បក្សកាន់អំណាច បញ្ចូលយុវជនជាង៣០០នាក់ក្នុងគណៈកម្មាធិការកណ្តាល
មហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា រយៈពេលពីរថ្ងៃកន្លះនៅឯមជ្ឈមណ្ឌលកោះពេជ្រ បានបិទបញ្ចប់ហើយនៅល្ងាចមិញនេះ។ នៅក្នុងមហាសន្និបាតវិសាមញ្ញនោះ ក្រៅពីផ្តោតសំខាន់លើការកែទម្រង់ស៊ីជម្រៅ គណបក្សប្រជាជនកម្ពុជាក៏បានបញ្ចូលបន្ថែមកម្លាំងថ្មីដែលភាគច្រើនជាក្រុមយុវជនចំនួន៣០៦នាក់ទៅក្នុងគណៈកម្មាធិការកណ្តាលរបស់ខ្លួនផងដែរ។
ចុះផ្សាយនៅថ្ងៃ៖
ស្តាប់ - ០២:៤៧
គឺជាលើកទីមួយហើយដែលគណបក្សប្រជាជនកម្ពុជា បានសម្រេចបញ្ចូលសមាជិកថ្មីចំនួនដល់ទៅ៣០៦រូបដែលភាគច្រើនជាក្រុមយុវជន បន្ថែមពីលើសមាជិកចាស់ដែលមានស្រាប់នៅក្នុងគណៈកម្មាធិការកណ្តាលរបស់ខ្លួន។ គិតទាំងចំនួនថ្មីនេះ គណៈកម្មាធិការកណ្តាលរបស់គណបក្សប្រជាជនកម្ពុជា បានកើនចំនួនដល់ទៅ៥៤៥នាក់។ ក្នុងនោះសមាជិកមានវ័យក្រោម៥០ឆ្នាំ មានចំនួនជាង២២ភាគរយ និង សមាជិកមានវ័យលើសពី៦០ឆ្នាំមានចំនួនប្រមាណជាង៣២ភាគរយ។
លោកខៀវ កាញារិទ្ធ អ្នកនាំពាក្យគណបក្សប្រជាជនកម្ពុជា បានបញ្ជាក់ពីមូលហេតុនៃការសម្រេចបញ្ចូលក្រុមយុវជនជាសមាជិកថ្មីនោះថា គឺដោយសារសមាជិកខ្លះមានវ័យចាស់ជរា និងខ្លះទៀតបានទទួលមរណៈភាព។ ហើយម្យ៉ាងទៀត យុវជនថ្មីទាំងនោះនឹងធ្វើការជាមួយយុវជនផ្សេងទៀត ដើម្បីទាក់ទាញការគាំទ្រកាន់ច្រើនពីសំណាក់យុវជន។
ជាមួយគ្នានេះ លោកខៀវ កាញារិទ្ធ បានបញ្ជាក់បន្ថែមថា ក្រុមយុវជនថ្មីទាំងនោះ មានគ្រប់សមាសភាពទាំងអស់ ពោលគឺមានទាំងសាច់ញាតិមន្ត្រីជាន់ខ្ពស់គណបក្សប្រជាជនកម្ពុជា និង ក្រុមយុវជនទូទៅ។ គណបក្សប្រជាជនកម្ពុជា ក៏បានលុបឈ្មោះសមាជិកចាស់មួយចំនួនចេញពីគណៈកម្មាធិការរបស់ខ្លួនផងដែរ ក្នុងនោះ ២៧រូប បានទទួលមរណៈភាព បណ្តេញចេញពីគណបក្ស១ រូប និងលាលែងដោយសារបញ្ហាសុខភាព១រូប។ បើតាមលោក ខៀវ កាញារិទ្ធ សមាជិកដែលបណ្តេញចេញពីបក្សនោះ គឺដោយសារតែប្រព្រឹត្តខុសនឹងវិន័យរបស់គណបក្ស។
យ៉ាងណាក៏ដោយ ក្រៅពីកែសម្រួលរចនាសម្ព័ន្ធគណៈកម្មាធិការកណ្តាលរបស់ខ្លួន នៅក្នុងមហាសន្និបាតរយៈវិសាមញ្ញនោះដែរ គណបក្សប្រជាជនកម្ពុជា ក៏បានសម្រេចនូវចំណុចជាច្រើនទៀតដូចជាលើកទិសដៅភារកិច្ចរបស់គណបក្សសម្រាប់ឆ្នាំ២០១៥ និងឆ្នាំបន្តបន្ទាប់ទៀត។ ពង្រឹងសាមគ្គីផ្ទៃក្នុងបក្ស ជំរុញការធ្វើកំណែទម្រង់បក្ស និង រក្សាកិច្ចព្រមព្រៀងបញ្ចប់វិបត្តិនយោបាយ រវាងគណបក្សប្រជាជនកម្ពុជានិងគណបក្សសង្គ្រោះជាតិ កាលពីថ្ងៃ ២២ កក្កដា ២០១៤ ព្រមទាំងបន្តពង្រឹងកិច្ចសហការអន្តរជាតិ ដើម្បីការពារសន្តិភាព និង ស្ថិរភាពក្នុងតំបន់និងពិភពលោក ។
សូមបញ្ជាក់ថា មហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជានេះ បានធ្វើឡើងរយៈពេលពីរថ្ងៃកន្លះ ដោយចាប់ផ្តើមពីរសៀលថ្ងៃសុក្រ និង ទើបបានបញ្ចប់នៅល្ងាចថ្ងៃអាទិត្យម្សិលមិញនេះ។ មហាសន្និបាតវិសាមញ្ញនេះ ធ្វើឡើងដោយមិនមានវត្តមានលោកជា ស៊ីម ប្រធានគណបក្សប្រជាកម្ពុជានោះទេ ប៉ុន្តែអង្គមហាសន្និបាតបានដឹកនាំលោកនាយករដ្ឋមន្ត្រីហ៊ុន សែន ប្រធានស្តីទី និងលោកហេង សំរិន ប្រធានកិត្តិយសគណបក្សប្រជាជនកម្ពុជា និង មានតំណាងសមាជិកគណបក្សប្រជាជនកម្ពុជាគ្រប់លំដាប់ថ្នាក់ចូលរួមប្រមាណជាង១ពាន់៣រយនាក់។
លោកស ខេង ថ្នាក់ដឹកនាំជាន់ខ្ពស់នៃការិយាល័យនយោបាយរបស់គណបក្សប្រជាជនកម្ពុជាក៏បានអវត្តមាននៅក្នុងមហាសន្និបាតវិសាមញ្ញនោះដែរ ដោយសារជាប់ទៅមើលលោកជា ស៊ីម ដែលមានជំងឺហើយកំពុងសម្រាកព្យាបាលនៅក្នុងប្រទេសវៀតណាម។ នេះបើតាមការបញ្ជាក់ពីលោកខៀវ កាញារិទ្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ