ្ងៃទី២៦ ខែមករា ឆ្នាំ២០១៥ របស់គណបក្សប្រជាជនកម្ពុជា ទទួលយកបេក្ខភាពលោក សុខ សូកាន ឱ្យធ្វើជាអ្នកតំណាងរាស្ត្រមណ្ឌលតាកែវ និងជាសមាជិកនៃគណៈកម្មាការទី៩នៃរដ្ឋសភាកម្ពុជា ជំនួសលោក សូ ឃុន ដែលទើបបានទទួលមរណភាព។
លោក ឈាង វុន អ្នកតំណាងរាស្ត្រ និងអ្នកនាំពាក្យឱ្យរដ្ឋសភាកម្ពុជា បញ្ជាក់៖ «យើងសម្រេចរួចហើយ។ យើងត្រូវដាក់ចូលទៅសុំការអនុម័តរបស់សភាពេញអង្គពេលដែលមានកិច្ចប្រជុំសភាពេញអង្គ ណាមួយ»។
កើតឆ្នាំ១៩៨៣ លោក សុខ សូកាន ជាបេក្ខជនតំណាងរាស្ត្រលេខរៀងទី៨របស់គណបក្សប្រជាជនកម្ពុជា នៅមណ្ឌលតាកែវ ក្នុងការបោះឆ្នោតជ្រើសតាំងតំណាងរាស្ត្រថ្ងៃទី២៨ ខែកក្កដា ឆ្នាំ២០១៣។ សម័យប្រជុំរដ្ឋសភាលើកទី៣ នីតិកាលទី៥ បានបិទតាំងពីថ្ងៃទី៣១ ខែធ្នូ ឆ្នាំ២០១៤មក។ ប្រសិនបើគ្មានអ្វីជាឧបសគ្គទេ សម័យប្រជុំរដ្ឋសភាលើកក្រោយនឹងប្រកាសសុពលភាពរបស់លោក សុខ សូកាន ថាជាអ្នកតំណាងរាស្ត្រក្មេងជាងគេបំផុតរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ